കാൽഗറി: കാനഡയിലെ കൺസർവേറ്റീവ് പാർട്ടി നേതൃത്വത്തിൽ പിയറി പൊയിലീവ്രെയുടെ സ്ഥാനം സുരക്ഷിതം. കാൽഗറിയിൽ നടന്ന പാർട്ടിയുടെ വാർഷിക കൺവെൻഷനിലെ നേതൃത്വ വോട്ടെടുപ്പിൽ 87.4 ശതമാനം വോട്ട് നേടിയാണ് അദ്ദേഹം വിജയിച്ചത്. ശനിയാഴ്ച പുലർച്ചെയാണ് വോട്ടെടുപ്പ് ഫലം ഔദ്യോഗികമായി പുറത്തുവിട്ടത്. 95 ശതമാനത്തോളം പ്രതിനിധികൾ വോട്ടെടുപ്പിൽ പങ്കെടുത്തതായും പാർട്ടി വക്താവ് അറിയിച്ചു. 2022 സെപ്റ്റംബറിൽ പാർട്ടി തലപ്പത്തെത്തിയ പൊയിലീവ്രെ നേരിട്ട ഏറ്റവും വലിയ പരീക്ഷണമായിരുന്നു ഈ വോട്ടെടുപ്പ്.
നേതൃത്വ വോട്ടെടുപ്പിന് മുന്നോടിയായി നടന്ന പ്രസംഗത്തിൽ ലിബറൽ സർക്കാരിന്റെ നയങ്ങൾക്കെതിരെ പൊയിലീവ്രെ രൂക്ഷമായ വിമർശനം ഉന്നയിച്ചു. വർധിച്ചുവരുന്ന നികുതി, യുവജനങ്ങളിലെ തൊഴിലില്ലായ്മ, നിത്യോപയോഗ സാധനങ്ങളുടെ വിലക്കയറ്റം എന്നിവയ്ക്ക് കാരണം ലിബറൽ സർക്കാരാണെന്ന് അദ്ദേഹം ആരോപിച്ചു. കാനഡയിലെ നിലവിലെ സാഹചര്യത്തിൽ ജനങ്ങൾക്ക് ജീവിതച്ചെലവ് താങ്ങാൻ കഴിയില്ലെന്നും 10 വർഷത്തെ ലിബറൽ ഭരണത്തിന് കീഴിൽ രാജ്യം വിഭജിക്കപ്പെട്ടുവെന്നും അദ്ദേഹം കുറ്റപ്പെടുത്തി.
കാനഡയുടെ പരമാധികാരം സംരക്ഷിക്കുന്നതിനുള്ള ‘Canadian Sovereignty Act’ നടപ്പിലാക്കുമെന്നും അദ്ദേഹം പ്രഖ്യാപിച്ചു. വ്യാവസായ മേഖലയിലെ കാർബൺ വില നിശ്ചയിക്കൽ, എണ്ണ-വാതക മേഖലയിലെ നിയന്ത്രണങ്ങൾ തുടങ്ങിയ ലിബറൽ നിയമങ്ങൾ പിൻവലിക്കുമെന്ന് അദ്ദേഹം വാഗ്ദാനം ചെയ്തു. കാനഡയിൽ വീണ്ടും നിക്ഷേപം നടത്തുന്ന ബിസിനസ് സ്ഥാപനങ്ങൾക്ക് ക്യാപിറ്റൽ ഗെയിൻസ് ടാക്സ് ഒഴിവാക്കുമെന്നും അദ്ദേഹം വ്യക്തമാക്കി. മുൻ പ്രധാനമന്ത്രി സ്റ്റീഫൻ ഹാർപ്പർക്ക് 2005-ൽ ലഭിച്ച 84 ശതമാനം പിന്തുണയെക്കാൾ ഉയർന്ന നിലവാരത്തിലാണ് പൊയിലീവ്രെയുടെ ഇപ്പോഴത്തെ വിജയം.
കഴിഞ്ഞ ഏപ്രിലിലെ ഫെഡറൽ തിരഞ്ഞെടുപ്പിൽ കൺസർവേറ്റീവ് പാർട്ടിക്ക് കൂടുതൽ സീറ്റുകൾ നേടാനായെങ്കിലും മൊത്തത്തിലുള്ള പരാജയത്തെ തുടർന്നാണ് പാർട്ടി ചട്ടപ്രകാരം നേതൃത്വ വോട്ടെടുപ്പ് നടന്നത്. അതേസമയം, പ്രധാനമന്ത്രി പദത്തിലേക്കുള്ള ജനപ്രീതിയിൽ ലിബറൽ നേതാവ് മാർക്ക് കാർണി പൊയിലീവ്രെക്കാൾ മുന്നിലാണെന്ന് നാനോസ് റിസർച്ച് പുറത്തുവിട്ട പുതിയ കണക്കുകൾ വ്യക്തമാക്കുന്നു. കാർണിക്ക് 52.8 ശതമാനം പിന്തുണ ലഭിച്ചപ്പോൾ പൊയിലീവ്രെക്ക് 24.8 ശതമാനം പിന്തുണ മാത്രമാണുള്ളത്.
തിരഞ്ഞെടുപ്പ് ലക്ഷ്യമിട്ടുള്ള പ്രവർത്തനങ്ങൾക്കായി 2025-ൽ റെക്കോർഡ് തുക കൺസർവേറ്റീവ് പാർട്ടി സമാഹരിച്ചിട്ടുണ്ട്. 3,27,000 സംഭാവനകളിലൂടെ ഏകദേശം 48 മില്യൺ ഡോളറാണ് സമാഹരിച്ചത്. ലിബറൽ പാർട്ടി ഇതേ കാലയളവിൽ 29 മില്യൺ ഡോളറാണ് സമാഹരിച്ചത്. 2026-ൽ ഒരു പൊതുതിരഞ്ഞെടുപ്പിന് സാധ്യതയുണ്ടെന്ന് കൺസർവേറ്റീവ് കാമ്പയിൻ മാനേജർ സ്റ്റീവ് ഔട്ട്ഹൗസ് സൂചന നൽകി. വരും ദിവസങ്ങളിൽ കൂടുതൽ ജനകീയ വിഷയങ്ങൾ ഉന്നയിച്ച് പോരാട്ടം തുടരുമെന്ന് പൊയിലീവ്രെ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Pierre Poilievre wins big in leadership vote; Conservative Party with 87.4 percent support
