നിത്യജീവിതത്തിലെ നിസ്സാരമെന്ന് കരുതുന്ന ചെലവുകൾ വ്യക്തികളുടെ ദീർഘകാല സാമ്പത്തിക ഭദ്രതയ്ക്ക് വലിയ ഭീഷണിയാകുന്നതായി സാമ്പത്തിക വിദഗ്ധരുടെ വിലയിരുത്തൽ. ദിവസേന അനാവശ്യമായി ചെലവാക്കുന്ന 500 രൂപ പോലും മാസാവസാനം വലിയൊരു തുകയായി മാറുന്നുണ്ടെന്നും, ഇത് ശരിയായ രീതിയിൽ നിക്ഷേപിച്ചാൽ കോടികളുടെ സമ്പാദ്യമുണ്ടാക്കാൻ സാധിക്കുമെന്നും കണക്കുകൾ വ്യക്തമാക്കുന്നു. പലപ്പോഴും ചില്ലറച്ചെലവുകൾ ആയതിനാൽ ഇതിന്റെ ഗൗരവം സാധാരണക്കാർ തിരിച്ചറിയുന്നില്ല എന്നതാണ് പ്രധാന വെല്ലുവിളി.
ദിവസേനയുള്ള ചെറിയ പർച്ചേസുകൾ, ഓൺലൈൻ ഭക്ഷണ വിതരണം, അനാവശ്യ ടാക്സി യാത്രകൾ എന്നിവയിലൂടെയാണ് ഭൂരിഭാഗം ആളുകളുടെയും പണം നഷ്ടമാകുന്നത്. പ്രതിദിനം 500 രൂപ എന്ന കണക്കിൽ ഒരാൾ ചെലവാക്കിയാൽ മാസത്തിൽ 15,000 രൂപയും വർഷത്തിൽ 1.8 ലക്ഷം രൂപയുമാണ് നഷ്ടപ്പെടുന്നത്. വലിയ നിക്ഷേപങ്ങൾക്കോ ഇഎംഐകൾക്കോ മുൻപ് പലവട്ടം ആലോചിക്കുന്നവർ പോലും ഇത്തരം ദൈനംദിന ചെലവുകളെ ഗൗരവമായി കാണുന്നില്ലെന്ന് പഠനങ്ങൾ ചൂണ്ടിക്കാട്ടുന്നു.
ദിവസേന പാഴാക്കുന്ന ഈ 500 രൂപ കൃത്യമായ നിക്ഷേപ പദ്ധതികളിൽ വിനിയോഗിച്ചാൽ ലഭിക്കുന്ന നേട്ടം അതിശയിപ്പിക്കുന്നതാണ്. ഉദാഹരണത്തിന്, പ്രതിമാസം 15,000 രൂപ ശരാശരി 12 ശതമാനം ആദായം ലഭിക്കുന്ന ഒരു മ്യൂച്വൽ ഫണ്ട് നിക്ഷേപത്തിൽ 25 വർഷത്തേക്ക് മാറ്റിവെച്ചാൽ കാലാവധി പൂർത്തിയാകുമ്പോൾ 2.8 കോടി രൂപയിലധികം സ്വന്തമാക്കാൻ സാധിക്കും. വരുമാനം വർദ്ധിക്കുന്നതിനനുസരിച്ച് ജീവിതശൈലിയിലെ ചെലവുകൾ അറിയാതെ വർദ്ധിക്കുന്നതും ഭാവിയിലെ റിട്ടയർമെന്റ് സമ്പാദ്യത്തെ പ്രതികൂലമായി ബാധിക്കുന്നുണ്ട്.
സാമ്പത്തിക അച്ചടക്കമില്ലായ്മ വർഷങ്ങൾക്ക് ശേഷമായിരിക്കും വലിയ പ്രതിസന്ധികൾ സൃഷ്ടിക്കുക. വലിയ സാമ്പത്തിക ആവശ്യങ്ങൾ വരുമ്പോഴോ ജോലിയിൽ നിന്ന് വിരമിക്കുമ്പോഴോ മാത്രമാണ് സമ്പാദ്യത്തിലെ കുറവ് പലരും തിരിച്ചറിയുന്നത്. അപ്പോഴേക്കും അമിതച്ചെലവ് ജീവിതശൈലിയുടെ ഭാഗമായി മാറിയിട്ടുണ്ടാകും. അതിനാൽ, ദൈനംദിന ചെലവുകളെ മാസക്കണക്കിൽ കണ്ട് നിയന്ത്രിക്കുകയും ചെറിയ തുകകൾ പോലും നിക്ഷേപമായി മാറ്റുകയും ചെയ്യുന്ന ശീലം വളർത്തിയെടുക്കണമെന്ന് വിദഗ്ധർ നിർദ്ദേശിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
'Retail expenses' a threat to financial security; If you proceed with caution, you can earn crores
