റഷ്യയുടെ മുൻ ഗതാഗത മന്ത്രി റോമൻ സ്റ്റാറോവോയിറ്റിനെ മരിച്ച നിലയിൽ കണ്ടെത്തി. സ്വയം വെടിയുതിർത്താണ് ഇദ്ദേഹം മരിച്ചതെന്നാണ് റഷ്യയുടെ അന്വേഷണ സമിതി പറയുന്നത്. പ്രസിഡന്റ് വ്ളാഡിമിർ പുടിൻ ഇദ്ദേഹത്തെ മന്ത്രിസ്ഥാനത്ത് നിന്ന് നീക്കി മണിക്കൂറുകൾക്ക് ശേഷമാണ് ഈ വിവരം പുറത്തുവന്നത്. സ്റ്റാറോവോയിറ്റിനെ പുറത്താക്കിയതിന്റെ കാരണം പുടിൻ വ്യക്തമാക്കിയിട്ടില്ല. അദ്ദേഹത്തിന് പകരം ആൻഡ്രി നികിതിൻ പുതിയ ഗതാഗത മന്ത്രിയായി ചുമതലയേറ്റിരുന്നു.
സംഭവത്തെക്കുറിച്ച് കൂടുതൽ വിവരങ്ങൾ കണ്ടെത്താൻ അന്വേഷണ സമിതി ശ്രമിക്കുകയാണ്. 2024 മെയ് മാസത്തിലാണ് സ്റ്റാറോവോയിറ്റ് ഗതാഗത മന്ത്രിയായി ചുമതലയേറ്റത്. അതിന് മുൻപ് ഏകദേശം ആറ് വർഷത്തോളം അദ്ദേഹം കുർസ്ക് മേഖലയുടെ ഗവർണറായിരുന്നു. 2024 ഓഗസ്റ്റിൽ യുക്രൈൻ സൈന്യം ഒരു അപ്രതീക്ഷിത ആക്രമണത്തിലൂടെ കുർസ്ക് മേഖലയുടെ ചില ഭാഗങ്ങൾ പിടിച്ചെടുത്തിരുന്നു. ഈ അടുത്ത കാലത്താണ് റഷ്യൻ സേനയ്ക്ക് യുക്രൈൻ സൈന്യത്തെ അവിടെ നിന്ന് തുരത്താൻ കഴിഞ്ഞത്.
എന്നാൽ ജൂൺ അവസാനത്തിലും യുക്രൈൻ റഷ്യൻ അതിർത്തിക്കുള്ളിൽ ഒരു ചെറിയ പ്രദേശം കൈവശം വെച്ചിട്ടുണ്ടെന്ന് കൈവ് അറിയിച്ചിരുന്നു. സ്റ്റാറോവോയിറ്റിന്റെ പിൻഗാമിയായി വന്ന അലെക്സി സ്മിർനോവ് വളരെ കുറച്ചുകാലം മാത്രമേ ആ സ്ഥാനത്ത് ഉണ്ടായിരുന്നുള്ളൂ. യുക്രൈനുമായുള്ള അതിർത്തിയിൽ പ്രതിരോധ സംവിധാനങ്ങൾ നിർമ്മിക്കാൻ അനുവദിച്ച ഫണ്ടുകൾ വെട്ടിച്ചുവെന്ന കേസിൽ ഏപ്രിലിൽ അദ്ദേഹം അറസ്റ്റിലായി. റഷ്യൻ മാധ്യമമായ കോമേഴ്സാന്റ് റിപ്പോർട്ട് ചെയ്യുന്നത് അനുസരിച്ച്, ഇതേ കേസിൽ സ്റ്റാറോവോയിറ്റിനെയും പ്രതിചേർക്കാൻ സാധ്യതയുണ്ടായിരുന്നു.
സ്റ്റാറോവോയിറ്റ് എന്നായിരുന്നു മരിച്ചതെന്ന് വ്യക്തമല്ല. സ്റ്റേറ്റ് ഡ്യൂമ പ്രതിരോധ സമിതി തലവൻ ആൻഡ്രി കാർട്ടപോലോവ്, ആർടിവിഐ എന്ന റഷ്യൻ മാധ്യമത്തോട് പറഞ്ഞത്, സ്റ്റാറോവോയിറ്റിന്റെ മരണം “കുറച്ചുകാലം മുൻപ്” സംഭവിച്ചതാണെന്നാണ്. സ്റ്റാറോവോയിറ്റിന്റെ മരണം പ്രഖ്യാപിക്കുന്നതിന് മുൻപ്, പുടിന് സ്റ്റാറോവോയിറ്റിലുള്ള വിശ്വാസം നഷ്ടപ്പെട്ടതുകൊണ്ടാണോ കുർസ്കിലെ സംഭവങ്ങളിൽ മന്ത്രിയെ പുറത്താക്കിയതെന്ന് മാധ്യമപ്രവർത്തകർ ക്രെംലിൻ വക്താവ് ദിമിത്രി പെസ്കോവിനോട് ചോദിച്ചിരുന്നു. “വിശ്വാസം നഷ്ടപ്പെട്ടെങ്കിൽ ആ പദം ഉപയോഗിക്കുമായിരുന്നു. അങ്ങനെയൊരു വാക്ക് ഉത്തരവിൽ ഉപയോഗിച്ചിട്ടില്ല,” പെസ്കോവ് മറുപടി നൽകി.
