ലോകം കാത്തിരിക്കുന്ന 2026-ലെ ആദ്യ സൂര്യഗ്രഹണം ഫെബ്രുവരി 17 ചൊവ്വാഴ്ച ദൃശ്യമാകും. ചന്ദ്രൻ സൂര്യനും ഭൂമിക്കും ഇടയിൽ വരുമ്പോൾ സൂര്യന്റെ മധ്യഭാഗം മറയ്ക്കപ്പെടുകയും വശങ്ങൾ തിളങ്ങുന്ന സ്വർണ്ണവളയം പോലെ കാണപ്പെടുകയും ചെയ്യുന്ന ‘വലയ സൂര്യഗ്രഹണം’ അഥവാ ‘അഗ്നിവളയം’ (Ring of Fire) ആണ് ഇത്തവണത്തെ പ്രത്യേകത. ഭൂമിയിൽ നിന്ന് ചന്ദ്രൻ കൂടുതൽ അകലെയായിരിക്കുന്നതിനാൽ സൂര്യനെ പൂർണ്ണമായി മറയ്ക്കാൻ ചന്ദ്രന് സാധിക്കാത്തതാണ് ഇത്തരമൊരു പ്രതിഭാസത്തിന് കാരണമാകുന്നത്. ശാസ്ത്രലോകവും വാനനിരീക്ഷണ കൗതുകികളും ഏറെ ആകാംക്ഷയോടെയാണ് ഈ അപൂർവ്വ നിമിഷത്തിനായി കാത്തിരിക്കുന്നത്.
കാണാൻ കഴിയുന്ന സ്ഥലങ്ങൾ
മനുഷ്യവാസം കുറഞ്ഞ അന്റാർട്ടിക്കയിലെ ഗവേഷണ കേന്ദ്രങ്ങളിലും പരിസരങ്ങളിലും മാത്രമാണ് ഇത്തവണ പൂർണ്ണമായ വലയഗ്രഹണം ദൃശ്യമാകുക. “അന്റാർട്ടിക്കയിലെ പെൻഗ്വിനുകൾക്ക് ഇതൊരു ഗംഭീര കാഴ്ചയായിരിക്കും,” എന്ന് ലോവൽ ഒബ്സർവേറ്ററിയിലെ പ്രശസ്ത ജ്യോതിശാസ്ത്രജ്ഞൻ ജോ ലാമ അഭിപ്രായപ്പെട്ടു. അന്റാർട്ടിക്കയിൽ അഗ്നിവളയം തെളിയുമ്പോൾ ദക്ഷിണാഫ്രിക്ക, ചിലി, അർജന്റീന, മഡഗാസ്കർ തുടങ്ങിയ രാജ്യങ്ങളുടെ തെക്കൻ ഭാഗങ്ങളിൽ ഭാഗിക സൂര്യഗ്രഹണം അനുഭവപ്പെടും. ഇന്ത്യയിൽ ഈ ഗ്രഹണം ദൃശ്യമാകില്ലെങ്കിലും അന്താരാഷ്ട്ര ഏജൻസികൾ വഴി തത്സമയ സംപ്രേക്ഷണം ലഭ്യമാകും.
സുരക്ഷാ നിർദ്ദേശങ്ങൾ
സൂര്യഗ്രഹണം നേരിട്ട് നോക്കുന്നത് കണ്ണിന്റെ കാഴ്ചയെ ഗുരുതരമായി ബാധിക്കുമെന്ന് വിദഗ്ധർ മുന്നറിയിപ്പ് നൽകുന്നു. അതിനാൽ ഐഎസ്ഒ (ISO 12312-2) അംഗീകൃത എക്ലിപ്സ് ഗ്ലാസുകൾ ഉപയോഗിച്ച് മാത്രമേ ഗ്രഹണം വീക്ഷിക്കാവൂ. സാധാരണ സൺഗ്ലാസുകളോ ബൈനോക്കുലറോ ടെലസ്കോപ്പോ ഇതിനായി ഉപയോഗിക്കുന്നത് സുരക്ഷിതമല്ല. ഫെബ്രുവരിയിലെ ഈ ഗ്രഹണത്തിന് ശേഷം, 2026 ഓഗസ്റ്റ് 12-നാണ് അടുത്ത സമ്പൂർണ്ണ സൂര്യഗ്രഹണം നടക്കുക. അത് ഐസ്ലാന്റ്, സ്പെയിൻ, പോർച്ചുഗൽ തുടങ്ങിയ രാജ്യങ്ങളിൽ ദൃശ്യമാകും.
ring-of-fire-in-the-sky-first-solar-eclipse-of-2026-in-antarctica
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
