പാർലമെന്റ് കത്തും! റഷ്യൻ ബന്ധം ഉപേക്ഷിച്ചോ? ട്രംപിന് മുന്നിൽ ഇന്ത്യ മുട്ടുമടക്കിയെന്ന് പ്രതിപക്ഷം; വൻ പ്രതിഷേധത്തിന് സാധ്യത

ഇന്ത്യ-അമേരിക്ക വ്യാപാര കരാറിനെച്ചൊല്ലി പാർലമെന്റിൽ പ്രതിഷേധം ശക്തമാക്കാൻ പ്രതിപക്ഷ സഖ്യമായ ‘ഇന്ത്യ’ തീരുമാനിച്ചു. അമേരിക്കൻ പ്രസിഡന്റ് ഡോണൾഡ് ട്രംപിന്റെ സമ്മർദ്ദത്തിന് വഴങ്ങി ഇന്ത്യ റഷ്യയിൽ നിന്നുള്ള എണ്ണ ഇറക്കുമതി നിർത്തിയോ എന്ന വിഷയത്തിലാണ് പ്രതിപക്ഷം പ്രധാനമായും കേന്ദ്ര സർക്കാരിനെ പ്രതിക്കൂട്ടിലാക്കുന്നത്. വിഷയത്തിൽ വ്യക്തത ആവശ്യപ്പെട്ട് ഇരുസഭകളിലും നോട്ടീസ് നൽകാനാണ് പ്രതിപക്ഷ നീക്കം.

അമേരിക്കയുടെ ഭീഷണിക്ക് മുൻപിൽ ഇന്ത്യ കീഴടങ്ങിയെന്നും ഇത് രാജ്യത്തിന്റെ താൽപ്പര്യങ്ങൾക്ക് വിരുദ്ധമാണെന്നും പ്രതിപക്ഷ നേതാക്കൾ ആരോപിക്കുന്നു. ട്രംപിന്റെ താരിഫ് ഇളവ് ഉത്തരവിൽ, റഷ്യയിൽ നിന്നുള്ള എണ്ണ വാങ്ങുന്നത് ഇന്ത്യ അവസാനിപ്പിച്ചതായി രേഖപ്പെടുത്തിയത് വലിയ വിവാദത്തിന് വഴിവെച്ചിട്ടുണ്ട്. രാജ്യത്തിന്റെ പരമാധികാരം പണയപ്പെടുത്തിയോ എന്ന ചോദ്യം ഉന്നയിച്ച് സഭാനടപടികൾ തടസ്സപ്പെടുത്താനാണ് പ്രതിപക്ഷത്തിന്റെ നീക്കം.

അതേസമയം, ഏപ്രിൽ മാസം മുതൽ റഷ്യൻ എണ്ണ വാങ്ങുന്നത് ഇന്ത്യൻ ഓയിൽ കോർപ്പറേഷൻ (IOC), ഭാരത് പെട്രോളിയം (BPCL), റിലയൻസ് തുടങ്ങിയ പ്രമുഖ കമ്പനികൾ നിർത്തിയതായി റോയിട്ടേഴ്സ് റിപ്പോർട്ട് ചെയ്തു. നിലവിലുള്ള കരാർ കാലാവധി മാർച്ച് വരെ മാത്രമാണെന്നും അതിനുശേഷം പുതിയ കരാറുകളിൽ കമ്പനികൾ ഒപ്പിട്ടിട്ടില്ലെന്നുമാണ് സൂചന. ഈ റിപ്പോർട്ടുകൾ പുറത്തുവന്നത് പ്രതിപക്ഷത്തിന്റെ ആരോപണങ്ങൾക്ക് മൂർച്ച കൂട്ടിയിട്ടുണ്ട്.

എന്നാൽ, ഇന്ത്യ-അമേരിക്ക വ്യാപാര കരാർ രാജ്യത്തിന്റെ സാമ്പത്തിക കരുത്തിന്റെ അടയാളമാണെന്നാണ് പ്രധാനമന്ത്രി നരേന്ദ്ര മോദി മലേഷ്യയിൽ വ്യക്തമാക്കിയത്. സമ്മർദ്ദങ്ങൾക്ക് വഴങ്ങിയല്ല, മറിച്ച് രാജ്യതാൽപര്യം മുൻനിർത്തിയാണ് നീക്കങ്ങളെന്നാണ് സർക്കാർ വൃത്തങ്ങളുടെ വിശദീകരണം. കഴിഞ്ഞ ആഴ്ച ജനറൽ എം.എം നരവനെയുടെ പുസ്തകവുമായി ബന്ധപ്പെട്ട തർക്കത്തിൽ ലോക്സഭ തടസ്സപ്പെട്ടതിന് പിന്നാലെയാണ് പുതിയ കരാർ വിഷയം സഭയെ വീണ്ടും പ്രക്ഷുബ്ധമാക്കുന്നത്.

ഇന്ന് ബജറ്റ് ചർച്ച ആരംഭിക്കാനിരിക്കെ, പ്രതിപക്ഷം സഭയുമായി സഹകരിക്കണമോ എന്ന കാര്യത്തിൽ ഇന്ത്യ സഖ്യത്തിൽ ഭിന്നത നിലനിൽക്കുന്നുണ്ട്. ചർച്ചയിൽ പങ്കെടുക്കണമെന്ന് ചില പാർട്ടികൾ ആവശ്യപ്പെടുമ്പോൾ, പ്രതിഷേധം തുടരണമെന്നാണ് വലിയൊരു വിഭാഗത്തിന്റെ നിലപാട്. ഇക്കാര്യത്തിൽ അന്തിമ തീരുമാനമെടുക്കാൻ ഇന്ന് രാവിലെ പ്രതിപക്ഷ പാർട്ടികളുടെ നിർണ്ണായക യോഗം ചേരും.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Has Russia abandoned its relationship? Opposition says India has bowed down to Trump; Massive protest likely in Parliament