തിരുവനന്തപുരം: രാജ്യത്ത് നിലവിൽ പ്രചാരത്തിലുള്ള 100, 500 രൂപ നോട്ടുകളിൽ പുതിയ സുരക്ഷാ ഫീച്ചറുകൾ ഉൾപ്പെടുത്താൻ ഒരുങ്ങുകയാണ് റിസർവ് ബാങ്ക് ഓഫ് ഇന്ത്യ. കള്ളനോട്ടുകൾ തടയുന്നതിനും പേപ്പറിന്റെ ഗുണമേന്മ വർദ്ധിപ്പിക്കുന്നതിനുമായി സാങ്കേതികമായ മാറ്റങ്ങൾ വരുത്താനാണ് കേന്ദ്ര ബാങ്ക് തീരുമാനിച്ചിരിക്കുന്നത്. നിലവിലുള്ള നോട്ടുകൾ അസാധുവാകില്ലെന്നും പുതിയ പരിഷ്കാരങ്ങൾ സാധാരണക്കാർക്ക് നോട്ടുകൾ എളുപ്പത്തിൽ തിരിച്ചറിയാൻ സഹായിക്കുമെന്നും ബാങ്കിംഗ് വൃത്തങ്ങൾ അറിയിച്ചു.
നോട്ടുകളുടെ അടിസ്ഥാന ഡിസൈനിൽ മാറ്റം വരുത്താതെ അച്ചടിയുടെ വ്യക്തതയും പേപ്പറിന്റെ ഗുണമേന്മയും വർദ്ധിപ്പിക്കാനാണ് ആർബിഐ ലക്ഷ്യമിടുന്നത്. 100 രൂപ നോട്ടുകൾ വേഗത്തിൽ നശിച്ചുപോകുന്നത് ഒഴിവാക്കാൻ കൂടുതൽ ഈടുനിൽക്കുന്ന പേപ്പറും മഷിയുമാകും ഇനി ഉപയോഗിക്കും. വാട്ടർമാർക്ക്, സുരക്ഷാ നാട എന്നിവ കൂടുതൽ വ്യക്തമാക്കുന്നതിലൂടെ ഗ്രാമീണ മേഖലയിലുള്ളവർക്കും കള്ളനോട്ടുകൾ വേഗത്തിൽ തിരിച്ചറിയാൻ സാധിക്കും. ഉയർന്ന മൂല്യമുള്ള 500 രൂപ നോട്ടുകളിൽ മൈക്രോ പ്രിന്റിംഗ് ഉൾപ്പെടെയുള്ള അത്യാധുനിക സുരക്ഷാ സംവിധാനങ്ങളാണ് ഏർപ്പെടുത്തുന്നത്.
പുതിയ മാറ്റങ്ങൾ നിലവിൽ വരുന്നതോടെ പഴയ നോട്ടുകൾ പിൻവലിക്കുമെന്ന ആശങ്ക വേണ്ടെന്ന് അധികൃതർ വ്യക്തമാക്കി. കൈവശമുള്ള പഴയ നോട്ടുകൾ തുടർന്നും വിപണിയിലും എടിഎമ്മുകളിലും ബാങ്കുകളിലും തടസ്സമില്ലാതെ ഉപയോഗിക്കാം. ഘട്ടംഘട്ടമായി പുതിയ നോട്ടുകൾ പുറത്തിറക്കാനാണ് ആർബിഐ പദ്ധതിയിടുന്നത്. ഡിജിറ്റൽ ഇടപാടുകൾ വർദ്ധിച്ചിട്ടുണ്ടെങ്കിലും സാധാരണക്കാരുടെ ദൈനംദിന ആവശ്യങ്ങൾക്കായി പണമിടപാടുകൾ സുരക്ഷിതമാക്കുക എന്ന ലക്ഷ്യത്തോടെയാണ് ഈ നടപടി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Reserve Bank of India introduces new security features in Rs 100 and Rs 500 notes
