ലോകമെമ്പാടുമുള്ള ഓൺലൈൻ പണമിടപാടുകൾക്ക് ഏറ്റവും കൂടുതൽ ആളുകൾ ആശ്രയിക്കുന്ന പ്ലാറ്റ്ഫോമാണ് പേപാൽ. എന്നാൽ കഴിഞ്ഞ കുറച്ച് മണിക്കൂറുകളായി ജർമ്മനിയിലെ പേപാൽ ഉപയോക്താക്കൾക്ക് തങ്ങളുടെ സേവനങ്ങൾ ഉപയോഗിക്കാൻ കഴിയുന്നില്ല. പണം അയക്കാനും സ്വീകരിക്കാനും സാധിക്കാതെ വന്നതോടെ ഉപയോക്താക്കൾ കടുത്ത പ്രതിസന്ധിയിലായി. ഓൺലൈൻ ഷോപ്പിംഗ്, ബില്ലുകൾ അടയ്ക്കൽ തുടങ്ങിയ ദൈനംദിന കാര്യങ്ങൾക്കായി പേപാലിനെ ആശ്രയിക്കുന്ന ആയിരക്കണക്കിന് ആളുകളാണ് ഈ തടസ്സം കാരണം വലയുന്നത്.
പേപാലിന്റെ സേവനങ്ങൾ തടസ്സപ്പെട്ടതിനാൽ ഇതേ തുടർന്ന് കോടിക്കണക്കിന് യൂറോയുടെ ഇടപാടുകളാണ് നിലച്ചത്. പേപാലിന്റെ സുരക്ഷാ സംവിധാനത്തിലുണ്ടായ പിഴവാണ് ഈ തകരാറിന് കാരണമെന്ന് റിപ്പോർട്ട്. റിപ്പോർട്ടുകൾ പ്രകാരം, 10 ബില്യൻ യൂറോയിലധികം മരവിപ്പിച്ചു. ബയറിഷെ ലാൻഡെസ്ബാങ്ക് ഏകദേശം 4 ബില്യൻ യൂറോയുടെ പേപാൽ ഇടപാടുകൾ തടഞ്ഞുവച്ചപ്പോൾ, ഡിസെഡ് ബാങ്കും മറ്റ് ധനകാര്യ സ്ഥാപനങ്ങളും ഇടപാടുകൾ നിർത്തിവച്ചു. ഇത് വ്യാപാരികളെയും ഉപഭോക്താക്കളെയും ഒരുപോലെ പ്രതിസന്ധിയിലാക്കി.
പേപാൽ സേവനങ്ങളിലെ ഈ സാങ്കേതിക പ്രശ്നം കാരണം നിരവധി പേർക്ക് അടിയന്തര സാമ്പത്തിക കാര്യങ്ങൾ നിർവഹിക്കാൻ കഴിഞ്ഞില്ല. പേപാൽ ആപ്ലിക്കേഷനും വെബ്സൈറ്റും ഒരുപോലെയാണ് തകരാറിലായത്. പണം അയക്കാൻ ശ്രമിക്കുമ്പോൾ “സാങ്കേതിക പിഴവ്” എന്ന സന്ദേശം കാണിക്കുന്നുണ്ടെന്ന് ഉപയോക്താക്കൾ സോഷ്യൽ മീഡിയയിൽ പരാതിപ്പെട്ടു. എന്നാൽ ഈ പ്രശ്നത്തിന് പിന്നിലെ കാരണം എന്താണെന്ന് പേപാൽ ഔദ്യോഗികമായി ഇതുവരെ അറിയിച്ചിട്ടില്ല.
സേവനങ്ങൾ തടസ്സപ്പെട്ടതിന് ശേഷം നിരവധി ഉപയോക്താക്കൾ പേപാലിന്റെ ഔദ്യോഗിക സോഷ്യൽ മീഡിയ അക്കൗണ്ടുകളിൽ പരാതികളുമായി രംഗത്തെത്തി. എന്നാൽ ഈ വിഷയത്തിൽ പേപാൽ ഇതുവരെ പ്രതികരിച്ചിട്ടില്ല. സാധാരണയായി സാങ്കേതിക തകരാറുകൾ ഉണ്ടാകുമ്പോൾ ഉപയോക്താക്കൾക്ക് വിവരങ്ങൾ നൽകാനും പ്രശ്നം പരിഹരിക്കാനുള്ള സമയം അറിയിക്കാനും കമ്പനികൾ ശ്രദ്ധിക്കാറുണ്ട്. എന്നാൽ പേപാലിന്റെ ഭാഗത്ത് നിന്ന് ഒരു പ്രതികരണവുമില്ലാത്തത് ഉപയോക്താക്കളെ കൂടുതൽ ആശങ്കയിലാക്കുന്നു.
ഈ വിഷയത്തിൽ പേപാൽ ഉടൻ തന്നെ പ്രതികരിക്കുമെന്നും, സേവനങ്ങൾ എത്രയും വേഗം പുനഃസ്ഥാപിക്കുമെന്നും പ്രതീക്ഷിക്കുന്നു. ഉപയോക്താക്കളുടെ സാമ്പത്തിക സുരക്ഷിതത്വത്തെയും വിശ്വാസത്തെയും ബാധിക്കുന്ന ഒരു പ്രശ്നമായതുകൊണ്ട് ഈ വിഷയത്തിന് വലിയ പ്രാധാന്യമുണ്ട്.
paypal-banking-failure-in-germany
