ഒട്ടാവ: കാനഡയിൽ വിവിധ സർക്കാർ ആനുകൂല്യങ്ങൾ ഇനത്തിൽ വിതരണം ചെയ്ത 2.1 ബില്യൺ ഡോളറിന്റെ ചെക്കുകൾ ഗുണഭോക്താക്കൾ കൈപ്പറ്റാതെ അവശേഷിക്കുന്നതായി റിപ്പോർട്ട്. ടാക്സ് റീഫണ്ടുകൾ, കാർബൺ റിബേറ്റുകൾ, പെൻഷൻ ചെക്കുകൾ എന്നിവയുൾപ്പെടെ ഏകദേശം 3.9 ദശലക്ഷം ചെക്കുകളാണ് ഇത്തരത്തിൽ മാറാനുള്ളതെന്ന് കണക്കുകൾ വ്യക്തമാക്കുന്നു. കാനഡ റവന്യൂ ഏജൻസിയുടെ ഔദ്യോഗിക വെബ്സൈറ്റ് വഴി വ്യക്തികൾക്ക് തങ്ങളുടെ പേരിൽ ലഭിക്കാനുള്ള തുകയുണ്ടോ എന്ന് പരിശോധിക്കാവുന്നതാണ്.
CRA ഓൺലൈൻ അക്കൗണ്ടിൽ ലോഗിൻ ചെയ്ത ശേഷം വലതുവശത്തുള്ള ‘uncashed cheques’ എന്ന ടാബ് ക്ലിക്ക് ചെയ്താൽ ആറുമാസത്തിലധികം പഴക്കമുള്ള പേയ്മെന്റുകളെക്കുറിച്ചുള്ള വിവരങ്ങൾ ലഭ്യമാകും. പുതിയ പേയ്മെന്റുകൾ, ബിസിനസ് അല്ലെങ്കിൽ ട്രസ്റ്റ് ചെക്കുകൾ, കോവിഡ്-19 ആനുകൂല്യങ്ങൾ എന്നിവയെക്കുറിച്ചുള്ള വിവരങ്ങൾക്ക് സിആർഎയെ ഫോൺ മുഖേന ബന്ധപ്പെടേണ്ടതാണ്. അർഹമായ തുക ലഭിക്കുന്നതിന് നിശ്ചിത ഫോം പൂരിപ്പിച്ച് ഓൺലൈനായോ തപാൽ മുഖേനയോ സമർപ്പിക്കണം. നേരിട്ടുള്ള നിക്ഷേപത്തിനായി രജിസ്റ്റർ ചെയ്തവർക്ക് തുക ബാങ്ക് അക്കൗണ്ടിലേക്ക് നേരിട്ടെത്തും, മറ്റുള്ളവർക്ക് തപാൽ വഴി ചെക്ക് ലഭിക്കും.
കഴിഞ്ഞ നാല് സാമ്പത്തിക വർഷങ്ങളിലായി ആകെ 2,159,665,155 ഡോളറിന്റെ 3.9 മില്യൺ പേപ്പർ ചെക്കുകളാണ് കാനഡക്കാർ മാറാൻ മറന്നുപോയതെന്ന് കൺസർവേറ്റീവ് ഫിനാൻസ് ക്രിട്ടിക് ആദം ചേമ്പേഴ്സ് പുറത്തുവിട്ട കണക്കുകൾ വ്യക്തമാക്കുന്നു. ഒരു പേപ്പർ ചെക്ക് ഇഷ്യൂ ചെയ്യുന്നതിന് സർക്കാരിന് ഏകദേശം 1.83 ഡോളർ ഭരണച്ചെലവ് വരുന്നുണ്ട്. നിലവിൽ 8.51 ശതമാനം സർക്കാർ പേയ്മെന്റുകൾ മാത്രമാണ് ചെക്ക് വഴി നൽകുന്നത്. ഭാവിയിൽ ഇത്തരം തടസ്സങ്ങൾ ഒഴിവാക്കാൻ സിആർഎ അക്കൗണ്ട് വഴിയോ ബാങ്ക് വഴിയോ നേരിട്ടുള്ള നിക്ഷേപത്തിന് രജിസ്റ്റർ ചെയ്യണമെന്ന് അധികൃതർ നിർദ്ദേശിക്കുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Public in Canada not receiving $2.1 billion in government checks; Here are simple steps to get your money back!
