ആൽബർട്ട: ആൽബർട്ടയിലെ 51,000 അധ്യാപകരെ പ്രതിനിധീകരിക്കുന്ന യൂണിയൻ ചൊവ്വാഴ്ച മുതൽ പ്രവിശ്യാ ഭരണകൂടവുമായി ചർച്ചകൾ പുനരാരംഭിക്കാൻ ആവശ്യപ്പെട്ടതായി അറിയിച്ചു. കഴിഞ്ഞ വെള്ളിയാഴ്ച മുതൽ നടന്നുവന്ന അനുബന്ധ ചർച്ചകളിലെ പുരോഗതിയുടെ അടിസ്ഥാനത്തിലാണ് പുതിയ നീക്കം. “കഴിഞ്ഞ വെള്ളിയാഴ്ച നടന്ന പ്രാഥമിക ചർച്ചകൾ, കൂടുതൽ സംഭാഷണങ്ങൾക്ക് വഴിയൊരുക്കാൻ സഹായിച്ചു,” യൂണിയൻ വ്യാഴാഴ്ച പുറത്തിറക്കിയ പ്രസ്താവനയിൽ വ്യക്തമാക്കി. നീണ്ട അവധിക്ക് ശേഷം പ്രവിശ്യാ ചർച്ചാ പ്രതിനിധി, ടീച്ചേഴ്സ് എംപ്ലോയർ ബാർഗെയ്നിംഗ് അസോസിയേഷൻ, ഒരു മധ്യസ്ഥൻ എന്നിവരുമായി ഔദ്യോഗിക ചർച്ചകൾ പുനരാരംഭിക്കാനാണ് യൂണിയൻ ലക്ഷ്യമിടുന്നത്.
ശമ്പളം, വർധിച്ചുവരുന്ന വിദ്യാർത്ഥികളുടെ എണ്ണം, ക്ലാസ് റൂമുകളിലെ സ്ഥലപരിമിതി തുടങ്ങിയ ദീർഘകാലമായുള്ള ആശങ്കകളെച്ചൊല്ലി പ്രധാനമന്ത്രി ഡാനിയേൽ സ്മിത്തിന്റെ സർക്കാരുമായുള്ള തർക്കമാണ് ഈ സമരത്തിന് കാരണം. കരാർ ചർച്ചകൾ പരാജയപ്പെട്ടതിനെത്തുടർന്ന് തിങ്കളാഴ്ചയാണ് അധ്യാപകർ ജോലിയിൽ നിന്ന് വിട്ടുനിന്നത്. പ്രവിശ്യയുടെ ചരിത്രത്തിലെ ഏറ്റവും വലിയ ഈ തൊഴിലാളി സമരം ഏകദേശം 7,50,000 വിദ്യാർത്ഥികളെയും 2,500 ഓളം സ്കൂളുകളേയുമാണ് ബാധിച്ചിരിക്കുന്നത്.
നാല് വർഷത്തിനുള്ളിൽ 12 ശതമാനം വേതന വർദ്ധനവും 3,000 അധിക അധ്യാപകരെ നിയമിക്കാനുള്ള വാഗ്ദാനവും ഉൾപ്പെടുന്നതായിരുന്നു സർക്കാർ മുന്നോട്ട് വെച്ച ഒടുവിലത്തെ വാഗ്ദാനം. എന്നാൽ, അധ്യാപകരുടെ വോട്ടെടുപ്പിൽ ഈ നിർദ്ദേശം തള്ളപ്പെടുകയായിരുന്നു. യൂണിയൻ ചർച്ചയ്ക്ക് സന്നദ്ധത അറിയിച്ചതോടെ, പ്രവിശ്യാ ഭരണകൂടവും അധ്യാപകരും തമ്മിലുള്ള തർക്കത്തിന് ഉടൻ പരിഹാരമാകുമെന്ന പ്രതീക്ഷയിലാണ് വിദ്യാർത്ഥികളും രക്ഷിതാക്കളും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Salary dispute heats up: Students, parents concerned over Alberta teachers' strike
