ചാർലറ്റ്ടൗൺ: അന്താരാഷ്ട്ര വിനോദസഞ്ചാര ഭൂപടത്തിൽ തങ്ങളുടെ കരുത്തറിയിച്ച് പ്രിൻസ് എഡ്വേർഡ് ഐലൻഡ് (PEI). 2025-ൽ റെക്കോർഡ് എണ്ണം സഞ്ചാരികളെ സ്വീകരിച്ചുകൊണ്ട് പ്രവിശ്യ പുതിയ ചരിത്രം കുറിച്ചു. തൊട്ടുതലേവർഷത്തെ അപേക്ഷിച്ച് സന്ദർശകരുടെ എണ്ണത്തിൽ 10 ശതമാനം വർധനവുണ്ടായതായി പ്രവിശ്യാ ഭരണകൂടം ഔദ്യോഗികമായി അറിയിച്ചു.
കഴിഞ്ഞ വർഷം ഏകദേശം 18.7 ലക്ഷം വിനോദസഞ്ചാരികളാണ് ദ്വീപ് സന്ദർശിച്ചത്. ഇതിൽ 11.2 ലക്ഷം പേർ പ്രവിശ്യയിൽ താമസിച്ച് കാഴ്ചകൾ കണ്ടവരാണ് (Paid overnight stays). പ്രിൻസ് എഡ്വേർഡ് ഐലൻഡിന്റെ ചരിത്രത്തിൽ രേഖപ്പെടുത്തുന്ന ഏറ്റവും ഉയർന്ന നിരക്കാണിത്. സഞ്ചാരികളുടെ എണ്ണത്തിൽ മാത്രമല്ല, വരുമാനത്തിന്റെ കാര്യത്തിലും വലിയ കുതിച്ചുചാട്ടമാണ് ഉണ്ടായത്. വിനോദസഞ്ചാര മേഖലയിൽ നിന്നുള്ള വരുമാനത്തിൽ 12.4 ശതമാനം വർധനവ് രേഖപ്പെടുത്തിയിട്ടുണ്ട്.
പ്രവിശ്യയിലെ എല്ലാ ടൂറിസം മേഖലകളും ഒരുപോലെ വളർച്ച കൈവരിച്ചു എന്നതാണ് ഇത്തവണത്തെ പ്രത്യേകത. ഗ്രീൻ ഗേബിൾസ് ഷോർ, നോർത്ത് കേപ്പ് കോസ്റ്റൽ ഡ്രൈവ്, പോയിന്റ്സ് ഈസ്റ്റ് കോസ്റ്റൽ ഡ്രൈവ്, റെഡ് സാൻഡ്സ് ഷോർ എന്നീ നാല് പ്രധാന മേഖലകൾ സന്ദർശകരുടെ എണ്ണത്തിൽ പുതിയ റെക്കോർഡുകൾ സ്ഥാപിച്ചു. സഞ്ചാരികൾ ഇപ്പോൾ പ്രശസ്തമായ ഇടങ്ങൾ മാത്രമല്ല, ദ്വീപിന്റെ ഉൾപ്രദേശങ്ങളിലെ കാഴ്ചകളും അനുഭവങ്ങളും തേടി പോകുന്നു എന്നതിന്റെ തെളിവാണ് ഈ വളർച്ചയെന്ന് അധികൃതർ വ്യക്തമാക്കി.
സാധാരണയായി വേനൽക്കാലത്താണ് ഇവിടെ കൂടുതൽ തിരക്ക് അനുഭവപ്പെടാറുള്ളതെങ്കിലും, ഇപ്പോൾ ഓഫ്-സീസണുകളിലും സഞ്ചാരികൾ ധാരാളമായി എത്തുന്നുണ്ട്. 2019-നെ അപേക്ഷിച്ച് സീസൺ അല്ലാത്ത സമയങ്ങളിലെ (ശരത്കാലം, ശീതകാലം, വസന്തകാലം) സന്ദർശകരുടെ എണ്ണത്തിൽ 18 ശതമാനം വർധനവുണ്ടായി. പ്രവിശ്യയിലെ മ്യൂസിയങ്ങൾ, പൈതൃക കേന്ദ്രങ്ങൾ എന്നിവിടങ്ങളിൽ സന്ദർശകരുടെ എണ്ണം 29 ശതമാനം വർധിച്ചപ്പോൾ, ഭക്ഷണ-പാനീയ മേഖലയിൽ ആറ് ശതമാനം വരുമാന വർധനവും ഉണ്ടായി.
പ്രിൻസ് എഡ്വേർഡ് ഐലൻഡിന് പുറമെ മറ്റ് മാരിടൈം പ്രവിശ്യകളായ നോവ സ്കോഷ്യയയിലും ന്യൂ ബ്രൺസ്വിക്കിലും വിനോദസഞ്ചാര മേഖലയിൽ ഉണർവ് പ്രകടമാണ്. 2025-ന്റെ ആദ്യ ഒൻപത് മാസങ്ങളിൽ 17 ലക്ഷം സഞ്ചാരികളെയാണ് നോവ സ്കോട്ടിയ സ്വീകരിച്ചത്. ക്യൂബെക്കിൽ നിന്നുള്ള സഞ്ചാരികളുടെ എണ്ണത്തിൽ 25 ശതമാനം വർധനവുണ്ടായി. ന്യൂ ബ്രൺസ്വിക്കിൽ ഓഗസ്റ്റ് വരെയുള്ള കണക്കുകൾ പ്രകാരം സന്ദർശകരുടെ ചിലവഴിക്കൽ 1.8 ബില്യൺ ഡോളറിലെത്തി. ഇത് മുൻവർഷത്തെ അപേക്ഷിച്ച് ഏഴ് ശതമാനം കൂടുതലാണ്.
പ്രിൻസ് എഡ്വേർഡ് ഐലൻഡിലെ ഈ സമാനതകളില്ലാത്ത വളർച്ച വരും വർഷങ്ങളിലും തുടരുമെന്നാണ് വിനോദസഞ്ചാര വകുപ്പിന്റെ പ്രതീക്ഷ. ദ്വീപിന്റെ പ്രകൃതിഭംഗിയും സാംസ്കാരിക പൈതൃകവും ആഗോളതലത്തിൽ കൂടുതൽ ശ്രദ്ധിക്കപ്പെടുന്നത് വരും സീസണുകളിലും സഞ്ചാരികളുടെ എണ്ണം വർധിപ്പിക്കാൻ സഹായിക്കും.
prince-edward-island-welcomed-18-million-visitors-in-record-breaking-year
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
