ഹൊറർ ഫാന്റസി ദൃശ്യവിരുന്നുമായി പ്രഭാസ്; ‘രാജാ സാബ്’ ഇന്ന് മുതൽ തിയേറ്ററുകളിൽ

കൽക്കി 2898 എ.ഡി.യുടെ വൻ വിജയത്തിന് ശേഷം റിബൽ സ്റ്റാർ പ്രഭാസ് നായകനായെത്തുന്ന ‘ദ രാജാ സാബ്’ ഇന്ന് (ജനുവരി 9, 2026) ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തി. ഹൊററും കോമഡിയും ഫാൻ്റസിയും സമന്വയിക്കുന്ന ഈ ചിത്രം അഞ്ച് ഭാഷകളിലായി പാൻ ഇന്ത്യൻ റിലീസായാണ് എത്തിയിരിക്കുന്നത്. കേരളത്തിൽ ഗോകുലം മൂവീസാണ് ചിത്രത്തിൻ്റെ വിതരണം ഏറ്റെടുത്തിരിക്കുന്നത്.

മാരുതി തിരക്കഥയെഴുതി സംവിധാനം ചെയ്ത ചിത്രത്തിൽ പ്രഭാസ് ഇരട്ട വേഷത്തിലാണ് പ്രത്യക്ഷപ്പെടുന്നത് എന്നത് ആരാധകർക്കിടയിൽ വലിയ ആവേശമാണ് സൃഷ്ടിച്ചിരിക്കുന്നത്. മുത്തശ്ശിയുടെ (സെറീന വഹാബ്) അൽഷിമേഴ്സ് രോഗവും കാണാതായ മുത്തച്ഛനായ കനകരാജുവിനെ (സഞ്ജയ് ദത്ത്) കണ്ടെത്താനുള്ള കൊച്ചുമകന്റെ ശ്രമങ്ങളുമാണ് ചിത്രത്തിന്റെ ഉള്ളടക്കമെന്നാണ് സൂചന. ഒരു പ്രേതബാധയുള്ള കൊട്ടാരത്തിന്റെ പശ്ചാത്തലത്തിൽ ഒരുക്കിയിരിക്കുന്ന ഈ ചിത്രം പ്രഭാസിന്റെ കരിയറിലെ വേറിട്ടൊരു പരീക്ഷണമാണ്.

സഞ്ജയ് ദത്ത്, ബൊമൻ ഇറാനി, മാളവിക മോഹനൻ, നിധി അഗർവാൾ, റിദ്ധി കുമാർ തുടങ്ങി വൻ താരനിരയാണ് ചിത്രത്തിൽ അണിനിരക്കുന്നത്. തമൻ എസ് സംഗീതം നിർവഹിച്ച ചിത്രത്തിലെ ഗാനങ്ങൾ ഇതിനകം തന്നെ ശ്രദ്ധിക്കപ്പെട്ടിട്ടുണ്ട്. പ്രത്യേകിച്ച് ബപ്പി ലാഹിരിയുടെ പ്രശസ്തമായ ‘ഡിസ്കോ ഡാൻസർ’ പാട്ടിന്റെ റീമിക്സ് പതിപ്പ് സോഷ്യൽ മീഡിയയിൽ തരംഗമായിക്കഴിഞ്ഞു. ഐതിഹ്യങ്ങളും ആധുനിക ഹൊറർ ഘടകങ്ങളും ചേർത്തുവെച്ചാണ് ചിത്രം അണിയറയിൽ ഒരുക്കിയിട്ടുള്ളത്.

ഏകദേശം 400 കോടി രൂപ ബജറ്റിൽ പീപ്പിൾ മീഡിയ ഫാക്ടറിയുടെ ബാനറിൽ ടി.ജി. വിശ്വപ്രസാദാണ് ചിത്രം നിർമ്മിച്ചിരിക്കുന്നത്. ബാഹുബലി ഫെയിം ആർ.സി. കമൽ കണ്ണൻ ഒരുക്കിയ വിഎഫ്എക്സ് ദൃശ്യങ്ങൾ ചിത്രത്തിന്റെ പ്രധാന ആകർഷണമാണ്. ഹൈദരാബാദ് ഉൾപ്പെടെയുള്ള സ്ഥലങ്ങളിൽ ഇന്ന് രാവിലെ തന്നെ ഫാൻ ഷോകൾ ആരംഭിച്ചിരുന്നു. രണ്ടാം പകുതിയിലെ ക്ലൈമാക്സ് രംഗങ്ങളെക്കുറിച്ച് ഇതിനകം തന്നെ മികച്ച പ്രതികരണങ്ങളാണ് സോഷ്യൽ മീഡിയയിൽ ഉയരുന്നത്.

സംക്രാന്തി സീസണിന് മുന്നോടിയായി റിലീസ് ചെയ്ത ‘ദ രാജാ സാബ്’ ബോക്സ് ഓഫീസിൽ വലിയ ചലനങ്ങൾ സൃഷ്ടിക്കുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ. മലയാളം പതിപ്പിനും വലിയ വരവേല്പാണ് കേരളത്തിലെ തിയേറ്ററുകളിൽ ലഭിക്കുന്നത്. ‘ഹൊറർ ഈസ് ദ ന്യൂ ഹ്യൂമർ’ എന്ന ടാഗ് ലൈനോടെ എത്തിയ ഈ ചിത്രം പ്രഭാസിന്റെ കരിയറിലെ തന്നെ ഏറ്റവും വലിയ വിജയങ്ങളിൽ ഒന്നാകുമോ എന്നാണ് സിനിമാ ലോകം ഉറ്റുനോക്കുന്നത്.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Prabhas is a visual feast for the eyes; ‘Raja Saab’ in theaters from today