ടിക്കറ്റ് മറിച്ചുവിറ്റ് ഇനി ലാഭമുണ്ടാക്കണ്ട! ന്റാറിയോ ടിക്കറ്റ് സെയിൽസ് ആക്റ്റിൽ കടുത്ത നിയന്ത്രണവുമായി പ്രവിശ്യാ സർക്കാർ

ടൊറന്റോ: തത്സമയ പരിപാടികളുടെ ടിക്കറ്റുകൾ യഥാർത്ഥ വിലയേക്കാൾ കൂടുതൽ തുകയ്ക്ക് പുനർവിൽപ്പന നടത്തുന്നത് നിരോധിക്കാനുള്ള ഒന്റാറിയോ സർക്കാരിന്റെ നീക്കത്തിന് ആരാധകരിൽ നിന്നും സിനിമാ-സംഗീത മേഖലകളിൽ നിന്നും മികച്ച പ്രതികരണം. പ്രീമിയർ ഡഗ് ഫോർഡ് കഴിഞ്ഞ വെള്ളിയാഴ്ചയാണ് 2017-ലെ ടിക്കറ്റ് സെയിൽസ് ആക്റ്റിൽ നിർദ്ദിഷ്ട ഭേദഗതികൾ പ്രഖ്യാപിച്ചത്. ടിക്കറ്റുകൾ മറിച്ചുവിൽക്കുന്നതിലൂടെയുള്ള അമിത ലാഭം തടയുന്നതിനൊപ്പം വ്യാജ ടിക്കറ്റുകളുടെ വിൽപ്പന തടയാനും അനാവശ്യ സർവീസ് ചാർജുകൾക്ക് നിയന്ത്രണം ഏർപ്പെടുത്താനും പുതിയ നിയമം ലക്ഷ്യമിടുന്നു. 2019-ൽ ടിക്കറ്റ് നിരക്കിന്റെ 50 ശതമാനത്തിലധികം ലാഭം വാങ്ങുന്നത് തടയാനുള്ള നിയമം സർക്കാർ പിൻവലിച്ചിരുന്നെങ്കിലും നിലവിലെ വിപണി സാഹചര്യം കണക്കിലെടുത്താണ് പുതിയ കർശന നടപടികളിലേക്ക് നീങ്ങുന്നത്.

കഴിഞ്ഞ വർഷത്തെ വേൾഡ് സീരീസ് മത്സരത്തിന് ടിക്കറ്റ് നിരക്കിന്റെ മൂന്നിരട്ടിയിലധികം തുക നൽകേണ്ടി വന്ന അനുഭവം ടൊറന്റോ ബ്ലൂ ജെയ്‌സ് ആരാധകനായ മൈക്കൽ ബ്രൗൺ വെളിപ്പെടുത്തി. 1,380 ഡോളർ പ്രതീക്ഷിച്ച സ്ഥാനത്ത് സാങ്കേതിക തകരാർ മൂലം 5,043 ഡോളർ നൽകി പുനർവിൽപ്പന ടിക്കറ്റുകൾ വാങ്ങേണ്ടി വന്നതായും ഇത് റദ്ദാക്കാൻ ടിക്കറ്റ് മാസ്റ്റർ തയ്യാറായില്ലെന്നും അദ്ദേഹം അറിയിച്ചു. ടിക്കറ്റ് നിരക്കുകൾ പരിധിക്കപ്പുറം ഉയരുന്നത് സാധാരണക്കാരായ ആരാധകർക്ക് പ്രിയപ്പെട്ട താരങ്ങളുടെ പരിപാടികൾ കാണാനുള്ള അവസരം നഷ്ടപ്പെടുത്തുന്നതായി സംഗീത നിർമ്മാതാവായ സ്ലേറ്റർ മാൻസോ വിലയിരുത്തി. എന്നാൽ, ടിക്കറ്റ് മാസ്റ്റർ കാനഡ, ലൈവ് നേഷൻ എന്നീ കമ്പനികൾ ഈ വിഷയത്തിൽ ഇതുവരെ പ്രതികരണം ലഭ്യമാക്കിയിട്ടില്ല.

പുതിയ നിയമം സ്വാഗതാർഹമാണെങ്കിലും പരിപാടികളുടെ ടിക്കറ്റ് നിരക്ക് കുറയ്ക്കാൻ ഇത് മാത്രം പര്യാപ്തമല്ലെന്ന് ഈ രംഗത്തെ വിദഗ്ധർ ചൂണ്ടിക്കാട്ടുന്നു. ഡിമാൻഡ് അനുസരിച്ച് വില മാറുന്ന ‘ഡൈനാമിക് പ്രൈസിംഗ്’ രീതിയാണ് ടിക്കറ്റ് നിരക്ക് കുതിച്ചുയരാൻ പ്രധാന കാരണമെന്ന് വേവ്‌ലെങ്ത് മ്യൂസിക് എക്സിക്യൂട്ടീവ് ഡയറക്ടർ ജോനാഥൻ ബൺസ് വ്യക്തമാക്കി. വ്യവസായ മേഖലയിലെ കുത്തക നിലപാടുകളും മറഞ്ഞിരിക്കുന്ന ഫീസുകളും കുറയ്ക്കാതെ ടിക്കറ്റുകൾ താങ്ങാനാവുന്ന വിലയിൽ ലഭ്യമാകില്ലെന്ന് ആർട്ടിസ്റ്റ് ഡെവലപ്‌മെന്റ് കമ്പനി ഉടമ ഗില്ലൂം മോഫറ്റ് അഭിപ്രായപ്പെട്ടു. എങ്കിലും ചെറുകിട സംഗീത വേദികളെ സംബന്ധിച്ചിടത്തോളം ഈ നീക്കം ആശ്വാസകരമാണെന്ന് എൽ മൊകാംബോ എക്സിക്യൂട്ടീവ് ഡയറക്ടർ മൈക്ക് ചാലൂട്ട് അറിയിച്ചു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

No more profit from ticket flipping! Provincial government tightens restrictions on Ontario Ticket Sales Act