എഡ്മന്റൺ; എഡ്മന്റണിൽ നിന്ന് കാണാതായ കൗമാരക്കാരൻ സാമുവൽ ബേർഡിന്റെ മൃതദേഹം കണ്ടെത്തി. സംഭവത്തിൽ
38 വയസ്സുകാരനായ ബ്രയാൻ ഫാരലിനെതിരെ കൊലക്കുറ്റം ചുമത്തി അറസ്റ്റ് ചെയ്തു. കൊലപാതകം, മൃതദേഹത്തെ അപമാനിക്കൽ ഉൾപ്പെടെ 15-ഓളം കുറ്റങ്ങൾ ഇയാൾക്കെതിരെ ചുമത്തിയിട്ടുണ്ട്. ഗുരുതരമായി ആക്രമിക്കൽ, തീവെപ്പ്, അനധികൃതമായി ആയുധം കൈവശം വെക്കൽ, പോലീസ് ഉദ്യോഗസ്ഥരെ ആക്രമിക്കൽ, ഭീഷണിപ്പെടുത്തൽ തുടങ്ങിയ കുറ്റങ്ങളും ഇതിൽ ഉൾപ്പെടുന്നു. ഒക്ടോബർ 20-ന് ഇയാളുടെ ജാമ്യാപേക്ഷ പരിഗണിക്കും.
ജൂൺ 1-ന് വെസ്റ്റ് എഡ്മന്റണിൽ വെച്ച് കാണാതായ ബേർഡിന്റെ മൃതദേഹാവശിഷ്ടങ്ങൾ വ്യാഴാഴ്ച എഡ്മന്റണിന് പുറത്തുള്ള വനപ്രദേശത്ത് നിന്നാണ് കണ്ടെത്തിയത്. “നീണ്ട അന്വേഷണത്തിനൊടുവിൽ ഈ കേസ് പൂർത്തിയാക്കാൻ കഴിഞ്ഞതിൽ ഞങ്ങൾക്ക് സന്തോഷമുണ്ട്. കഴിഞ്ഞ നാല് മാസമായി മകനെ തിരഞ്ഞ കുടുംബത്തിന് ഇതിലൂടെ നീതി ലഭിക്കുമെന്ന് പ്രതീക്ഷിക്കുന്നു,” എഡ്മന്റൺ പോലീസ് സർവീസ് (ഇ.പി.എസ്.) ഹോമിസൈഡ് വിഭാഗത്തിലെ ഡിറ്റക്ടീവ് ജാരെഡ് ബൂഹ്ലർ പറഞ്ഞു.
മകനെ കണ്ടെത്താൻ സഹായിച്ച എല്ലാവർക്കും നന്ദി അറിയിച്ചുകൊണ്ട് ബേർഡിന്റെ അമ്മ അലന്ന സോഷ്യൽ മീഡിയയിൽ പോസ്റ്റിട്ടു. “സഹായിച്ച എല്ലാവർക്കും നന്ദി പറയുന്നു. നിങ്ങളുടെ സഹായമില്ലായിരുന്നെങ്കിൽ ഈ തിരച്ചിൽ തുടരാൻ ഞങ്ങൾക്ക് കഴിയില്ലായിരുന്നു,” അവർ കുറിച്ചു.
സെപ്റ്റംബർ 18-ന് ബേർഡിനെ അവസാനമായി കണ്ട വീട്ടിൽ പോലീസ് റെയ്ഡ് നടത്തിയിരുന്നു. സെപ്റ്റംബർ 29-ന് ഇതേ വീട്ടിൽ തീപിടിത്തമുണ്ടായി. ഒക്ടോബർ 1-ന് ബേർഡ് മരിച്ചതായി കരുതുന്നുവെന്നും മരണം കൊലപാതകമായി കണക്കാക്കി അന്വേഷണം നടത്തുമെന്നും പോലീസ് അറിയിച്ചിരുന്നു.
അറസ്റ്റിലായ ബ്രയാൻ ഫാരലിന് മുൻപും ആക്രമണങ്ങൾ, ആയുധങ്ങൾ കൈവശം വെക്കൽ ഉൾപ്പെടെയുള്ള ക്രിമിനൽ പശ്ചാത്തലമുണ്ട്. നിലവിൽ ഈ കേസിലെ കുറ്റങ്ങൾ ഒന്നും കോടതിയിൽ തെളിയിക്കപ്പെട്ടിട്ടില്ല.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Remains of missing teen Samuel Bird found, man charged with murder
