ടൊറന്റോയെയും സഡ്ബറിയെയും തമ്മിൽ ബന്ധിപ്പിക്കുന്ന ഹൈവേ 69-ന്റെ ശേഷിക്കുന്ന ഭാഗം നാലുവരിപ്പാതയാക്കുമെന്ന് ഒന്റാറിയോ പ്രീമിയർ ഡഗ് ഫോർഡ് പ്രഖ്യാപിച്ചു. ഏകദേശം 68 കിലോമീറ്റർ ദൂരമുള്ള ഹെൻവേ ഇൻലെറ്റ് ഫസ്റ്റ് നേഷൻ മുതൽ നോബൽ വരെയുള്ള ഭാഗത്തിന്റെ നിർമ്മാണമാണ് ഇനി പൂർത്തിയാക്കാനുള്ളത്. വടക്കൻ ഒന്റാറിയോയിലെ റോഡുകൾ കൂടുതൽ സുരക്ഷിതമാക്കുക എന്നതാണ് തന്റെ ലക്ഷ്യമെന്ന് അദ്ദേഹം പറഞ്ഞു.
ഫോർഡ് പറയുന്നതനുസരിച്ച്, നിലവിൽ ഈ റോഡുകളിലൂടെയുള്ള യാത്ര അപകടം നിറഞ്ഞതാണ്. പ്രത്യേകിച്ച് മഞ്ഞുകാലങ്ങളിൽ. “സഡ്ബറിയിൽ നിന്ന് നഗരത്തിലേക്ക് യാത്ര ചെയ്തവർക്കറിയാം, ആ രണ്ടുവരിപ്പാതയിലൂടെയുള്ള യാത്ര എത്രത്തോളം ഭയാനകമാണെന്ന്. ഒരു ട്രാൻസ്പോർട്ട് ട്രക്ക് അൽപം മാറിയാൽ പോലും വലിയ അപകടം സംഭവിക്കാമെന്ന് അദ്ദേഹം പറഞ്ഞു. സുരക്ഷിതമായ യാത്ര എല്ലാവരുടെയും അവകാശമാണെന്നും അതിനാൽ ഈ പദ്ധതിക്ക് വലിയ മുൻഗണന നൽകുമെന്നും അദ്ദേഹം വ്യക്തമാക്കി.
ഈ പദ്ധതിയുടെ ഭാഗമായി മൂന്ന് ഫസ്റ്റ് നേഷൻസ് സമൂഹങ്ങളുമായി ഭൂമി ഏറ്റെടുക്കുന്നതുമായി ബന്ധപ്പെട്ട് ധാരണയിലെത്തിയെന്നും പ്രീമിയർ അറിയിച്ചു. ഏകദേശം 200 ബില്യൺ ഡോളർ അടിസ്ഥാന സൗകര്യ വികസനത്തിനായി സർക്കാർ ചെലവഴിക്കുന്നുണ്ടെന്നും, അതിൽ 35 ബില്യൺ ഡോളർ റോഡുകൾക്കും ഹൈവേകൾക്കും വേണ്ടിയാണെന്നും അദ്ദേഹം കൂട്ടിച്ചേർത്തു.
നിർമ്മാണം എന്ന് തുടങ്ങുമെന്നതിനെക്കുറിച്ച് കൃത്യമായ തീയതി പ്രഖ്യാപിച്ചിട്ടില്ലെങ്കിലും, വടക്കൻ വികസന മന്ത്രി ഗ്രെഗ് റിക്ക്ഫോർഡ് ഈ പദ്ധതി പൂർത്തിയാക്കാൻ സമ്മർദ്ദം ചെലുത്തുന്നുണ്ടെന്ന് ഫോർഡ് സൂചിപ്പിച്ചു. അടുത്ത ഏതാനും മാസങ്ങൾക്കുള്ളിൽ കൂടുതൽ വിവരങ്ങൾ പുറത്തുവിടുമെന്നാണ് ഒന്റാറിയോ സർക്കാർ വൃത്തങ്ങൾ അറിയിക്കുന്നത്.
Sudbury-Toronto travel now safer: Premier Ford to make Highway 69 four-lane, construction to begin soon
