മെയ്നെ: അമേരിക്കയിലെ മെയ്നെയിലുള്ള ബങ്കോർ അന്താരാഷ്ട്ര വിമാനത്താവളത്തിൽ എട്ട് യാത്രക്കാരുമായി പറന്നുയർന്ന സ്വകാര്യ വിമാനം തകർന്നു വീണു. ബോംബാർഡിയർ ചലഞ്ചർ 650 (Bombardier Challenger 650) എന്ന വിമാനമാണ് അപകടത്തിൽപ്പെട്ടത്. വിമാനത്തിലുണ്ടായിരുന്ന എട്ടുപേരും കൊല്ലപ്പെട്ടതായാണ് പ്രാഥമിക നിഗമനം. സംഭവത്തെത്തുടർന്ന് വിമാനത്താവളം താത്കാലികമായി അടച്ചു.
തിങ്കളാഴ്ച രാവിലെ ബങ്കോർ വിമാനത്താവളത്തിൽ നിന്ന് പറന്നുയർന്ന ഉടനെയായിരുന്നു അപകടമെന്ന് ഫെഡറൽ ഏവിയേഷൻ അഡ്മിനിസ്ട്രേഷൻ (FAA) അറിയിച്ചു. മേഖലയിലുണ്ടായ കനത്ത മൂടൽമഞ്ഞും ഹിമപാതവുമാണ് അപകടത്തിന് കാരണമായതെന്നാണ് സൂചന. തകർന്നുവീണ വിമാനത്തിന് തൊട്ടുപിന്നാലെ തീപിടിച്ചതോടെ ദുരന്തത്തിന്റെ ആഘാതം വർദ്ധിച്ചു. വിമാനത്താവളത്തിലെ അഗ്നിശമന സേനാംഗങ്ങൾ ഉടൻ തന്നെ സ്ഥലത്തെത്തി തീയണയ്ക്കാനുള്ള നടപടികൾ ആരംഭിച്ചു.
ഹൂസ്റ്റൺ ആസ്ഥാനമായി പ്രവർത്തിക്കുന്ന ഒരു സ്വകാര്യ കമ്പനിയുടെ ഉടമസ്ഥതയിലുള്ളതാണ് അപകടത്തിൽപ്പെട്ട വിമാനം. യാത്രക്കാരുടെ വിവരങ്ങൾ ഔദ്യോഗികമായി പുറത്തുവിട്ടിട്ടില്ലെങ്കിലും, വിമാനത്തിലുണ്ടായിരുന്ന ആരും രക്ഷപ്പെടാൻ സാധ്യതയില്ലെന്ന് അധികൃതർ വ്യക്തമാക്കി. അപകടസമയത്ത് കാഴ്ചപരിധി കുറവായിരുന്നുവെന്നും വിമാനം ഹിമപാതത്തിൽ അകപ്പെട്ടതാകാമെന്നും റിപ്പോർട്ടുകൾ സൂചിപ്പിക്കുന്നു.
അപകടത്തെക്കുറിച്ച് വിശദമായ അന്വേഷണം ആരംഭിച്ചതായി ഫെഡറൽ ഏവിയേഷൻ അഡ്മിനിസ്ട്രേഷനും നാഷണൽ ട്രാൻസ്പോർട്ടേഷൻ സേഫ്റ്റി ബോർഡും (NTSB) അറിയിച്ചു. വിമാനത്തിന്റെ സാങ്കേതിക തകരാറുകൾ പരിശോധിക്കുന്നതിനൊപ്പം കാലാവസ്ഥാ വ്യതിയാനം എങ്ങനെയാണ് വിമാനത്തെ ബാധിച്ചതെന്നും അന്വേഷണസംഘം പരിശോധിക്കും.
രക്ഷാപ്രവർത്തനം പൂർത്തിയാക്കിയ ശേഷം വിമാനത്താവളത്തിന്റെ പ്രവർത്തനം പുനരാരംഭിക്കുമെന്ന് അധികൃതർ അറിയിച്ചു. വിമാനാപകടത്തെക്കുറിച്ചുള്ള കൂടുതൽ വിവരങ്ങൾക്കായി നാഷണൽ ട്രാൻസ്പോർട്ടേഷൻ സേഫ്റ്റി ബോർഡിന്റെ റിപ്പോർട്ടിനായി കാത്തിരിക്കുകയാണ് ഏവിയേഷൻ ടീം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Private plane crashes in US; eight passengers reportedly killed
