കാനഡയുടെ പസഫിക് തീരത്തെയും ആർട്ടിക് തീരത്തെയും ബന്ധിപ്പിക്കുന്ന “പോർട്ട്-ടു-പോർട്ട് കോറിഡോർ” എന്ന പുതിയ ആശയം സാസ്കച്വാൻ പ്രീമിയർ സ്കോട്ട് മോ മുന്നോട്ട് വെച്ചു. എണ്ണയും പ്രകൃതിവാതകവും ഉൾപ്പെടെയുള്ള ഊർജ്ജ ഉൽപ്പന്നങ്ങളുടെയും മറ്റ് കയറ്റുമതിയുടെയും ഒഴുക്ക് സുഗമമാക്കുക എന്നതാണ് ഈ പദ്ധതിയുടെ പ്രധാന ലക്ഷ്യം.
ആൽബർട്ട പ്രീമിയർ ഡാനിയേൽ സ്മിത്തിനൊപ്പം ഊർജ്ജ വ്യവസായത്തിൽ ഇരു പ്രവിശ്യകളുടെയും താൽപ്പര്യങ്ങൾ ചർച്ച ചെയ്യുന്ന ഒരു വേദിയിലാണ് മോ ഈ അഭിപ്രായം പ്രകടിപ്പിച്ചത്. “നമുക്ക് ഇനി യു.എസിനെ മാത്രം ആശ്രയിക്കാനാവില്ല, നമുക്ക് ആഗോള വിപണി തുറക്കാനാകും,” അദ്ദേഹം പറഞ്ഞു. മാർക്ക് കാർണി, കയറ്റുമതി അടിസ്ഥാന സൗകര്യങ്ങൾക്ക് വേഗത്തിൽ അംഗീകാരം നൽകുന്നതിനുള്ള നിയമം അവതരിപ്പിച്ചതിനെ മോ അഭിനന്ദിച്ചു.
ഇത് രാഷ്ട്രീയപരമായ നിലപാടുകൾക്കപ്പുറമുള്ള തങ്ങളുടെ കാഴ്ചപ്പാടുകളുമായി യോജിക്കുന്നതാണെന്നും അദ്ദേഹം കൂട്ടിച്ചേർത്തു. “ഞാൻ ലിബറൽ പാർട്ടിയുടെ ആരാധകനല്ല, പക്ഷേ പ്രധാനമന്ത്രി എടുത്ത ചില നിലപാടുകളെ പിന്തുണയ്ക്കാൻ എനിക്ക് കഴിയും,” മോ വ്യക്തമാക്കി. പൈപ്പ്ലൈൻ പദ്ധതികളും മറ്റ് ലക്ഷ്യങ്ങളും
ആൽബർട്ട മുഖ്യമന്ത്രി സ്മിത്ത്, പ്രിൻസ് റൂപ്പർട്ട് തുറമുഖത്തേക്ക് ഒരു ബിറ്റുമെൻ പൈപ്പ്ലൈൻ ഈ ഇടനാഴിയുടെ “പ്രധാന ഭാഗം” ആകണമെന്ന് ആവശ്യപ്പെട്ടു. വാൻകൂവർ വഴിയുള്ള ട്രാൻസ് മൗണ്ടൻ പൈപ്പ്ലൈനിന്റെ ശേഷിക്കപ്പുറം ഏഷ്യയിലേക്കുള്ള കയറ്റുമതിക്ക് ഇത് വഴി തുറക്കുമെന്നാണ് അവരുടെ പ്രതീക്ഷ.
ആൽബർട്ടയിലെ വലിയ എണ്ണപ്പാടങ്ങളിൽ നിന്നുള്ള കാർബൺ പിടിച്ചെടുത്ത് ഭൂമിക്കടിയിൽ സംഭരിക്കുന്ന “പാത് വേയ്സ്” പദ്ധതിയെ ദേശീയ താൽപ്പര്യമുള്ള പദ്ധതിയായി പരിഗണിക്കണമെന്നും അവർ ആവശ്യപ്പെട്ടു. ഹഡ്സൺ ബേ വഴി യൂറോപ്പിലേക്ക് കയറ്റുമതി സാധ്യമാക്കുന്ന ചർച്ചിൽ തുറമുഖത്തേക്കുള്ള മറ്റൊരു പൈപ്പ്ലൈൻ സാധ്യതയെയും ഇരുവരും പിന്തുണച്ചു. മാനിറ്റോബ പ്രീമിയർ വാബ് കിന്യൂവും ഈ പദ്ധതിക്ക് പിന്തുണ നൽകുന്നുണ്ടെന്ന് റിപ്പോർട്ടുകൾ പറയുന്നു.
ഒറ്റക്കെട്ടായി സമ്മർദ്ദം ചെലുത്തും.
“പ്രധാനമന്ത്രിക്ക് ഒരു പദ്ധതിയും അതിന് നേതൃത്വം നൽകാൻ ഒരു നേതാവും വേണം,” സ്മിത്ത് പറഞ്ഞു. സ്വകാര്യ മേഖലയിലെ പ്രതിനിധികളെ കൂടി ഉൾപ്പെടുത്തിക്കൊണ്ട്, രണ്ട് വർഷത്തിനുള്ളിൽ പദ്ധതിക്ക് അംഗീകാരം നേടാനാണ് തങ്ങൾ ലക്ഷ്യമിടുന്നതെന്നും അവർ വ്യക്തമാക്കി. ഫെഡറൽ നിയമം പാസാക്കാൻ ലിബറൽ സർക്കാർ ശ്രമിക്കുന്നതിനിടെ, കാർണി, കൺസർവേറ്റീവ് പ്രീമിയർമാരോട് തങ്ങൾക്ക് അറിയാവുന്ന ഫെഡറൽ കൺസർവേറ്റീവ് എം.പി.മാരെ സമീപിക്കാൻ ആവശ്യപ്പെട്ടിട്ടുണ്ടെന്നും സ്മിത്ത് വെളിപ്പെടുത്തി. എന്നിരുന്നാലും, നിലവിലെ ഫെഡറൽ പരിസ്ഥിതി നിയമങ്ങൾ റദ്ദാക്കണമെന്ന് ഇരുവരും ആവശ്യപ്പെട്ടു. “നയപരമായ പരിഷ്കാരങ്ങൾ നമുക്കാവശ്യമാണ്, അതും ഉടൻ,” മോ ഊന്നിപ്പറഞ്ഞു.
ജി-7 ഉച്ചകോടിയുടെ പശ്ചാത്തലം ആൽബർട്ടയിലെ കനനാസ്കിസ് നഗരത്തിൽ നടക്കുന്ന ജി-7 ഉച്ചകോടിയുടെ പശ്ചാത്തലത്തിലാണ് ഈ ചർച്ചകൾ നടന്നത്. ആഗോള ഊർജ്ജ സുരക്ഷയെക്കുറിച്ചുള്ള ചർച്ചകൾക്ക് ഈ പരിപാടി ഒരു പശ്ചാത്തലമായി. “ഇന്ത്യ, യൂറോപ്പ്, ജപ്പാൻ തുടങ്ങിയ രാജ്യങ്ങൾക്ക് ഊർജ്ജ സുരക്ഷ ഉറപ്പാക്കുന്നതിൽ ആൽബർട്ടയ്ക്ക് യ്ക്ക് നിർണായക പങ്ക് വഹിക്കാൻ കഴിയും,” സ്മിത്ത് പ്രസ്താവിച്ചു.
