കൊച്ചി: വിവിധ കേന്ദ്ര സർക്കാർ പദ്ധതികളുടെ ഉദ്ഘാടനത്തിനും എൻഡിഎയുടെ തിരഞ്ഞെടുപ്പ് പ്രചാരണത്തിനുമായി പ്രധാനമന്ത്രി നരേന്ദ്ര മോദി കേരളത്തിലെത്തി. രാവിലെ 11.30-ഓടെ നെടുമ്പാശ്ശേരി വിമാനത്താവളത്തിലെത്തിയ പ്രധാനമന്ത്രിയെ ഔദ്യോഗിക പ്രതിനിധികൾ സ്വീകരിച്ചു. തുടർന്ന് ഹെലികോപ്റ്ററിൽ നാവികസേനാ വിമാനത്താവളത്തിലെത്തിയ അദ്ദേഹം റോഡ് മാർഗ്ഗം മറൈൻ ഡ്രൈവിലെ ചടങ്ങിലേക്ക് തിരിച്ചു. സന്ദർശനത്തോടനുബന്ധിച്ച് നഗരത്തിൽ കനത്ത സുരക്ഷയാണ് ഏർപ്പെടുത്തിയിരിക്കുന്നത്.
പ്രധാനമന്ത്രിയുടെ സന്ദർശനത്തിനിടെ പ്രതിഷേധ സാധ്യത കണക്കിലെടുത്ത് അഞ്ച് കോൺഗ്രസ് നേതാക്കളെ പൊലീസ് കരുതൽ കസ്റ്റഡിയിലെടുത്തു. കെപിസിസി സെക്രട്ടറി തമ്പി സുബ്രഹ്മണ്യം അടക്കമുള്ള നേതാക്കളെയാണ് കൊച്ചിയിൽ പൊലീസ് കസ്റ്റഡിയിലെടുത്തത്. അദാലത്തിൽ പങ്കെടുക്കാൻ എത്തിയപ്പോൾ അകാരണമായാണ് തങ്ങളെ പിടികൂടിയതെന്ന് നേതാക്കൾ ആരോപിച്ചു. സുരക്ഷാ ക്രമീകരണങ്ങളുടെ ഭാഗമായാണ് നടപടിയെന്ന് പൊലീസ് വൃത്തങ്ങൾ അറിയിച്ചു.
മറൈൻ ഡ്രൈവിൽ നടക്കുന്ന ചടങ്ങിൽ പതിനായിരം കോടി രൂപയുടെ വിവിധ വികസന പദ്ധതികളുടെ ഉദ്ഘാടനം പ്രധാനമന്ത്രി നിർവഹിക്കും. ഇതിന് പിന്നാലെ ഉച്ചയ്ക്ക് ഒരു മണിയോടെ കലൂർ സ്റ്റേഡിയത്തിൽ നടക്കുന്ന എൻഡിഎയുടെ തിരഞ്ഞെടുപ്പ് റാലിയിലും അദ്ദേഹം പങ്കെടുക്കും. കേരളത്തിലെ നിയമസഭാ തിരഞ്ഞെടുപ്പിനുള്ള എൻഡിഎയുടെ ഔദ്യോഗിക പ്രചാരണ പ്രവർത്തനങ്ങൾക്ക് ഈ റാലിയോടെ തുടക്കമാകും. വൻ ജനപങ്കാളിത്തമാണ് രാഷ്ട്രീയ കൺവെൻഷനായി കൊച്ചിയിൽ ഒരുക്കിയിരിക്കുന്നത്.
കൊച്ചിയിലെ പരിപാടികൾക്ക് ശേഷം ഉച്ചയ്ക്ക് 2.30-ഓടെ പ്രധാനമന്ത്രി തമിഴ്നാട്ടിലെ തിരുച്ചിറപ്പള്ളിയിലേക്ക് തിരിക്കും. വൈകീട്ട് 5.45-ന് തിരുച്ചിറപ്പള്ളിയിൽ 5,650 കോടി രൂപയുടെ വികസന പദ്ധതികൾ അദ്ദേഹം നാടിന് സമർപ്പിക്കും. തുടർന്ന് അവിടെയും എൻഡിഎ സംഘടിപ്പിക്കുന്ന പൊതുസമ്മേളനത്തിൽ അദ്ദേഹം പ്രസംഗിക്കും. ഈ മാസത്തിനിടെ രണ്ടാം തവണയാണ് പ്രധാനമന്ത്രി തമിഴ്നാട് സന്ദർശിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
PM holds roadshow in Kerala, Kochi
