ഹാലിഫാക്സ്: നോവ സ്കോഷ്യയിലുള്ള സേബിൾ ദ്വീപിന് സമീപം ശാസ്ത്രലോകത്തിന് ഇതുവരെ അറിയപ്പെടാത്ത പുതിയ ഇനം മത്സ്യത്തെ കണ്ടെത്തി ഗവേഷകർ. പുതിയതായി കണ്ടെത്തിയ ഈ കൊച്ചു മത്സ്യത്തിന് ശാസ്ത്രജ്ഞർ ‘പ്സെഡ്നോസ് ഗുള്ളിയെൻസിസ്’ (Psednos gulliensis) എന്നാണ് പേരിട്ടിരിക്കുന്നത്. ഈ മത്സ്യം കാണപ്പെട്ടത് ‘ഗുള്ളി മറൈൻ പ്രൊട്ടക്റ്റഡ് ഏരിയ’ എന്ന സമുദ്ര സംരക്ഷണ മേഖലയിൽ വെച്ചാണ്. ആ സ്ഥലത്തോടുള്ള ബഹുമാനസൂചകമായാണ് ആ പേര് തന്നെ മത്സ്യത്തിനും നൽകിയത്. ബെഡ്ഫോർഡ് ഇൻസ്റ്റിറ്റ്യൂട്ട് ഓഫ് ഓഷ്യനോഗ്രഫിയിലെ ഗവേഷകരാണ് ഈ കണ്ടെത്തലിന് പിന്നിൽ.
2010-ൽ പടിഞ്ഞാറൻ ഉത്തര അറ്റ്ലാന്റിക്കിലെ ഏറ്റവും വലിയ സമുദ്ര കന്യോണായ ഗുള്ളിയിൽ നടത്തിയ ശാസ്ത്രീയ സർവേയ്ക്കിടെയാണ് ഈ മത്സ്യത്തെ ആദ്യമായി ശേഖരിച്ചത്. അന്ന് ലാബിൽ സൂക്ഷിച്ചിരുന്ന സാമ്പിൾ പിന്നീട് കാണാതായെങ്കിലും, 2024-ൽ മറ്റൊരു പഠനത്തിനിടെ ഗവേഷകർ ഇത് വീണ്ടും കണ്ടെത്തുകയായിരുന്നു. തുടർന്ന് നടത്തിയ വിദഗ്ധ പരിശോധനയിലാണ് ഇത് ലോകത്ത് ഇതുവരെ രേഖപ്പെടുത്താത്ത പുതിയ സ്പീഷീസാണെന്ന് സ്ഥിരീകരിച്ചത്. ഇതോടെ പ്സെഡ്നോസ് വിഭാഗത്തിൽപ്പെട്ട മത്സ്യങ്ങളുടെ എണ്ണം 36 ആയി ഉയർന്നു.
ഏകദേശം നാല് സെന്റീമീറ്റർ മാത്രം നീളമുള്ള ഈ മത്സ്യത്തിന് പിങ്ക് നിറത്തിലുള്ള ശരീരവും കടും നിറത്തിലുള്ള വലിയ തലയുമാണുള്ളത്. സമുദ്രോപരിതലത്തിൽ നിന്ന് 200 മുതൽ 1,000 മീറ്റർ വരെ ആഴമുള്ള മേഖലയിലാണ് ഇവ ജീവിക്കുന്നത്. ആഴക്കടലിലെ പരിമിതമായ ഭക്ഷണസാഹചര്യങ്ങളോട് പൊരുത്തപ്പെടാൻ സഹായിക്കുന്ന വലിയ വായയും വയറുമാണ് ഇവയുടെ പ്രത്യേകതയെന്ന് ഗവേഷണ ശാസ്ത്രജ്ഞനായ ട്രെവർ കെൻചിങ്ടൺ പറഞ്ഞു. ഇരയെ പെട്ടെന്ന് വിഴുങ്ങാനും ദീർഘനേരം ദഹിപ്പിക്കാനും സഹായിക്കുന്ന ശരീരഘടനയാണിത്.
അറ്റ്ലാന്റിക് കാനഡയിലെ ഏറ്റവും പഴയ സംരക്ഷിത സമുദ്രമേഖലയായ ഗുള്ളിയോടുള്ള ആദരസൂചകമായാണ് പുതിയ മത്സ്യത്തിന് ഈ പേര് നൽകിയതെന്ന് ഗവേഷകർ വ്യക്തമാക്കി. 2004-ൽ സംരക്ഷിത മേഖലയായി പ്രഖ്യാപിക്കപ്പെട്ട ഈ പ്രദേശം സമുദ്ര ജൈവവൈവിധ്യത്തിന് ഏറെ പ്രാധാന്യമുള്ളതാണ്. സമുദ്ര പരിസ്ഥിതിയെ കൂടുതൽ ആഴത്തിൽ മനസ്സിലാക്കാനും സംരക്ഷിക്കാനും ഇത്തരം പുതിയ കണ്ടെത്തലുകൾ സഹായിക്കുമെന്ന് ട്രെവർ കെൻചിങ്ടൺ കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Rare fish found off the coast of Nova Scotia; Scientists make new discovery
