സസ്കച്ചെവാൻ: ചൈനയുമായുള്ള വ്യാപാര തർക്കങ്ങൾ പരിഹരിക്കാൻ ലക്ഷ്യമിട്ടുള്ള പുതിയ കരാർ കാനഡയ്ക്ക് വലിയ നേട്ടമാകുമെന്ന് സസ്കച്ചെവാൻ പ്രീമിയർ സ്കോട്ട് മോ. പ്രധാനമന്ത്രി മാർക്ക് കാർണിയോടൊപ്പം ചൈനയിൽ നടത്തിയ ഔദ്യോഗിക സന്ദർശനത്തിന് പിന്നാലെ യൂണിവേഴ്സിറ്റി ഓഫ് സസ്കച്ചെവാനിൽ നടന്ന വാർത്താ സമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്. തർക്കങ്ങൾ പരിഹരിക്കാനുള്ള കൃത്യമായ സംവിധാനം നിലവിൽ വന്നതോടെ കാർഷിക ഉൽപ്പന്നങ്ങൾ കയറ്റി അയക്കുന്ന കപ്പലുകൾ ചൈനീസ് തുറമുഖങ്ങളിൽ തടയപ്പെടുന്നത് ഒഴിവാക്കാൻ സാധിക്കുമെന്ന് അദ്ദേഹം പറഞ്ഞു.
പുതിയ കരാർ പ്രകാരം കാനഡയിൽ നിന്നുള്ള കനോല മീൽ (Canola meal), പയർവർഗ്ഗങ്ങൾ എന്നിവയുടെ മേൽ ചൈന ഏർപ്പെടുത്തിയിരുന്ന നികുതി പൂർണ്ണമായും ഒഴിവാക്കി. കനോല വിത്തുകളുടെ നികുതി 15 ശതമാനമായി കുറയ്ക്കാനും തീരുമാനമായിട്ടുണ്ട്. നേരത്തെ ചൈന ഏർപ്പെടുത്തിയിരുന്ന 85 ശതമാനം വരെയുള്ള ഉയർന്ന നികുതികൾ സസ്കച്ചെവാനിലെ കർഷകർക്ക് കോടിക്കണക്കിന് രൂപയുടെ നഷ്ടമാണ് ഉണ്ടാക്കിയിരുന്നത്. കാനഡ ഇലക്ട്രിക് വാഹനങ്ങൾക്ക് (EV) 100 ശതമാനം നികുതി ഏർപ്പെടുത്തിയതിനെ തുടർന്നാണ് ചൈന തിരിച്ചടിയായി കനേഡിയൻ കാർഷിക ഉൽപ്പന്നങ്ങൾക്ക് നിയന്ത്രണം ഏർപ്പെടുത്തിയിരുന്നത്.
അമേരിക്കയെയും ചൈനയെയും അമിതമായി ആശ്രയിക്കുന്നത് ശരിയല്ലെന്ന വാദങ്ങൾ നിലനിൽക്കുന്നുണ്ടെങ്കിലും, ഉയർന്ന വില ലഭിക്കുന്ന ചൈനീസ് വിപണി കർഷകർക്ക് അത്യന്താപേക്ഷിതമാണെന്ന് സ്കോട്ട് മോ ചൂണ്ടിക്കാട്ടി. രാഷ്ട്രീയത്തേക്കാൾ വ്യാപാരത്തിന് മുൻഗണന നൽകിയുള്ള ഫെഡറൽ സർക്കാരിന്റെ നീക്കങ്ങളെ അദ്ദേഹം അഭിനന്ദിച്ചു. പുതിയ വ്യാപാര ക്രമീകരണങ്ങൾ നിലവിൽ വന്നതോടെ വരാനിരിക്കുന്ന കൃഷി സീസണിൽ സസ്കച്ചെവാനിലെ കർഷകർക്ക് കൂടുതൽ ആത്മവിശ്വാസത്തോടെ മുന്നോട്ട് പോകാൻ സാധിക്കുമെന്നും അദ്ദേഹം കൂട്ടിച്ചേർത്തു.
sask-premier-to-address-terms-of-new-trade-deal-with-china
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
