ആഗോള സമ്പദ്വ്യവസ്ഥയുടെ ജീവനാഡിയായ ഹോർമുസ് കടലിടുക്കിലെ ഇറാൻ്റെ ഉപരോധം നീക്കാനുള്ള ഐക്യരാഷ്ട്രസഭാ സുരക്ഷാ സമിതിയുടെ പ്രമേയം റഷ്യയും ചൈനയും വീറ്റോ ചെയ്തു. അമേരിക്കയും ബഹ്റൈനും മുന്നോട്ട് വെച്ച പ്രമേയത്തെ റഷ്യയും ചൈനയും എതിർത്തതോടെ പശ്ചിമേഷ്യയിൽ യുദ്ധഭീതി ശക്തമായിരിക്കുകയാണ്. 15 അംഗ സമിതിയിൽ 11 രാജ്യങ്ങൾ പ്രമേയത്തെ അനുകൂലിച്ചപ്പോൾ പാകിസ്താനും കൊളംബിയയും വോട്ടെടുപ്പിൽ നിന്ന് വിട്ടുനിന്നു. ഇറാൻ വഴങ്ങിയില്ലെങ്കിൽ ഇന്ന് രാത്രി ഒരു വലിയ സംസ്കാരം തന്നെ ഇല്ലാതാകുമെന്ന യുഎസ് പ്രസിഡൻ്റ് ഡൊണാൾഡ് ട്രംപിൻ്റെ കടുത്ത ഭീഷണിക്ക് തൊട്ടുപിന്നാലെയായിരുന്നു വോട്ടെടുപ്പ് നടന്നത്.
അമേരിക്കയ്ക്കും ഇസ്രായേലിനും ഇറാനുമേൽ ഏകപക്ഷീയമായി ആക്രമണം നടത്താൻ ഈ പ്രമേയം വഴിതുറക്കുമെന്ന് റഷ്യൻ പ്രതിനിധി കുറ്റപ്പെടുത്തി. യുദ്ധത്തിൻ്റെ യഥാർത്ഥ കാരണം അമേരിക്കയാണെന്നും മേഖലയിലെ സമാധാനം തകർക്കുന്ന നീക്കങ്ങളിൽ നിന്ന് പിന്മാറണമെന്നുമാണ് ചൈനയുടെയും റഷ്യയുടെയും നിലപാട്. ലോകത്തെ എണ്ണക്കടത്തിൻ്റെ അഞ്ചിലൊന്ന് ഭാഗവും കടന്നുപോകുന്ന ഹോർമുസ് കടലിടുക്ക് ഇറാൻ അടച്ചതോടെ ആഗോളതലത്തിൽ ഇന്ധനവില കുതിച്ചുയരുകയാണ്. ഇത് തങ്ങളുടെ നിലനിൽപ്പിന് ഭീഷണിയാണെന്ന് ബഹ്റൈൻ ഉൾപ്പെടെയുള്ള ഗൾഫ് രാജ്യങ്ങൾ ചൂണ്ടിക്കാട്ടിയിട്ടുണ്ട്.
ഇറാൻ്റെ സാമ്പത്തിക ബ്ലാക്ക് മെയിലിംഗിന് ലോകം ഇരയാകുകയാണെന്ന് ബഹ്റൈൻ വിദേശകാര്യ മന്ത്രി തുറന്നടിച്ചു. എന്നാൽ തങ്ങളുടെ സ്വയം പ്രതിരോധത്തിനുള്ള അവകാശമാണ് കടലിടുക്കിലെ നിയന്ത്രണമെന്ന് ഇറാൻ യുഎന്നിൽ ആവർത്തിച്ചു. നിലവിൽ സമാധാന ശ്രമങ്ങൾ പരാജയപ്പെട്ടതോടെ, ട്രംപ് പ്രഖ്യാപിച്ച സമയപരിധിക്കുള്ളിൽ ഇറാൻ നിലപാട് മാറ്റിയില്ലെങ്കിൽ മിഡിൽ ഈസ്റ്റിൽ മറ്റൊരു വൻ യുദ്ധത്തിന് സാക്ഷ്യം വഹിക്കേണ്ടി വരുമോ എന്ന ആശങ്കയിലാണ് ലോകം.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Russia, China veto UN resolution aimed at reopening Strait of Hormuz
