ബലാത്സംഗ കേസിൽ പൊലീസ് തിരയുന്ന റാപ്പർ വേടൻ എന്ന ഹിരൺദാസ് മുരളിക്കെതിരെ ലുക്കൗട്ട് നോട്ടിസ് പുറപ്പെടുവിച്ചു. ഇയാൾ വിദേശത്തേക്ക് കടക്കുന്നത് തടയുന്നതിനാണ് ഈ നടപടി. വേടൻ നിലവിൽ സംസ്ഥാനം വിട്ടതായി പൊലീസ് ഏറെക്കുറെ ഉറപ്പിച്ചിട്ടുണ്ട്. വിവാഹവാഗ്ദാനം നൽകി 2021 ഓഗസ്റ്റ് മുതൽ 2023 മാർച്ച് വരെ പലതവണ പീഡിപ്പിച്ചു എന്ന യുവതിയുടെ പരാതിയിലാണ് തൃക്കാക്കര പൊലീസ് ജൂലൈ 31-ന് കേസെടുത്തത്. പുതിയ പാട്ട് പുറത്തിറക്കുന്നതിനായി 31,000 രൂപ നൽകിയിട്ടുണ്ടെന്നും പരാതിയിൽ പറയുന്നു. കോഴിക്കോട്ടും കൊച്ചിയിലും വെച്ച് പീഡനം നടന്നതായി പരാതിയിൽ വ്യക്തമാക്കിയതിനെ തുടർന്നാണ് തൃക്കാക്കര പൊലീസ് കേസ് രജിസ്റ്റർ ചെയ്തത്. തൃക്കാക്കര എ.സി.പിയുടെ നേതൃത്വത്തിൽ രണ്ട് സംഘങ്ങളാണ് വേടനുവേണ്ടി അന്വേഷണം നടത്തുന്നത്.
ബലാത്സംഗ ആരോപണം നിഷേധിച്ച് വേടൻ മുൻകൂർ ജാമ്യത്തിനായി കോടതിയെ സമീപിച്ചിരുന്നു. തന്നെ വ്യക്തിഹത്യ ചെയ്യാനുള്ള ശ്രമമാണ് നടക്കുന്നതെന്നും, പല സ്ത്രീകളും തനിക്കെതിരെ പരാതി നൽകുമെന്ന് ഭീഷണിപ്പെടുത്തിയിരുന്നതായും ജാമ്യാപേക്ഷയിൽ പറയുന്നു. വിവാഹവാഗ്ദാനം നൽകി പീഡിപ്പിച്ചു എന്ന ആരോപണം നിലനിൽക്കില്ലെന്നും, ബന്ധം ഉഭയസമ്മതപ്രകാരമായിരുന്നുവെന്നും വേടൻ വാദിച്ചു. തുടർന്ന് പൊലീസിന്റെ റിപ്പോർട്ട് തേടിയ കോടതി, കേസ് ഓഗസ്റ്റ് 18-ലേക്ക് മാറ്റി.
നേരത്തെ, പുലിനഖം കേസിൽ ജാമ്യം ലഭിച്ചപ്പോൾ കോടതിയിൽ സമർപ്പിച്ച വേടന്റെ പാസ്പോർട്ട് ഉപാധികളോടെ തിരികെ നൽകിയിരുന്നു. ഈ സാഹചര്യത്തിലാണ് ഇപ്പോൾ ലുക്കൗട്ട് നോട്ടിസ് പുറപ്പെടുവിച്ചത്. പൊലീസ് വേടന്റെ വീട്ടിൽ പരിശോധന നടത്തി ഒരു ഫോൺ പിടിച്ചെടുത്ത് ഫോറൻസിക് പരിശോധനയ്ക്ക് അയച്ചിട്ടുണ്ട്. കൊച്ചിയിൽ വെച്ച് നടത്താൻ നിശ്ചയിച്ചിരുന്ന വേടന്റെ ഒരു സംഗീത പരിപാടി അടുത്തിടെ റദ്ദായിരുന്നു.
police-have-issued-a-lookout-notice-for-the-vedan-stating-that-he-may-be-heading-abroad
