ഇന്ത്യയുടെ ഭരണഘടനയെ മാറ്റി മനുസ്മൃതി സ്ഥാപിക്കാനാണ് ആർഎസ്എസ് ശ്രമിക്കുന്നതെന്ന് കോൺഗ്രസ് നേതാവ് രാഹുൽ ഗാന്ധി. ജാതി അധിഷ്ഠിതവും പിതൃമേധാവിത്വപരവുമായ നിയമങ്ങളുള്ള പുരാതന ഹിന്ദു ഗ്രന്ഥമാണ് മനുസ്മൃതി. ഭരണഘടനയുടെ ആമുഖത്തിൽ ‘സോഷ്യലിസ്റ്റ്’, ‘സെക്കുലർ’ എന്നീ വാക്കുകൾ നിലനിർത്തേണ്ടതുണ്ടോയെന്ന ആർഎസ്എസ് ജനറൽ സെക്രട്ടറി ദത്താത്രേയ ഹൊസബലെയുടെ പ്രസ്താവനയ്ക്ക് പിന്നാലെയാണ് രാഹുൽ ഗാന്ധി രൂക്ഷ വിമർശനവുമായി രംഗത്തെത്തിയത്.
1976-ൽ അടിയന്തരാവസ്ഥക്കാലത്ത് ഭരണഘടനയിൽ കൂട്ടിച്ചേർത്ത ഈ വാക്കുകൾ അന്നത്തെ സാഹചര്യത്തിൽ അടിസ്ഥാനപരമായ അവകാശങ്ങൾ റദ്ദാക്കുകയും ജനാധിപത്യ സ്ഥാപനങ്ങൾ ദുർബലപ്പെടുത്തുകയും ചെയ്ത സമയത്ത് ഉൾപ്പെടുത്തിയതാണെന്നും ഹൊസബലെ പറഞ്ഞിരുന്നു. “ആർഎസ്എസിന്റെ മുഖംമൂടി വീണ്ടും അഴിഞ്ഞുവീണു. ഭരണഘടന തുല്യതയും മതേതരത്വവും നീതിയും സംസാരിക്കുന്നതുകൊണ്ടാണ് അവരെ അലോസരപ്പെടുത്തുന്നതെന്നും രാഹുൽ ഗാന്ധി പറഞ്ഞു.
ആർഎസ്എസിനും ബിജെപിക്കും ഭരണഘടന വേണ്ട, അവർക്ക് വേണ്ടത് മനുസ്മൃതിയാണ്. പാർശ്വവൽക്കരിക്കപ്പെട്ടവരുടെയും ദരിദ്രരുടെയും അവകാശങ്ങൾ കവർന്നെടുത്ത് അവരെ വീണ്ടും അടിമകളാക്കുക എന്നതാണ് അവരുടെ ലക്ഷ്യമെന്ന് രാഹുൽ ഗാന്ധി ആരോപിച്ചു. ഈ സ്വപ്നം കാണുന്നത് ആർഎസ്എസ് നിർത്തണമെന്നും, അത് ഒരിക്കലും വിജയിക്കാൻ തങ്ങൾ അനുവദിക്കില്ലെന്നും, ഓരോ രാജ്യസ്നേഹിയായ ഇന്ത്യക്കാരനും തങ്ങളുടെ അവസാന ശ്വാസം വരെ ഭരണഘടനയെ സംരക്ഷിക്കുമെന്നും അദ്ദേഹം കൂട്ടിച്ചേർത്തു.
1950-ൽ അംഗീകരിച്ച യഥാർത്ഥ ഭരണഘടനയുടെ ആമുഖത്തിൽ ‘സോഷ്യലിസ്റ്റ്’, ‘സെക്കുലർ’ എന്നീ വാക്കുകൾ ഉണ്ടായിരുന്നില്ല. പ്രധാനമന്ത്രി ഇന്ദിരാഗാന്ധിയുടെ അടിയന്തരാവസ്ഥാ ഭരണകാലത്ത് 1976-ലെ 42-ാം ഭരണഘടനാ ഭേദഗതിയിലൂടെയാണ് ഇവ കൂട്ടിച്ചേർത്തത്. ഈ ഭേദഗതി രാഷ്ട്രീയ പ്രേരിതമാണെന്ന് വിമർശകർ വാദിക്കുമ്പോൾ, രാജ്യത്തിന്റെ അടിസ്ഥാന മൂല്യങ്ങൾ ഒരു രാഷ്ട്രീയ അസ്ഥിരതാ കാലത്ത് ഉറപ്പിക്കാൻ ഇത് ആവശ്യമായിരുന്നുവെന്ന് ഇതിനെ പിന്തുണയ്ക്കുന്നവർ പറയുന്നു.
ഹൊസബലെയുടെ അഭിപ്രായങ്ങൾ ആർഎസ്എസും കോൺഗ്രസ് പാർട്ടിയെപ്പോലുള്ള മതേതര രാഷ്ട്രീയ ശക്തികളും തമ്മിൽ മതസ്വാതന്ത്ര്യം, സമത്വം, ജാതി വിവേചനം തുടങ്ങിയ വിഷയങ്ങളിൽ നിലവിലുള്ള പ്രത്യയശാസ്ത്രപരമായ സംവാദത്തിന് വീണ്ടും തിരികൊളുത്തിയിരിക്കുകയാണ്.
2024-ലെ പൊതുതിരഞ്ഞെടുപ്പിന് ശേഷം ഇന്ത്യ കടുത്ത രാഷ്ട്രീയ ധ്രുവീകരണത്തിലൂടെ കടന്നുപോകുന്ന സമയത്താണ് ഭരണഘടനയുടെ ഭാഷയെച്ചൊല്ലിയുള്ള ഈ പുതിയ പോരാട്ടം നടക്കുന്നതെന്ന് രാഷ്ട്രീയ നിരീക്ഷകർ വിലയിരുത്തുന്നു. രാഹുൽ ഗാന്ധിയുടെ പ്രസ്താവനയോട് ബിജെപി ഇതുവരെ ഔദ്യോഗികമായി പ്രതികരിച്ചിട്ടില്ലെങ്കിലും, തങ്ങളുടെ ഭരണഘടനാ പ്രതിബദ്ധത “അചഞ്ചലമാണ്” എന്ന് മുൻകാലങ്ങളിൽ പാർട്ടി നേതാക്കൾ വ്യക്തമാക്കിയിട്ടുണ്ട്.
