റഷ്യൻ എണ്ണ ഇറക്കുമതി കുറച്ചു; ഇന്ത്യയ്ക്കുമേലുള്ള നികുതി പകുതിയാക്കാൻ അമേരിക്ക തയ്യാറെന്ന് ട്രഷറി സെക്രട്ടറി

വാഷിംഗ്ടൺ: ഇന്ത്യയിൽ നിന്നുള്ള ഉൽപ്പന്നങ്ങൾക്ക് മേൽ ചുമത്തിയ 50 ശതമാനം ഇറക്കുമതി തീരുവയിൽ പകുതി പിൻവലിക്കാൻ അമേരിക്ക തയ്യാറെടുക്കുന്നതായി സൂചന. റഷ്യയിൽ നിന്നുള്ള ക്രൂഡ് ഓയിൽ വാങ്ങുന്നത് ഇന്ത്യ ഗണ്യമായി കുറച്ച സാഹചര്യത്തിലാണ് ട്രംപ് ഭരണകൂടത്തിന്റെ ഈ നീക്കമെന്ന് യുഎസ് ട്രഷറി സെക്രട്ടറി സ്കോട്ട് ബെസെന്റ് വ്യക്തമാക്കി. അമേരിക്കൻ വാർത്താ മാധ്യമങ്ങൾക്ക് നൽകിയ അഭിമുഖത്തിലാണ് ബെസെന്റ് നിർണ്ണായകമായ ഈ നയമാറ്റം വെളിപ്പെടുത്തിയത്.

വ്യാപാര അസന്തുലിതാവസ്ഥയും റഷ്യയുമായുള്ള ഊർജ്ജ ഇടപാടും മുൻനിർത്തി രണ്ട് ഘട്ടങ്ങളിലായാണ് ട്രംപ് ഭരണകൂടം ഇന്ത്യയ്ക്ക് മേൽ 50 ശതമാനം നികുതി ഏർപ്പെടുത്തിയത്. ഇതിൽ റഷ്യൻ എണ്ണ വാങ്ങുന്നതിനെതിരെയുള്ള ശിക്ഷാനടപടിയായി ചുമത്തിയ 25 ശതമാനം തീരുവ ഒഴിവാക്കാനാണ് ഇപ്പോൾ ആലോചന നടക്കുന്നത്. ഇന്ത്യയ്ക്കുമേൽ ചുമത്തിയ 25 ശതമാനം താരിഫ് വലിയ വിജയമാണെന്നും റഷ്യയിൽ നിന്നുള്ള എണ്ണ വാങ്ങൽ ഇന്ത്യ ഗണ്യമായി കുറച്ചെന്നും ബെസെന്റ് അവകാശപ്പെട്ടു.

കഴിഞ്ഞയാഴ്ച ദാവോസിൽ നടന്ന വേൾഡ് ഇക്കണോമിക് ഫോറത്തിനിടെയും ബെസെന്റ് സമാനമായ പരാമർശങ്ങൾ നടത്തിയിരുന്നു. ഉക്രെയ്ൻ അധിനിവേശത്തിന് ശേഷം പാശ്ചാത്യ രാജ്യങ്ങൾ മോസ്കോയ്ക്ക് മേൽ ഉപരോധം ഏർപ്പെടുത്തിയപ്പോൾ, ഇന്ത്യ ഡിസ്കൗണ്ട് നിരക്കിൽ റഷ്യൻ എണ്ണ വാങ്ങിയിരുന്നു. എന്നാൽ ട്രംപ് ഭരണകൂടത്തിന്റെ കടുത്ത നിലപാടുകളെത്തുടർന്ന് ഇന്ത്യയിലെ സ്വകാര്യ സ്ഥാപനങ്ങൾ റഷ്യൻ ഇറക്കുമതി കുറച്ചതായി റിപ്പോർട്ടുകളുണ്ട്. ഈ സാഹചര്യം നികുതി ലഘൂകരിക്കുന്നതിന് അനുകൂലമാണെന്ന് യുഎസ് വിലയിരുത്തുന്നു.

ഇന്ത്യയുമായി വലിയൊരു വ്യാപാര കരാറിൽ ഒപ്പുവെക്കാൻ അമേരിക്ക ആഗ്രഹിക്കുന്നുണ്ടെന്നും അദ്ദേഹം പറഞ്ഞു. അതേസമയം, ഇന്ത്യയിൽ നിന്നുള്ള ശുദ്ധീകരിച്ച ഊർജ്ജ ഉൽപ്പന്നങ്ങൾ വാങ്ങുന്ന യൂറോപ്യൻ രാജ്യങ്ങളുടെ നടപടിയെ അദ്ദേഹം വിമർശിച്ചു. മോസ്കോയിൽ സാമ്പത്തിക സമ്മർദ്ദം ശക്തമാക്കാൻ വാഷിംഗ്ടൺ ശ്രമിക്കുമ്പോൾ യൂറോപ്യൻ രാജ്യങ്ങൾ കാണിക്കുന്നത് മണ്ടത്തരമാണെന്നാണ് ബെസെന്റിന്റെ പക്ഷം. ഇന്ത്യയ്ക്കെതിരായ കടുത്ത വ്യാപാര നിലപാടുകളിൽ നിന്ന് ഭരണകൂടം അയയുന്നതിന്റെ സൂചനയായാണ് ഈ പരാമർശങ്ങൾ കാണുന്നത്.

അതേസമയം, യുഎസ് നടപടികളെ അന്യായമെന്നാണ് ഇന്ത്യ മുൻപ് വിശേഷിപ്പിച്ചത്. സ്വന്തം ദേശീയ താൽപ്പര്യമാണ് ഊർജ്ജ നയത്തെ നയിക്കുന്നതെന്ന് ന്യൂഡൽഹി ആവർത്തിച്ചിരുന്നു. എങ്കിലും, സമീപ മാസങ്ങളിൽ ന്യൂഡൽഹിയും വാഷിംഗ്ടണും തമ്മിൽ വിവിധ തലങ്ങളിൽ ചർച്ചകൾ നടക്കുന്നുണ്ട്. അമേരിക്കൻ നീക്കം യാഥാർത്ഥ്യമായാൽ ഇന്ത്യൻ കയറ്റുമതി മേഖലയ്ക്ക് അത് വലിയ ആശ്വാസമാകുകയും ഇരുരാജ്യങ്ങളും തമ്മിലുള്ള വ്യാപാര ബന്ധം കൂടുതൽ മെച്ചപ്പെടുകയും ചെയ്യും.

Russian oil imports reduced; US ready to halve tariffs on India, says Treasury Secretary

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82