സസ്കാച്ചവാൻ: സസ്കാച്ചവാൻ പ്രവിശ്യയിൽ ഡിസംബർ മാസത്തിൽ തൊഴിൽ വിപണിയിൽ വലിയ പ്രതിസന്ധിയാണ് രേഖപ്പെടുത്തിയത്. സ്റ്റാറ്റിസ്റ്റിക്സ് കാനഡയുടെ ഏറ്റവും പുതിയ കണക്കുകൾ പ്രകാരം ഒരൊറ്റ മാസം കൊണ്ട് 4,000 തൊഴിലവസരങ്ങളാണ് പ്രവിശ്യയിൽ ഇല്ലാതായത്. ഇതോടെ തൊഴിലില്ലായ്മ നിരക്ക് 0.9 ശതമാനം വർധിച്ച് 6.5 ശതമാനത്തിൽ എത്തിനിൽക്കുകയാണ്. ദേശീയ തലത്തിൽ ഡിസംബറിൽ 8,200 ജോലികൾ പുതുതായി സൃഷ്ടിക്കപ്പെട്ടെങ്കിലും കാനഡയിലെ മൊത്തം തൊഴിലില്ലായ്മ നിരക്ക് 6.8 ശതമാനമായി ഉയർന്നു.
പ്രവിശ്യയിലെ നിലവിലെ സാമ്പത്തിക സാഹചര്യം അങ്ങേയറ്റം ആശങ്കാജനകമാണെന്ന് പ്രതിപക്ഷമായ എൻ.ഡി.പി ആരോപിച്ചു. യുവാക്കൾക്കിടയിലെ തൊഴിലില്ലായ്മ 15 ശതമാനമായി ഉയർന്നത് വലിയ പ്രതിസന്ധിയാണ് സൃഷ്ടിക്കുന്നത്. നികുതി വർധനവും തൊഴിലില്ലായ്മയും കാരണം വിദഗ്ധ തൊഴിലാളികളും യുവാക്കളും കൂട്ടത്തോടെ പ്രവിശ്യ ഉപേക്ഷിച്ചു പോവുകയാണെന്ന് എൻ.ഡി.പി നേതാവ് കാർല ബെക്കും ഷാഡോ മിനിസ്റ്റർ അലിയാന യംഗും കുറ്റപ്പെടുത്തി. കോവിഡ് കാലഘട്ടത്തിന് പുറമെ കഴിഞ്ഞ രണ്ട് പതിറ്റാണ്ടിനിടെ ആദ്യമായി സസ്കാച്ചവാനിൽ ജനസംഖ്യയിൽ കുറവ് രേഖപ്പെടുത്തിയതായും ഏകദേശം 42,700 ആളുകൾ നിലവിൽ ജോലിക്കായി അലയുകയാണെന്നും പ്രതിപക്ഷം ചൂണ്ടിക്കാട്ടി.
എന്നാൽ ഈ ആരോപണങ്ങളെ ഭരണകക്ഷിയായ സസ്കാച്ചവാൻ പാർട്ടി തള്ളിക്കളഞ്ഞു. 2025-ൽ മൊത്തത്തിൽ മികച്ച പ്രകടനമാണ് പ്രവിശ്യ കാഴ്ചവെച്ചതെന്ന് സർക്കാർ അവകാശപ്പെട്ടു. കഴിഞ്ഞ വർഷം ആകെ 15,200 പുതിയ ജോലികൾ സൃഷ്ടിക്കാൻ സാധിച്ചുവെന്നും കാനഡയിൽ ഏറ്റവും കുറഞ്ഞ വാർഷിക തൊഴിലില്ലായ്മ നിരക്ക് (5.2%) രേഖപ്പെടുത്തിയത് സസ്കാച്ചുവാനിലാണെന്നും ഇമിഗ്രേഷൻ മന്ത്രി എറിക് ഷ്മാൽസ് പറഞ്ഞു. സസ്കറ്റൂൺ, റെജീന തുടങ്ങിയ നഗരങ്ങളിൽ തൊഴിൽ വളർച്ച ദൃശ്യമാണെന്നും വരും വർഷത്തിൽ സ്ഥിതി മെച്ചപ്പെടുമെന്നും സർക്കാർ പ്രത്യാശ പ്രകടിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Saskatchewan loses 4,000 jobs in December as unemployment rate climbs
