സാൽമൊണല്ല രോഗബാധയെ തുടർന്ന് കാനഡയിൽ നാല് ബ്രാൻഡ് പിസ്ത ഉത്പന്നങ്ങൾ തിരിച്ചുവിളിച്ചു. കനേഡിയൻ ഫുഡ് ഇൻസ്പെക്ഷൻ ഏജൻസിയാണ് (CFIA) ഇതുമായി ബന്ധപ്പെട്ട് മുന്നറിയിപ്പ് നൽകിയത്. കഴിഞ്ഞ കുറച്ചുനാളുകളായി വിവിധ ബ്രാൻഡുകളുടെ പിസ്ത ഉത്പന്നങ്ങളിൽ സാൽമൊണല്ല ബാക്ടീരിയയുടെ സാന്നിധ്യം കണ്ടെത്തിയിരുന്നു. ചില ആരോഗ്യവിദഗ്ദ്ധർ എല്ലാ പിസ്ത ഉത്പന്നങ്ങളും ഒഴിവാക്കണമെന്ന് നിർദ്ദേശിക്കുമ്പോൾ, മറ്റ് ചിലർ തിരിച്ചുവിളിച്ച ഉത്പന്നങ്ങൾ മാത്രം ഒഴിവാക്കിയാൽ മതിയെന്ന് അഭിപ്രായപ്പെടുന്നു.
ഹബീബി ബ്രാൻഡ് പിസ്ത കേർണൽസ്, അൽ മൊക്തർ ഫുഡ് സെന്റർ പിസ്തകൾ, ദുബായ് ബ്രാൻഡ് മിൽക്ക് ചോക്ലേറ്റ് ബാറുകൾ, അൻഡലോസ് ബ്രാൻഡ് ബക്ലാവ എന്നിവയാണ് നിലവിൽ തിരിച്ചുവിളിച്ച ഉത്പന്നങ്ങൾ. പിസ്ത കഴിച്ചതിനെ തുടർന്ന് 52 പേർക്ക് രോഗം ബാധിക്കുകയും 10 പേരെ ആശുപത്രിയിൽ പ്രവേശിപ്പിക്കുകയും ചെയ്തതായി പബ്ലിക് ഹെൽത്ത് ഏജൻസി ഓഫ് കാനഡ (PHAC) അറിയിച്ചു. റിപ്പോർട്ട് ചെയ്യപ്പെടാത്ത കേസുകൾ ഇതിലും കൂടുതലാകാമെന്നും അവർ വ്യക്തമാക്കി.
ഒരു മധുരപലഹാരത്തിലോ സാലഡിലോ ചേർത്തിട്ടുള്ള പിസ്ത ഏത് ബ്രാൻഡ് ആണെന്ന് തിരിച്ചറിയാൻ പ്രയാസമുണ്ടെന്ന് PHAC-ന്റെ ഔട്ട്ബ്രേക്ക് മാനേജ്മെന്റ് ഡയറക്ടറായ ഏപ്രിൽ ഹെക്സെമർ പറഞ്ഞു. “ചില ബേക്കറികളിൽ വിൽക്കുന്ന മധുരപലഹാരങ്ങളിൽ പിസ്ത വിതറിയിട്ടുണ്ടാകാം. അത് ഏത് ബ്രാൻഡാണെന്ന് മനസ്സിലാക്കാൻ പ്രയാസമാണ്. ഇതെല്ലാം അന്വേഷണത്തിന്റെ ഭാഗമാണ്,” അവർ കൂട്ടിച്ചേർത്തു. മോൺട്രിയലിലെ ഒരു ബേക്കറിയിൽ വിറ്റ ബക്ലാവ പേസ്ട്രികളും, കാനഡയിലുടനീളം ഓൺലൈനായി വിറ്റ ദുബായ് ചോക്ലേറ്റും നിലവിൽ തിരിച്ചുവിളിച്ച ഉത്പന്നങ്ങളിൽ ഉൾപ്പെടുന്നു.
എന്നാൽ, തിരിച്ചുവിളിച്ച ബ്രാൻഡുകൾക്ക് പുറമെ എല്ലാ പിസ്ത ഉത്പന്നങ്ങളും ഒഴിവാക്കുന്നതാണ് സുരക്ഷിതമെന്ന് ഗൾഫ് യൂണിവേഴ്സിറ്റിയിലെ പ്രൊഫസറും കാനഡ റിസർച്ച് ചെയറുമായ ലോറൻസ് ഗുഡ്റിഡ്ജ് അഭിപ്രായപ്പെട്ടു. “PHAC ഔദ്യോഗികമായി ഈ രോഗബാധ അവസാനിച്ചുവെന്ന് പ്രഖ്യാപിക്കുന്നത് വരെ പിസ്ത അടങ്ങിയ ഉത്പന്നങ്ങൾ കഴിക്കരുത്,” അദ്ദേഹം പറഞ്ഞു. എല്ലാ പിസ്ത ഉത്പന്നങ്ങളിലും മലിനീകരണം ഉണ്ടെന്ന് ഇതിനർത്ഥമില്ലെന്നും, എവിടെ നിന്നാണ് ഈ പിസ്തകൾ വന്നതെന്ന് തിരിച്ചറിയാൻ സാധാരണക്കാർക്ക് കഴിയില്ലെന്നും അദ്ദേഹം കൂട്ടിച്ചേർത്തു.
അടുക്കളയിൽ സൂക്ഷിച്ചിട്ടുള്ള പിസ്ത ഏത് ബ്രാൻഡാണെന്ന് ഉറപ്പില്ലെങ്കിൽ അത് വാങ്ങിയ സ്ഥലവുമായി ബന്ധപ്പെടണമെന്ന് ഏപ്രിൽ ഹെക്സെമർ നിർദ്ദേശിച്ചു. കമേഴ്സ്യൽ കിച്ചണുകൾ ഉത്പന്ന കോഡുകൾ തിരിച്ചുവിളിച്ച ഉത്പന്നങ്ങളുമായി ഒത്തുനോക്കണം. “തിരിച്ചുവിളിച്ച ഉത്പന്നങ്ങൾ ഉപയോഗിക്കുകയോ വിൽക്കുകയോ ചെയ്യരുത്, അത് ഉടൻ തന്നെ കളയണം എന്നതാണ് പ്രധാന സന്ദേശം,” അവർ വ്യക്തമാക്കി.
സാൽമൊണല്ല രോഗബാധ ആർക്കും ഉണ്ടാകാം. രോഗം സ്ഥിരീകരിച്ചവർ മറ്റുള്ളവർക്കായി ഭക്ഷണം പാകം ചെയ്യരുതെന്ന് പബ്ലിക് ഹെൽത്ത് ഏജൻസി ഓഫ് കാനഡ അറിയിച്ചു. വയറിളക്കം പോലുള്ള ലക്ഷണങ്ങളുള്ള ഒരാളിൽ നിന്ന് വൃത്തിയില്ലാത്ത കൈകളിലൂടെ രോഗം പകരാം. രോഗലക്ഷണങ്ങളില്ലെങ്കിൽ പോലും രോഗം ബാധിച്ച് ദിവസങ്ങൾക്കോ ആഴ്ചകൾക്കോ ശേഷവും ഇത് പകരാനുള്ള സാധ്യതയുണ്ടെന്നും അവർ കൂട്ടിച്ചേർത്തു.
