തിരുവനന്തപുരം: രാഷ്ട്രീയ കേരളത്തിന്റെ നായകനും മലയാള സിനിമയുടെ നായകനും നേർക്കുനേർ എത്തുമ്പോൾ എന്തൊക്കെയാകും സംഭവിക്കുക? മുഖ്യമന്ത്രി പിണറായി വിജയനും നടൻ മോഹൻലാലും ഒന്നിക്കുന്ന ‘ഇരുവർ’ എന്ന പ്രത്യേക അഭിമുഖത്തിന്റെ ടീസർ പുറത്തിറങ്ങിയതോടെ സോഷ്യൽ മീഡിയയിൽ വലിയ ചർച്ചകൾക്കാണ് വഴിതുറന്നിരിക്കുന്നത്. കൗതുകകരമായ ചോദ്യങ്ങളും അതിലേറെ രസകരമായ മറുപടികളുമാണ് ടീസറിൽ നിറഞ്ഞുനിൽക്കുന്നത്.
സിനിമയെക്കുറിച്ചുള്ള മോഹൻലാലിന്റെ ചോദ്യങ്ങളോടെയാണ് ടീസർ ആരംഭിക്കുന്നത്. മുഖ്യമന്ത്രിക്ക് ഏറ്റവും ഇഷ്ടപ്പെട്ടത് രജനീകാന്ത് ചിത്രമാണെന്നും അതും ആക്ഷൻ പടങ്ങളാണെന്നും ഒരു സുഹൃത്ത് രഹസ്യമായി പറഞ്ഞല്ലോ എന്ന ലാലിന്റെ ചോദ്യത്തിന്, താൻ ആക്ഷൻ പടങ്ങൾ ഇഷ്ടപ്പെടുന്ന ആളാണെന്ന് ചിരിച്ചുകൊണ്ട് മുഖ്യമന്ത്രി മറുപടി നൽകുന്നു. എന്നാൽ സിനിമയിലെ ആക്ഷൻ രംഗങ്ങൾ ജീവിതത്തിൽ പകർത്തിയിട്ടുണ്ടോ എന്ന ചോദ്യത്തിന് അത്തരത്തിൽ ശ്രമിക്കാറില്ലെന്നാണ് അദ്ദേഹം വ്യക്തമാക്കുന്നത്.
ജീവിതത്തിൽ എന്തിന്റെയെങ്കിലും പേരിൽ പശ്ചാത്തപിച്ചിട്ടുണ്ടോ എന്ന ഗൗരവകരമായ ചോദ്യത്തിന് മുഖ്യമന്ത്രി നൽകുന്ന മറുപടിയും ടീസറിലുണ്ട്. തന്റെ ഏതെങ്കിലും സിനിമാ ഡയലോഗുകൾ ഓർമ്മയുണ്ടോ എന്ന മോഹൻലാലിന്റെ ചോദ്യത്തിന് “ദാസനും വിജയനും ഒക്കെ അവിടെ കിടക്കുകയല്ലേ” എന്ന മുഖ്യമന്ത്രിയുടെ തമാശ കലർന്ന മറുപടി ഏറെ ശ്രദ്ധേയമാണ്. “എന്റെ കേരളം, അങ്ങയുടെ കേരളം, നമ്മുടെ കേരളം” എന്ന് മോഹൻലാൽ പറയുന്നിടത്താണ് ആവേശം ജനിപ്പിക്കുന്ന ഈ ടീസർ അവസാനിക്കുന്നത്. പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന ഈ അഭിമുഖം ഉടൻ സംപ്രേക്ഷണം ചെയ്യും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Pinarayi Vijayan and Mohanlal’s ‘Iruvar’ Interview
