എഡ്മന്റൺ: ആൽബർട്ടയിൽ റോയൽ കനേഡിയൻ മൗണ്ടഡ് പോലീസിന് (RCMP) പകരം പ്രൊവിൻഷ്യൽ പോലീസ് സേന രൂപീകരിക്കുന്നതിനെക്കുറിച്ചുള്ള ചർച്ചകൾ സജീവമാകുന്നു. ആൽബർട്ട നെക്സ്റ്റ് പാനൽ സമർപ്പിച്ച ശുപാർശകളെക്കുറിച്ച് മുൻ പോലീസ് ഉദ്യോഗസ്ഥരും ക്രിമിനോളജിസ്റ്റുകളും അവരുടെ നിരീക്ഷണങ്ങൾ പങ്കുവെച്ചു. എന്നാൽ, ജനങ്ങൾ ആവർത്തിച്ച് തള്ളിക്കളഞ്ഞ നിർദ്ദേശങ്ങൾ രാഷ്ട്രീയ പ്രേരിതമായി വീണ്ടും കൊണ്ടുവരികയാണെന്ന് നാഷണൽ പോലീസ് ഫെഡറേഷൻ (NPF) പ്രസിഡന്റ് ബ്രയാൻ സോവ് പറഞ്ഞു. പഴയതും തെറ്റായതുമായ വിവരങ്ങളാണ് റിപ്പോർട്ടിലുള്ളതെന്നും പാനലിന്റെ ശുപാർശകൾക്ക് വിശ്വാസ്യതയില്ലെന്നും അദ്ദേഹം വ്യക്തമാക്കി.
സ്വന്തം പോലീസ് സേന രൂപീകരിക്കുന്നത് ഉത്തരവാദിത്തം വർദ്ധിപ്പിക്കുമെന്നും ഗ്രാമീണ മേഖലകളിലെ ഉദ്യോഗസ്ഥ ക്ഷാമം പരിഹരിക്കാൻ സഹായിക്കുമെന്നുമാണ് യുണൈറ്റഡ് കൺസർവേറ്റീവ് പാർട്ടി (UCP) സർക്കാരിന്റെ നിലപാട്. എന്നാൽ, ഒരു പ്രൊവിൻഷ്യൽ പോലീസ് സേന യാഥാർത്ഥ്യമാകാൻ ചുരുങ്ങിയത് പത്ത് വർഷമെങ്കിലും വേണ്ടിവരുമെന്ന് ഒന്റാറിയോ പ്രൊവിൻഷ്യൽ പോലീസിന്റെ മുൻ കമ്മീഷണർ ക്രിസ് ലൂയിസ് പറഞ്ഞു. ഇൻഫ്രാസ്ട്രക്ചർ, റേഡിയോ നെറ്റ്വർക്കുകൾ എന്നിവ സജ്ജീകരിക്കുന്നതും ആയിരക്കണക്കിന് ഉദ്യോഗസ്ഥരെ നിയമിക്കുന്നതും വലിയ കടമ്പയാണെന്ന് അദ്ദേഹം ചൂണ്ടിക്കാട്ടി. നിലവിൽ വടക്കേ അമേരിക്കയിലുടനീളം പോലീസ് റിക്രൂട്ട്മെന്റ് വലിയ വെല്ലുവിളി നേരിടുകയാണെന്നും അദ്ദേഹം കൂട്ടിച്ചേർത്തു.
പ്രാദേശിക മുൻഗണനകൾക്ക് അനുസരിച്ച് പ്രവർത്തിക്കാൻ പ്രൊവിൻഷ്യൽ പോലീസ് സേന സഹായിക്കുമെന്ന് ക്രിമിനോളജിസ്റ്റായ ഡാൻ ജോൺസ് വ്യക്തമാക്കി. ഒട്ടാവയിൽ നിന്നുള്ള നിർദ്ദേശങ്ങളാണ് ആർസിഎംപി പിന്തുടരുന്നതെന്നും എന്നാൽ ആൽബർട്ടയുടെ ആവശ്യങ്ങൾ തിരിച്ചറിയാൻ പ്രൊവിൻഷ്യൽ മാതൃകയാണ് ഉചിതമെന്നും അദ്ദേഹം പറഞ്ഞു. ഗ്രാൻഡ് പ്രയറിയിൽ ആർസിഎംപിക്ക് പകരം മുൻസിപ്പൽ പോലീസ് സേന നടപ്പിലാക്കിയത് വിജയകരമായ മാതൃകയാണെന്നും അദ്ദേഹം ചൂണ്ടിക്കാട്ടി. ഗ്രാൻഡ് പ്രയറിയിൽ 2023 മുതൽ 50 ഓഫീസർമാരെ നിയമിച്ചു കഴിഞ്ഞു. 19 ദശലക്ഷം ഡോളർ ചെലവ് പ്രതീക്ഷിക്കുന്ന ഈ പരിവർത്തനം ശരത്കാലത്തോടെ പൂർത്തിയാകും.
അതേസമയം, ആർസിഎംപിയിൽ നിലവിൽ ഒഴിവുകൾ കുറവാണെന്നും കൂടുതൽ അപേക്ഷകർ എത്തുന്നുണ്ടെന്നും എൻപിഎഫ് ഡയറക്ടർ കെവിൻ ഹാൽവ അറിയിച്ചു. കഴിഞ്ഞ വർഷം ലഭിച്ച 4,500 അപേക്ഷകളിൽ നിന്ന് ഏകദേശം 450 പേർ യോഗ്യത നേടുമെന്നാണ് കരുതുന്നത്. പ്രൊവിൻഷ്യൽ പോലീസ് മാതൃക നടപ്പിലാക്കുന്നത് ദീർഘകാലാടിസ്ഥാനത്തിൽ സംസ്ഥാനത്തിന് ദോഷകരമാകുമെന്ന് അദ്ദേഹം മുന്നറിയിപ്പ് നൽകി. നെക്സ്റ്റ് പാനലിന്റെ ശുപാർശകൾ സൂക്ഷ്മമായി പരിശോധിച്ച ശേഷം മാത്രമേ അടുത്ത നടപടികളിലേക്ക് കടക്കുകയുള്ളൂ എന്ന് പ്രൊവിൻഷ്യൽ ഗവൺമെന്റ് വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Provincial police force to replace RCMP; Alberta moves to have its own police force
