തിരുവനന്തപുരം∙ കേരളത്തിന് അഞ്ച് ഉറപ്പുകൾ പ്രഖ്യാപിച്ച് രാഹുൽഗാന്ധി. പുതു യുഗയാത്രയുടെ സമാപന സമ്മേളനം തിരുവനന്തപുരം പുത്തരിക്കണ്ടം മൈതാനിയിൽ ഉദ്ഘാടനം ചെയ്യവേയാണ് രാഹുലിന്റെ പ്രഖ്യാപനങ്ങൾ. കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്രയും കോളജ് വിദ്യാർഥിനികൾക്ക് പ്രതിമാസം 1000 രൂപ ധനസഹായവും നൽകുമെന്നതാണ് ആദ്യത്തെ വാഗ്ദാനം. ക്ഷേമപെൻഷൻ പ്രതിമാസം 3000 രൂപയായി ഉയർത്തുമെന്നും ഓരോ കുടുംബത്തിനും 25 ലക്ഷം രൂപ വരെയുള്ള ആരോഗ്യ ഇൻഷുറൻസ് പരിരക്ഷ ഉറപ്പാക്കുമെന്നും അദ്ദേഹം പറഞ്ഞു. യുവജനങ്ങൾക്ക് പുതിയ സംരംഭങ്ങൾ തുടങ്ങാൻ 5 ലക്ഷം രൂപ വരെ പലിശരഹിത വായ്പയും മുതിർന്ന പൗരന്മാർക്കായി പ്രത്യേക സർക്കാർ വകുപ്പും അദ്ദേഹം വാഗ്ദാനം ചെയ്തു.
രാഷ്ട്രീയമായി കേന്ദ്ര-സംസ്ഥാന സർക്കാരുകളെ ഒരുപോലെ രാഹുൽ കടന്നാക്രമിച്ചു. യുഎസുമായുള്ള വ്യാപാര കരാറിലൂടെ പ്രധാനമന്ത്രി നരേന്ദ്ര മോദി രാജ്യത്തെ വഞ്ചിച്ചുവെന്നും ജനങ്ങളുടെ വിവരങ്ങൾ കൈമാറിയെന്നും അദ്ദേഹം ആരോപിച്ചു. കേരളത്തിൽ സിപിഎമ്മും ബിജെപിയും ഒത്തുകളിക്കുകയാണെന്നും ഇതിനെ ‘സിജെപി’ എന്നാണ് വിളിക്കേണ്ടതെന്നും അദ്ദേഹം പരിഹസിച്ചു. തന്നെ മണിക്കൂറുകളോളം ഇ.ഡി ചോദ്യം ചെയ്തപ്പോൾ മുഖ്യമന്ത്രി പിണറായി വിജയനെതിരെ നടപടിയുണ്ടാകാത്തത് ഇവർ തമ്മിലുള്ള ധാരണ കൊണ്ടാണെന്നും രാഹുൽ കൂട്ടിച്ചേർത്തു. സമ്മേളനത്തിന് മുൻപായി അദ്ദേഹം വർക്കല ശിവഗിരി മഠം സന്ദർശിച്ച് സന്യാസിമാരുമായി കൂടിക്കാഴ്ച നടത്തുകയും ചെയ്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Rahul Gandhi inaugurated the ‘Puthu Yuga Yathra in Thiruvananthapuram, announcing five transformative guarantees for Kerala
