കനേഡിയൻ ഉപരോധം ലംഘിച്ച് റഷ്യയിലേക്ക് സാധനങ്ങൾ കയറ്റിയയച്ച കേസിൽ ടൊറന്റോയിലെ റഷ്യൻ പൗരൻ അന്റോൺ ട്രോഫിമോവിനെതിരെ കേസെടുത്ത് റോയൽ കനേഡിയൻ മൗണ്ടഡ് പോലീസ്. സംഭവത്തെത്തുടർന്ന്, RCMP അദ്ദേഹത്തിന്റെ കാനഡയിലെ ബന്ധങ്ങളെക്കുറിച്ച് അന്വേഷണം ആരംഭിച്ചു.
ട്രോഫിമോവ് (43) മെയ് 5-നാണ് അറസ്റ്റിലായത്. റഷ്യക്ക് ആയുധ നിർമ്മാണ സഹായം നൽകിയെന്നും അനധികൃതമായി പണം കൈവശം വെച്ചതുമായ കുറ്റങ്ങളാണ് ഇദ്ദേഹത്തിനെതിരെ ചുമത്തിയിരിക്കുന്നത്. 2022 ജൂലൈ മുതൽ ഡിസംബർ വരെയാണ് ഈ ലംഘനങ്ങൾ നടന്നതെന്നാണ് ആരോപണം. ട്രോഫിമോവ് ലോകത്തിൻ്റെ വിവിധ ഭാഗങ്ങളിൽ നിന്ന് ഇലക്ട്രോണിക് ഘടകങ്ങൾ ശേഖരിച്ച് ഏഷ്യ വഴി റഷ്യയിലേക്ക് അയച്ചതായാണ് വിവരം. യു.എസ്., യു.കെ. എന്നിവയുടെ ഉപരോധത്തിലുള്ള ഹോങ്കോങ് ആസ്ഥാനമായുള്ള ഏഷ്യ പസഫിക് ലിങ്ക്സ് ലിമിറ്റഡിൻ്റെ ഡയറക്ടറാണ് ഇദ്ദേഹം. യുക്രൈനിലെ റഷ്യൻ വ്യോമാക്രമണങ്ങളിൽ ഉപയോഗിക്കുന്ന ഓർലാൻ-10 ഡ്രോണുകൾക്ക് ആവശ്യമായ മൈക്രോ ഇലക്ട്രോണിക് ഭാഗങ്ങൾ ഈ കമ്പനി നൽകിയതായും ആരോപണമുണ്ട്.
അന്താരാഷ്ട്ര തുറമുഖങ്ങളും എഫ്.ബി.ഐ.യും മറ്റ് ആഗോള ഏജൻസികളും ഉൾപ്പെടെയുള്ള സഹകരണത്തോടെയാണ് ഈ അന്വേഷണം നടക്കുന്നത്. ട്രോഫിമോവിൻ്റെ വലിയ ശൃംഖലയെക്കുറിച്ച് ഇപ്പോഴും അന്വേഷണം തുടരുകയാണെന്ന് ആർ.സി.എം.പി. സ്ഥിരീകരിച്ചിട്ടുണ്ട്. എന്നാൽ, നിലവിലുള്ള അന്വേഷണങ്ങൾ കാരണം കൂടുതൽ വിവരങ്ങൾ പുറത്തുവിടാൻ അവർ വിസമ്മതിച്ചു. ട്രോഫിമോവ് കയറ്റുമതി ചെയ്ത പ്രത്യേക ഘടകങ്ങളെക്കുറിച്ചുള്ള വിവരങ്ങൾ ഇതുവരെ പരസ്യപ്പെടുത്തിയിട്ടില്ല. ഈ ഭാഗങ്ങൾ റഷ്യൻ യുദ്ധശ്രമങ്ങളിൽ നേരിട്ട് ഉപയോഗിച്ചതാണോ എന്നും വ്യക്തമല്ല. 2022-ൽ റഷ്യ യുക്രൈൻ ആക്രമിച്ചതിന് ശേഷം പുതുക്കിയ കാനഡയുടെ പ്രത്യേക സാമ്പത്തിക നടപടികൾ പ്രകാരമാണ് കേസെടുത്തിരിക്കുന്നത്. ഉപരോധങ്ങൾ നടപ്പിലാക്കുന്നതിലും റഷ്യൻ സൈനിക വിതരണ ശൃംഖലകളെ തടസ്സപ്പെടുത്തുന്നതിലും കാനഡയുടെ പങ്ക് ഈ കേസ് എടുത്തു കാണിക്കുന്നു.
