ഒട്ടാവയിൽ ഓഗസ്റ്റ് മാസം പ്രൈഡ് മാസമായി ആഘോഷിക്കുന്നു. 2SLGBTQ+ വിഭാഗങ്ങളുടെ സംസ്കാരവും അനുഭവങ്ങളും ആഘോഷിക്കുന്നതിനായി നിരവധി പരിപാടികളാണ് ഈ മാസം ഉടനീളം നഗരത്തിൽ സംഘടിപ്പിച്ചിരിക്കുന്നത്. കമ്മ്യൂണിറ്റി ഗ്രൂപ്പുകളും സംഘടനകളും ചേർന്ന് വിപുലമായ പരിപാടികൾ ആസൂത്രണം ചെയ്തുകഴിഞ്ഞു. ഈ വർഷത്തെ പ്രധാന പ്രൈഡ് പരേഡ് ഓഗസ്റ്റ് 24-ന് എൽജിൻ, ലോറിയർ സ്ട്രീറ്റുകളിലൂടെ നടക്കും. ഇതുകൂടാതെ, പ്രൈഡ് ഫാമിലി പിക്നിക്, ക്വീർ ബൈക്ക് ക്ലബ് ട്രിപ്പ്, ഡ്രാഗ് ഫിയസ്റ്റ തുടങ്ങിയ വിവിധ പരിപാടികളും നടക്കും.
പ്രൈഡ് മാസത്തിന്റെ ഭാഗമായി നടക്കുന്ന പ്രധാന പരിപാടികളിലൊന്നാണ് ‘ലവ് ഇൻ എ ഡെയ്ഞ്ചറസ് ടൈം. കനേഡിയൻ മ്യൂസിയം ഫോർ ഹ്യൂമൻ റൈറ്റ്സ് ഒരുക്കുന്ന ഈ പ്രദർശനം ഓഗസ്റ്റ് 1 മുതൽ 31 വരെ നാഷണൽ ആർട്സ് സെന്ററിൽ നടക്കും. 1950-കൾ മുതൽ 1990-കൾ വരെ കനേഡിയൻ സർക്കാർ 2SLGBTQ+ സൈനികരെ ഉപദ്രവിച്ചതും പുറത്താക്കിയതുമായ ‘പർജ്’ കാലഘട്ടത്തെക്കുറിച്ചാണ് ഈ പ്രദർശനം പറയുന്നത്. പ്രവേശനം സൗജന്യമാണ്. കൂടാതെ, ഓഗസ്റ്റ് 3-ന് ഹോമോ ഫോൺ, ദി ഗ്രോവ് എന്നിവർ ചേർന്ന് ‘ആഫ്റ്റർനൂൺ ടീ ഡാൻസ്’ എന്ന പരിപാടി സംഘടിപ്പിക്കും. 1950-കളിലെ ന്യൂയോർക്കിൽ രൂപംകൊണ്ട ഈ നൃത്തപരിപാടിയിൽ സംഗീതവും ചായയും മാത്രമാണ് പ്രധാന ആകർഷണങ്ങൾ.
ഓഗസ്റ്റ് 9-10 തീയതികളിൽ ക്വീർ ബൈക്ക് ക്ലബ് ഒരു സൈക്കിൾ യാത്ര സംഘടിപ്പിക്കുന്നുണ്ട്. 55 കിലോമീറ്റർ ദൂരമുള്ള ഈ യാത്ര മെറിക്വില്ലെയിലേക്ക് ആയിരിക്കും. ഓഗസ്റ്റ് 16-ന് കനാട്ടയിൽ നടക്കുന്ന പ്രൈഡ് ഫാമിലി പിക്നിക് കുടുംബങ്ങളെ ലക്ഷ്യമിട്ടാണ് സംഘടിപ്പിക്കുന്നത്. കുട്ടികൾക്കും രക്ഷിതാക്കൾക്കും വിനോദങ്ങൾക്കായി നിരവധി പരിപാടികൾ ഇവിടെ ഒരുക്കും. അതെ ദിവസം തന്നെ പാർക്ക്ഡേൽ മാർക്കറ്റിൽ ‘പ്രൈഡ് നൈറ്റ് മാർക്കറ്റ്’ എന്ന പേരിൽ ഒരു രാത്രികാല ചന്തയും നടക്കും. 60-ലധികം ചെറുകിട കച്ചവടക്കാർ പങ്കെടുക്കുന്ന ചന്തയിൽ പ്രാദേശിക കലാകാരന്മാരുടെ സംഗീത പരിപാടികളും ഉണ്ടാകും. ഓഗസ്റ്റ് 21-ന് ക്വീറിംഗ്613 സംഘടിപ്പിക്കുന്ന ‘ക്വീർസ് & ബിയേഴ്സ്’ എന്ന പരിപാടിയിൽ തത്സമയ സംഗീതവും ഉണ്ടാകും. ഈ മാസത്തെ പ്രധാന പരിപാടികളിൽ ഒന്നായ പ്രൈഡ് സ്ക്വയർ ഡാൻസ് ഓഗസ്റ്റ് 23-നാണ്. ഈ നൃത്തത്തിൽ ആർക്കും പങ്കെടുക്കാം, നൃത്തം പഠിപ്പിക്കാൻ പരിശീലകരും ഉണ്ടാകും.
ഈ വർഷത്തെ പ്രധാന ഹൈലൈറ്റുകളിൽ ഒന്നാണ് ഓഗസ്റ്റ് 23-ന് നടക്കുന്ന ‘ഡ്രാഗ് & ബോൾസ്’ എന്ന ചാരിറ്റി സോഫ്റ്റ്ബോൾ ടൂർണമെന്റ്. ഇത് എച്ച്.ഐ.വി. ബാധിതരെ സഹായിക്കുന്ന ബ്രൂസ് ഹൗസ് എന്ന സംഘടനയ്ക്ക് വേണ്ടിയുള്ള ധനസമാഹരണത്തിനായിട്ടാണ് നടത്തുന്നത്. ‘ഡിസ്കോ ഇൻഫെർണോ’ എന്ന തീമിലുള്ള ഈ പരിപാടിയിൽ 70-കളിലെ ഫാഷനും സംഗീതവും നിറയും. ഓഗസ്റ്റ് 23-ന് തന്നെ നടക്കുന്ന ‘ഓട്ടാവ ഡൈക്ക് മാർച്ച്’ മിന്റോ പാർക്കിൽ നിന്ന് ആരംഭിച്ച് ഒരു കമ്മ്യൂണിറ്റി മീറ്റപ്പിൽ അവസാനിക്കും. ഓഗസ്റ്റ് 24-ന് നടക്കുന്ന വാർഷിക പ്രൈഡ് പരേഡ് ഈ ആഘോഷങ്ങളുടെ പ്രധാന ആകർഷണങ്ങളിൽ ഒന്നാണ്. ഡസൻ കണക്കിന് പ്രാദേശിക ഗ്രൂപ്പുകൾ പങ്കെടുക്കുന്ന ഈ പരേഡ് കാണാൻ എല്ലാവർക്കും ക്ഷണമുണ്ട്. ഇതോടൊപ്പം, ഓഗസ്റ്റ് 31-ന് ഹാമണ്ട് ഗോൾഫ് ക്ലബ്ബിൽ നടക്കുന്ന ‘ഡ്രാഗ് ബിംഗോ’ പരിപാടിയോടെ ഈ മാസത്തെ ആഘോഷങ്ങൾക്ക് തിരശീല വീഴും. ഇതിൽ നിന്നുള്ള വരുമാനം ഫാമിലി സർവീസസ് ഓട്ടാവയുടെ ‘എറൗണ്ട് ദി റെയിൻബോ’ പ്രോഗ്രാമിനായി സംഭാവന ചെയ്യും.
Pride Month kicks off in Ottawa; 2SLGBTQ+ community celebrates
