പ്രിൻസ് എഡ്വാർഡ് ഐലൻഡ് നാഷണൽ പാർക്കിലെ ഓഷ്യൻവ്യൂ ക്ലിഫ് ഏരിയകൾ അടച്ചതായി പാർക്സ് കാനഡ അറിയിച്ചു. അപകട സാധ്യത കണക്കിലെടുത്താണ് ഈ നടപടി. സുരക്ഷാ ക്രമീകരണങ്ങൾ അവഗണിച്ച് ആളുകൾ ഈ ഭാഗങ്ങളിലേക്ക് പ്രവേശിക്കുന്നത് ശ്രദ്ധയിൽപ്പെട്ടതിനെ തുടർന്നാണ് അധികൃതർക്ക് ഇങ്ങനെയൊരു തീരുമാനമെടുക്കേണ്ടി വന്നത്. കാവൻഡിഷ് ബീച്ചിന് സമീപമുള്ള ഈ പ്രദേശം ചുവന്ന മണൽക്കൽ പാറകൾക്കും, സെന്റ് ലോറൻസ് ഉൾക്കടലിന്റെ മനോഹരമായ കാഴ്ചകൾക്കും പേരുകേട്ടതാണ്.
നിരവധി തവണ മുന്നറിയിപ്പുകൾ നൽകിയിട്ടും ആളുകൾ ക്ലിഫുകളിൽ കയറുകയും, വേലികളും സുരക്ഷാ റോപ്പുകളും മറികടന്ന് അപകടകരമായ സ്ഥലങ്ങളിലേക്ക് പ്രവേശിക്കുകയും ചെയ്യുന്നുണ്ടെന്ന് പാർക്സ് കാനഡ അധികൃതർ വ്യക്തമാക്കി. ഈ സാഹചര്യത്തിൽ, ജൂലൈ മാസം മുതൽ പാർക്കിന്റെ ഈ ഭാഗം പൂർണ്ണമായും അടച്ചുപൂട്ടാൻ തീരുമാനമെടുത്തു. മണൽക്കല്ലുകൾ അപകടകരവും എപ്പോൾ വേണമെങ്കിലും ഇടിഞ്ഞുവീഴാൻ സാധ്യതയുള്ളവയുമാണ്. അതിനാൽ സന്ദർശകർ നിർദ്ദിഷ്ട പാതകളിലൂടെ മാത്രം സഞ്ചരിക്കണമെന്നും അധികൃതർ സാമൂഹ്യ മാധ്യമങ്ങളിലൂടെ അഭ്യർത്ഥിച്ചു.
അടച്ചിട്ട സ്ഥലങ്ങളിൽ അതിക്രമിച്ചു കയറുന്നവർക്ക് നാഷണൽ പാർക്ക്സ് ജനറൽ റെഗുലേഷൻസ് പ്രകാരം കുറഞ്ഞത് 150 ഡോളർ പിഴ ചുമത്തുമെന്ന് പാർക്ക് അധികൃതർ മുന്നറിയിപ്പ് നൽകി. അതേസമയം, പുതുതായി നിർമ്മിച്ച ഓഷ്യൻവ്യൂ ലുക്കൗട്ട് പ്ലാറ്റ്ഫോം സന്ദർശകർക്കായി തുറന്നിരിക്കും. ഇവിടെ നിന്ന് സുരക്ഷിതമായി പ്രകൃതിഭംഗി ആസ്വദിക്കാനുള്ള സൗകര്യം ഒരുക്കിയിട്ടുണ്ടെന്നും പാർക്സ് കാനഡ അറിയിച്ചു. സുരക്ഷാ മാനദണ്ഡങ്ങൾ പാലിച്ച് പാർക്ക് സന്ദർശിക്കണമെന്ന് അധികൃതർ പൊതുജനങ്ങളോട് അഭ്യർത്ഥിച്ചു.
PEI Oceanview Cliff Areas Closed Due to Safety Concern
