ദില്ലി: ഇറാൻ പിടിച്ചെടുത്ത ‘എംടി വാലിയൻ്റ് റോർ’ (MT Valiant Roar) എന്ന കപ്പലിലെ 16 ഇന്ത്യൻ നാവികരുടെ മോചനത്തിനായി കേന്ദ്ര വിദേശകാര്യ മന്ത്രാലയം ഇടപെടൽ ശക്തമാക്കി. നടപടികൾ വേഗത്തിൽ പൂർത്തിയാക്കി ജീവനക്കാരെ വിട്ടയക്കണമെന്ന് ഇന്ത്യ ഇറാനോട് ഔദ്യോഗികമായി ആവശ്യപ്പെട്ടു. കപ്പലിലെ ജീവനക്കാരെ നേരിൽ കാണാനും അവരുടെ ക്ഷേമം ഉറപ്പുവരുത്താനുമായി അടിയന്തര നയതന്ത്ര അനുമതി നൽകണമെന്നും വിദേശകാര്യ മന്ത്രാലയം ഇറാന്റെ മേൽ സമ്മർദ്ദം ചെലുത്തുന്നുണ്ട്.
കഴിഞ്ഞ ഡിസംബർ 8-നാണ് അന്താരാഷ്ട്ര അതിർത്തിയിൽ വെച്ച് യുഎഇ കമ്പനിയുടെ ഉടമസ്ഥതയിലുള്ള ഈ കപ്പൽ ഇറാൻ സേന കസ്റ്റഡിയിലെടുത്തത്. 6000 മെട്രിക് ടൺ ഇന്ധനം മോഷ്ടിച്ചു കടത്തി എന്ന ഗുരുതരമായ ആരോപണമാണ് ഇറാൻ ഉന്നയിക്കുന്നത്. കപ്പലിലെ ആകെ 18 ജീവനക്കാരിൽ 16 പേരും ഇന്ത്യക്കാരാണ്; മറ്റ് രണ്ട് പേർ ബംഗ്ലാദേശ്, ശ്രീലങ്ക എന്നീ രാജ്യങ്ങളിൽ നിന്നുള്ളവരാണ്. തടവിലായ ജീവനക്കാരുടെ കുടുംബങ്ങൾ പ്രധാനമന്ത്രി നരേന്ദ്ര മോദിക്ക് കത്തയച്ചതോടെയാണ് വിഷയം കൂടുതൽ ഗൗരവമായത്.
കപ്പലിൽ അവശ്യവസ്തുക്കളുടെ ക്ഷാമം നേരിട്ടതിനെത്തുടർന്ന് ഇന്ത്യ നേരത്തെ തന്നെ ആശങ്ക അറിയിച്ചിരുന്നു. ഇതിന്റെ അടിസ്ഥാനത്തിൽ ബന്ദർ അബ്ബാസിലെ ഇന്ത്യൻ കോൺസുലേറ്റ് കപ്പലുടമകളുമായും ഇറാനിലെ ഏജന്റുമാരുമായും ബന്ധപ്പെട്ട് ഭക്ഷണവും വെള്ളവും ഇന്ധനവും കപ്പലിലേക്ക് എത്തിക്കാൻ നടപടി സ്വീകരിച്ചിട്ടുണ്ട്. നിലവിൽ ഇറാനിലെ ആഭ്യന്തര സാഹചര്യങ്ങൾ കലുഷിതമായത് ജീവനക്കാരുടെ സുരക്ഷയെക്കുറിച്ച് ആശങ്ക വർധിപ്പിക്കുന്നതായും വിദേശകാര്യ മന്ത്രാലയം ചൂണ്ടിക്കാട്ടുന്നു.
ഡിസംബർ പകുതിയോടെയാണ് കപ്പൽ തടഞ്ഞുവെച്ച വിവരം ഇറാൻ ഔദ്യോഗികമായി ഇന്ത്യയെ അറിയിച്ചത്. ഡിസംബർ 14 മുതൽ നയതന്ത്ര ഉദ്യോഗസ്ഥർക്ക് ജീവനക്കാരുമായി സംസാരിക്കാൻ അനുമതി തേടി നിരവധി തവണ കത്തുകൾ നൽകിയിട്ടും ഇറാൻ അനുകൂലമായി പ്രതികരിച്ചിട്ടില്ല. ജീവനക്കാർക്ക് ഇന്ത്യയിലുള്ള തങ്ങളുടെ കുടുംബങ്ങളുമായി സംസാരിക്കാൻ അവസരം നൽകണമെന്ന ആവശ്യത്തിലും ഇന്ത്യ ഉറച്ചുനിൽക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Release of Indians on ship seized by Iran: Ministry of External Affairs steps up intervention
