മുംബൈ: വരാനിരിക്കുന്ന 2026 ടി20 ലോകകപ്പിനുള്ള ഇന്ത്യൻ ക്രിക്കറ്റ് ടീമിൽ മലയാളി താരം സഞ്ജു സാംസൺ ഇടംപിടിച്ചു. ടി20 ഫോർമാറ്റിലെ സഞ്ജുവിന്റെ മികച്ച ഫോമും ടീമിലെ അനിവാര്യതയും പരിഗണിച്ചാണ് സെലക്ഷൻ കമ്മിറ്റിയുടെ ഈ തീരുമാനം. സഞ്ജുവിനൊപ്പം ശിവം ദുബെയും ടീമിൽ സ്ഥാനം നിലനിർത്തിയിട്ടുണ്ട്. ഇരുവരും നിലവിൽ ചെന്നൈ സൂപ്പർ കിംഗ്സ് താരങ്ങളായതിനാൽ ടീം മാനേജ്മെന്റ് സോഷ്യൽ മീഡിയയിലൂടെ അഭിനന്ദനങ്ങൾ അറിയിച്ചു.
കഴിഞ്ഞ 2024 ലോകകപ്പ് നേടിയ ഇന്ത്യൻ ടീമിൽ അംഗമായിരുന്നെങ്കിലും ഒരു മത്സരത്തിൽ പോലും സഞ്ജുവിന് കളിക്കാൻ അവസരം ലഭിച്ചിരുന്നില്ല. എന്നാൽ ഇത്തവണ ടീമിലെ പ്രധാന വിക്കറ്റ് കീപ്പർ ബാറ്ററായും ഓപ്പണറായും സഞ്ജുവിനെയാണ് ഇന്ത്യ പരിഗണിക്കുന്നത്. മോശം ഫോമിനെത്തുടർന്ന് ശുഭ്മൻ ഗില്ലിനെ ഒഴിവാക്കിയ സാഹചര്യത്തിൽ, അഭിഷേക് ശർമ്മയ്ക്കൊപ്പം സഞ്ജു സാംസൺ ഇന്നിംഗ്സ് ഓപ്പൺ ചെയ്യുമെന്നാണ് ക്രിക്കറ്റ് നിരീക്ഷകരുടെ വിലയിരുത്തൽ.
നേരത്തെ ടീമിനായി ഇന്നിംഗ്സ് തുടങ്ങുന്ന ഓപ്പണറുടെ വേഷത്തിൽ സഞ്ജു മികച്ച പ്രകടനം നടത്തിയിരുന്നു. എന്നാൽ ഏഷ്യ കപ്പിന് ശേഷം ശുഭ്മൻ ഗിൽ ടീമിലേക്ക് തിരിച്ചു വന്നതോടെ സഞ്ജുവിന് ആ സ്ഥാനം നഷ്ടമാവുകയായിരുന്നു. ഓസ്ട്രേലിയൻ പരമ്പരയിലും ദക്ഷിണാഫ്രിക്കയ്ക്കെതിരായ ആദ്യ മത്സരങ്ങളിലും അവസരം ലഭിച്ചില്ലെങ്കിലും, അഞ്ചാം ടി20യിൽ ലഭിച്ച അവസരം സഞ്ജു മുതലാക്കി. പരിക്കേറ്റ ഗില്ലിന് പകരം ടീമിലെത്തി 22 പന്തിൽ 37 റൺസ് നേടിയ താരത്തിന്റെ പ്രകടനം സെലക്ടർമാരുടെ ശ്രദ്ധ പിടിച്ചുപറ്റിയിരുന്നു.
ഐപിഎല്ലിൽ രാജസ്ഥാൻ റോയൽസിന്റെ ക്യാപ്റ്റനായിരുന്ന സഞ്ജു സാംസൺ, 2026 സീസണിലാണ് ചെന്നൈ സൂപ്പർ കിംഗ്സിലേക്ക് (CSK) മാറുന്നത്. 2018 മുതൽ രാജസ്ഥാൻ ടീമിലെ പ്രധാന താരമായിരുന്ന സഞ്ജു, ഇനി ഋതുരാജ് ഗായക്വാദ് നയിക്കുന്ന ചെന്നൈ ടീമിന് വേണ്ടിയാകും കളത്തിലിറങ്ങുക. ചെന്നൈയുടെ മഞ്ഞ ജേഴ്സിയിൽ സഞ്ജുവിന്റെ ആദ്യ മത്സരം കാണാനായി ആവേശത്തോടെ കാത്തിരിക്കുകയാണ് ആരാധകർ.
സഞ്ജുവിനൊപ്പം ടീമിലെത്തിയ ശിവം ദുബെയും ഇന്ത്യയുടെ ലോകകപ്പ് പദ്ധതികളിൽ നിർണ്ണായകമാണ്. 2023 മുതൽ ചെന്നൈ സൂപ്പർ കിംഗ്സിനായി നടത്തുന്ന മികച്ച പ്രകടനമാണ് ദുബെയെ വീണ്ടും ദേശീയ ടീമിലെത്തിച്ചത്. മധ്യനിരയിൽ കരുത്തനായ ദുബെയും സഞ്ജു സാംസണും ചേരുന്നതോടെ ഇന്ത്യൻ ബാറ്റിംഗ് നിര കൂടുതൽ ശക്തമാകുമെന്നാണ് പ്രതീക്ഷ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Sanju Samson named in 2026 T20 World Cup squad
