അബുദാബി: അബുദാബിയിലുണ്ടായ വാഹനാപകടത്തിൽ ഒരു കുടുംബത്തിലെ മൂന്ന് കുട്ടികളടക്കം നാല് മലയാളികൾ മരിച്ചു. കോഴിക്കോട് സ്വദേശിയും ദുബായിലെ വ്യാപാരിയുമായ അബ്ദുൽ ലത്തീഫിന്റെ മക്കളായ അഷസ് (14), അമ്മാർ (12), അയാഷ് (5) എന്നിവരും ഇവരുടെ വീട്ടുജോലിക്കാരി മലപ്പുറം ചമ്രവട്ടം സ്വദേശി ബുഷറയുമാണ് മരിച്ചത്.
അബുദാബിയിൽ നിന്ന് മടങ്ങുന്നതിനിടെ ഇവർ സഞ്ചരിച്ചിരുന്ന നിസാൻ പട്രോൾ കാർ അപകടത്തിൽപ്പെടുകയായിരുന്നു. വാഹനത്തിലുണ്ടായിരുന്ന അബ്ദുൽ ലത്തീഫ്, ഭാര്യ, ഇദ്ദേഹത്തിന്റെ മാതാവ്, മകൾ എന്നിവർക്ക് അപകടത്തിൽ പരിക്കേറ്റു. ഇവരെ ഉടൻ തന്നെ അടുത്തുള്ള ആശുപത്രിയിൽ പ്രവേശിപ്പിച്ചു. നിലവിൽ ഇവർ ചികിത്സയിൽ തുടരുകയാണ്.
മരിച്ച കുട്ടികളുടെ പിതാവ് അബ്ദുൽ ലത്തീഫ് വർഷങ്ങളായി ദുബായിൽ ബിസിനസ് നടത്തിവരികയാണ്.
അവധി ദിവസങ്ങളിൽ അബുദാബി സന്ദർശനം കഴിഞ്ഞ് മടങ്ങുമ്പോഴാണ് അപകടം സംഭവിച്ചത്. അപകടത്തിന്റെ കൃത്യമായ കാരണം വ്യക്തമായിട്ടില്ല. വിവരമറിഞ്ഞ് പ്രവാസി മലയാളി സംഘടനകളും ബന്ധുക്കളും ആശുപത്രിയിലും പോലീസ് കേന്ദ്രങ്ങളിലും സഹായത്തിനായി എത്തിയിട്ടുണ്ട്. ഗൾഫ് മേഖലയിൽ കഴിഞ്ഞ ദിവസങ്ങളിലുണ്ടായ രണ്ടാമത്തെ വലിയ അപകടമാണിത്. ഇന്നലെ സൗദി അറേബ്യയിലെ മദീനയ്ക്ക് സമീപമുണ്ടായ മറ്റൊരു വാഹനാപകടത്തിൽ മലപ്പുറം മഞ്ചേരി സ്വദേശികളായ നാല് മലയാളികൾ മരിച്ചിരുന്നു. സന്ദർശന വിസയിൽ എത്തിയ കുടുംബം സഞ്ചരിച്ചിരുന്ന കാർ ലോറിയുമായി കൂട്ടിയിടിച്ചായിരുന്നു ആ അപകടം സംഭവിച്ചത്.
അബുദാബി അപകടത്തിൽ മരിച്ചവരുടെ മൃതദേഹങ്ങൾ നാട്ടിലെത്തിക്കുന്നതിനായുള്ള നടപടിക്രമങ്ങൾ പുരോഗമിക്കുകയാണ്. പരിക്കേറ്റ് ചികിത്സയിൽ കഴിയുന്നവരുടെ ആരോഗ്യനില സംബന്ധിച്ച് കൂടുതൽ വിവരങ്ങൾ ലഭ്യമായിട്ടില്ല. മരിച്ച ബുഷറയുടെ കുടുംബത്തെയും വിവരമറിയിച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Road accident in Abu Dhabi: Four Malayalis, including three children, die tragically; The deceased are natives of Kozhikode and Malappuram
