വാഷിങ്ടൺ: റഷ്യയും യുക്രെയ്നും തമ്മിലുള്ള നാല് വർഷം നീണ്ട യുദ്ധം അവസാനിപ്പിക്കാനായി ഈ വർഷം മാർച്ചോടെ സമാധാന കരാറിലെത്താൻ അമേരിക്കൻ മധ്യസ്ഥർ ലക്ഷ്യമിടുന്നു. യുഎസ് പ്രസിഡന്റ് ഡൊണാൾഡ് ട്രംപിന്റെ പ്രത്യേക പ്രതിനിധി സ്റ്റീവ് വിറ്റ്കോഫ്, ട്രംപിന്റെ മരുമകൻ ജാരെഡ് കുഷ്നർ എന്നിവരുടെ നേതൃത്വത്തിലാണ് ചർച്ചകൾ പുരോഗമിക്കുന്നത്. നവംബറിൽ നടക്കാനിരിക്കുന്ന അമേരിക്കൻ കോൺഗ്രസ് മിഡ്ടേം തിരഞ്ഞെടുപ്പിന് മുമ്പ് തന്നെ സമാധാന കരാർ പൂർത്തിയാക്കാൻ ട്രംപ് ഭരണകൂടം താൽപ്പര്യപ്പെടുന്നതായാണ് വിവരം.
അബുദാബിയിലും മയാമിയിലും നടന്ന ചർച്ചകളിൽ സമാധാന കരാറിന്റെ ഭാഗമായി യുക്രെയ്നിൽ ദേശീയ ഹിതപരിശോധനയും പൊതുതിരഞ്ഞെടുപ്പും നടത്തുന്നത് സംബന്ധിച്ച് പ്രാഥമിക ധാരണകളായതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. കരാറിലെ വ്യവസ്ഥകൾ യുക്രെയ്നിലെ ജനങ്ങൾ ഹിതപരിശോധനയിലൂടെ അംഗീകരിക്കണമെന്നാണ് അമേരിക്കൻ നിർദ്ദേശം. എന്നാൽ, നിലവിൽ യുക്രെയ്നിൽ തുടരുന്ന സൈനിക നിയമം തിരഞ്ഞെടുപ്പിന് തടസ്സമാണ്. സമ്പൂർണ്ണ വെടിനിർത്തൽ ഇല്ലാതെ വോട്ടെടുപ്പ് സാധ്യമല്ലെന്നും ആറ് മാസത്തെ തയ്യാറെടുപ്പുകൾ വേണമെന്നും യുക്രെയ്ൻ തിരഞ്ഞെടുപ്പ് അധികൃതർ വ്യക്തമാക്കിയിട്ടുണ്ട്.
അതിർത്തി തർക്കം തന്നെയാണ് സമാധാന കരാറിന് മുന്നിലെ പ്രധാന തടസ്സമായി തുടരുന്നത്. യുക്രെയ്നിലെ കിഴക്കൻ മേഖലയായ ഡോൺബാസ് പൂർണ്ണമായും വിട്ടുനൽകണമെന്നാണ് റഷ്യയുടെ ആവശ്യം. എന്നാൽ, നിലവിൽ ഉക്രെയ്ന്റെ കൈവശമുള്ള 2,000 ചതുരശ്ര മൈലിലധികം ഭൂമി വിട്ടുകൊടുക്കാൻ കഴിയില്ലെന്ന് കിയെവ് ആവർത്തിക്കുന്നു. കൂടാതെ, സപ്പോറീഷ്യ ആണവനിലയം രാജ്യാന്തര നിയന്ത്രണത്തിലാക്കണമെന്ന യുഎസ് നിർദ്ദേശം റഷ്യ തള്ളിക്കളഞ്ഞു. നിലയം തങ്ങൾക്ക് വിട്ടുനൽകിയാൽ യുക്രെയ്ന് കുറഞ്ഞ നിരക്കിൽ വൈദ്യുതി നൽകാമെന്നാണ് റഷ്യയുടെ വാഗ്ദാനം.
അബുദാബിയിൽ നടന്ന രണ്ടാം ഘട്ട ചർച്ചകൾക്ക് പിന്നാലെ 314 യുദ്ധത്തടവുകാരെ ഇരുരാജ്യങ്ങളും പരസ്പരം കൈമാറിയത് ചർച്ചകൾ ഗുണപരമായ ദിശയിലാണെന്നതിന്റെ സൂചനയായാണ് വിലയിരുത്തപ്പെടുന്നത്. 157 പേരെ വീതമാണ് ഇരുപക്ഷവും കൈമാറിയത്. ഉടൻ തന്നെ റഷ്യയെ കൂടി ഉൾപ്പെടുത്തി അമേരിക്കയിൽ ത്രികക്ഷി ചർച്ചകൾ നടന്നേക്കുമെന്ന് യുക്രെയ്ൻ പ്രസിഡന്റ് വോളോഡിമിർ സെലെൻസ്കി സൂചിപ്പിച്ചു. സമാധാന കരാർ നടപ്പിലായാൽ യുക്രെയ്നിന്റെ ഭാവി സുരക്ഷയ്ക്കായി നാറ്റോ മാതൃകയിലുള്ള സുരക്ഷാ ഉറപ്പുകൾ അമേരിക്ക നൽകണമെന്നാണ് യുക്രെയ്ന്റെ പ്രധാന ആവശ്യം.
അമേരിക്കയും പങ്കാളികളും കൃത്യമായ സുരക്ഷാ ഉറപ്പുകൾ നൽകിയാൽ മാത്രമേ കരാറിൽ ഒപ്പിടുകയുള്ളൂ എന്ന നിലപാടിലാണ് യുക്രെയ്ൻ. അതിർത്തി തർക്കങ്ങൾ പരിഹരിക്കപ്പെടാത്തതും റഷ്യയുടെ കടുത്ത നിലപാടുകളും കരാർ വൈകാൻ കാരണമായേക്കുമെന്ന് നയതന്ത്ര ഉദ്യോഗസ്ഥർ മുന്നറിയിപ്പ് നൽകുന്നുണ്ട്. എന്നിരുന്നാലും, വരും ആഴ്ചകളിൽ യുണൈറ്റഡ് സ്റ്റേറ്റ്സിൽ നടക്കാനിരിക്കുന്ന അടുത്ത റൗണ്ട് ചർച്ചകൾ യുദ്ധം അവസാനിപ്പിക്കുന്നതിൽ നിർണ്ണായകമാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
റഷ്യ-യുക്രെയ്ൻ യുദ്ധം അവസാനിക്കുന്നു? മാർച്ചിനുള്ളിൽ കരാർ ഒപ്പിടാൻ അമേരിക്ക
