ഇന്ധനവില കുതിക്കുന്നു; സസ്കാച്ചവാനിലും പ്രതിസന്ധി കടുക്കും; പശ്ചിമേഷ്യൻ സംഘർഷം ആഗോള വിപണിയെ ഉലയ്ക്കുന്നു

സസ്‌കാറ്റൂൺ: പശ്ചിമേഷ്യയിൽ ഇസ്രായേലും ഇറാനും തമ്മിലുള്ള സൈനിക നീക്കങ്ങൾ ശക്തമായതോടെ ആഗോള വിപണിയിൽ അസംസ്‌കൃത എണ്ണവില കുതിച്ചുയരുന്നു. കഴിഞ്ഞ ശനിയാഴ്ച ഇറാനിലുണ്ടായ ആക്രമണങ്ങളും തുടർന്നുള്ള പ്രത്യാക്രമണങ്ങളുമാണ് വിപണിയിൽ ആശങ്ക പടർത്തിയത്. ആഗോളതലത്തിൽ ക്രൂഡ് ഓയിൽ വിതരണം തടസ്സപ്പെട്ടതോടെ സസ്‌കാച്ചുവാനിലും ഇന്ധനവിലയിൽ വൻ വർധനയുണ്ടാകുമെന്നാണ് സാമ്പത്തിക വിദഗ്ധരുടെ വിലയിരുത്തൽ.

തിങ്കളാഴ്ച എണ്ണവിലയിൽ ഗണ്യമായ വർധന രേഖപ്പെടുത്തി. ഏപ്രിൽ മാസത്തെ ക്രൂഡ് ഓയിൽ കരാറുകളിൽ ബാരലിന് 4.21 യുഎസ് ഡോളർ വർധിച്ച് 71.23 ഡോളറിലെത്തി. ലോകത്തിലെ തന്നെ ഏറ്റവും വലിയ എണ്ണശുദ്ധീകരണശാലകളിലൊന്നായ സൗദി അറേബ്യയിലെ റാസ് തനൂറയ്ക്ക് നേരെയുണ്ടായ ഡ്രോൺ ആക്രമണവും പ്രതിസന്ധിയുടെ ആക്കം കൂട്ടിയിട്ടുണ്ട്.സസ്‌കാച്ചുവാനിൽ സ്വന്തമായി എണ്ണശുദ്ധീകരണ ശാലകൾ ഉണ്ടെങ്കിലും പ്രാദേശിക വിപണിയിലെ വില ആഗോള പ്രവണതകൾക്ക് അനുസൃതമായിരിക്കുമെന്ന് യൂണിവേഴ്‌സിറ്റി ഓഫ് സസ്‌കാച്ചുവാനിലെ സാമ്പത്തിക ശാസ്ത്ര പ്രൊഫസർ ദേവൻ മെസ്‌കാൽ വ്യക്തമാക്കുന്നു.

ആഗോളതലത്തിൽ എണ്ണവില നിശ്ചയിക്കുന്നത് ബ്രെന്റ് ക്രൂഡ് (Brent Crude) പോലുള്ള രാജ്യാന്തര മാനദണ്ഡങ്ങൾ അനുസരിച്ചാണ്. അതിനാൽ ലോകത്തിന്റെ ഏത് ഭാഗത്തുണ്ടാകുന്ന വിതരണ തടസ്സവും സസ്‌കാച്ചുവാനിലെ പമ്പുകളിലും പ്രതിഫലിക്കും. നിലവിലെ സാഹചര്യത്തിൽ ആഗോള വിപണിയിലെ അനിശ്ചിതത്വം തുടരുന്നത് പ്രാദേശിക ഉപഭോക്താക്കൾക്ക് തിരിച്ചടിയാകുമെന്നും അദ്ദേഹം പറഞ്ഞു.

ഷിപ്പിംഗ് മേഖലയിലെ പ്രതിസന്ധിയാണ് എണ്ണവില വർധനയ്ക്കുള്ള മറ്റൊരു പ്രധാന കാരണം. ലോകത്തിലെ എണ്ണ വിതരണത്തിന്റെ അഞ്ചിലൊന്ന് കടന്നുപോകുന്ന ഹോർമുസ് കടലിടുക്കിലെ (Strait of Hormuz) ഗതാഗത തടസ്സങ്ങൾ വലിയ ഭീഷണിയാണ് ഉയർത്തുന്നത്. യുദ്ധസാഹചര്യം കണക്കിലെടുത്ത് ഇൻഷുറൻസ് കമ്പനികൾ ഈ മേഖലയിലൂടെയുള്ള കപ്പലുകൾക്ക് പരിരക്ഷ നൽകാൻ മടിക്കുന്നത് എണ്ണ നീക്കത്തെ സാരമായി ബാധിച്ചിട്ടുണ്ട്. വിതരണ ശൃംഖലയിലെ ഈ മന്ദഗതി വരുംദിവസങ്ങളിൽ സസ്‌കാറ്റൂൺ ഉൾപ്പെടെയുള്ള നഗരങ്ങളിൽ ഇന്ധനക്ഷാമത്തിനും വിലക്കയറ്റത്തിനും ഇടയാക്കിയേക്കാം.

വരും ആഴ്ചകളിൽ ഇന്ധനവിലയിൽ റെക്കോർഡ് വർധനവുണ്ടാകാനാണ് സാധ്യതയെന്ന് പ്രമുഖ എണ്ണവില വിശകലന വിദഗ്ധൻ ഡാൻ മക് ടീഗ് മുന്നറിയിപ്പ് നൽകുന്നു. ബാരലിന് 20 ഡോളർ വരെ വില വർധിച്ചേക്കാം. ഇത് പമ്പുകളിൽ പെട്രോളിന് ലിറ്ററിന് 20 സെന്റും, ഡീസലിന് 35 മുതൽ 40 സെന്റ് വരെയും വർധിക്കാൻ കാരണമാകും. നിലവിൽ തന്നെ ഇന്ധനവില വർധനവിൽ വലയുന്ന സാധാരണക്കാർക്ക് ഈ വാർത്ത വലിയ ആശങ്കയാണ് നൽകുന്നത്. ഓരോ ദിവസം കഴിയുന്തോറും വില മാറിക്കൊണ്ടിരിക്കുന്നത് തങ്ങളുടെ ദൈനംദിന ജീവിതത്തെ ബാധിക്കുന്നുവെന്ന് സസ്‌കാറ്റൂണിലെ വാഹന ഉടമകൾ പറയുന്നു. ഈ വിലക്കയറ്റം എത്രത്തോളം ഉയരുമെന്നും എത്രകാലം നീണ്ടുനിൽക്കുമെന്നുമാണ് ഇനി വരും ദിവസങ്ങളിൽ ഉറ്റുനോക്കുന്നത്.

saskatchewan-drivers-brace-for-higher-gas-prices-amid-conflict-in-iran

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt