“യുനെസ്കോ അമേരിക്കയ്ക്ക് വേണ്ട!” – ഒരു ഞെട്ടലോടെയാണ് ഈ വാർത്ത ലോകം കേട്ടത്. ഡൊണാൾഡ് ട്രംപിന്റെ ഭരണകൂടം വീണ്ടും യുനെസ്കോയിൽ നിന്ന് പിന്മാറുകയാണെന്ന് പ്രഖ്യാപിച്ചിരിക്കുന്നു. “വിഭജനമുണ്ടാക്കുന്ന ആശയങ്ങൾ” യുനെസ്കോ പ്രചരിപ്പിക്കുന്നു എന്നാരോപിച്ചാണ് ഈ നീക്കം. ഇത് വെറും ഒരു തീരുമാനമല്ല, മറിച്ച് ട്രംപിന്റെ “അമേരിക്ക ഫസ്റ്റ്” എന്ന നയത്തിൻ്റെ ശക്തമായ ഒരു പ്രഖ്യാപനം കൂടിയാണ്.
ട്രംപിന്റെ ഈ നീക്കം പലർക്കും ഒരു Deja Vu ആയി തോന്നിയേക്കാം. കാരണം, 2017-ൽ അദ്ദേഹത്തിന്റെ ആദ്യ ഭരണകാലത്തും ഇതേ കാരണം പറഞ്ഞ് യു.എസ്. പിന്മാറിയിരുന്നു. പിന്നീട് ജോ ബൈഡൻ്റെ ഭരണത്തിൽ യു.എസ്. തിരിച്ചെത്തി. ഇപ്പോഴിതാ ചരിത്രം വീണ്ടും ആവർത്തിക്കുന്നു! എന്നാൽ ഈ തവണത്തെ പിന്മാറ്റം 2026 ഡിസംബറിലെ പ്രാബല്യത്തിൽ വരികയുള്ളൂ.
യു.എസ്. സ്റ്റേറ്റ് ഡിപ്പാർട്ട്മെൻ്റ് ഈ തീരുമാനത്തിന് രണ്ട് പ്രധാന കാരണങ്ങളാണ് പറയുന്നത്. ഒന്ന്, യുനെസ്കോയുടെ “ആഗോള ആശയങ്ങൾ” അമേരിക്കൻ താൽപര്യങ്ങൾക്ക് എതിരാണ്. രണ്ടാമത്തെയും പ്രധാനപ്പെട്ടതുമായ കാരണം, 2011-ൽ യുനെസ്കോ പാലസ്തീന് അംഗത്വം നൽകിയതാണ്. ഇത് ഇസ്രായേലിനെതിരായ ഒരു നീക്കമായി യു.എസ്. കാണുന്നു. എന്നാൽ ഈ ആരോപണങ്ങൾ യുനെസ്കോ ഡയറക്ടർ ജനറൽ ഓഡ്രി അസോളെ തള്ളിക്കളഞ്ഞു. ഹോളോകോസ്റ്റ് വിദ്യാഭ്യാസത്തിന് യുനെസ്കോ നൽകുന്ന പ്രാധാന്യം അവർ എടുത്തുപറഞ്ഞു.
യു.എസ്സിന്റെ ഈ പിന്മാറ്റം യുനെസ്കോയെ എങ്ങനെ ബാധിക്കും? നേരത്തെ, യുനെസ്കോയുടെ ബഡ്ജറ്റിന്റെ 8% യു.എസ്. ആണ് നൽകിയിരുന്നത്. പിന്മാറ്റം പ്രതീക്ഷിച്ചിരുന്നതിനാൽ യുനെസ്കോ മറ്റ് വഴികളിലൂടെ ഫണ്ട് കണ്ടെത്താൻ തുടങ്ങിയിട്ടുണ്ട്. എങ്കിലും, യുനെസ്കോയുടെ പല പരിപാടികളിലും സഹകരിക്കുന്ന അമേരിക്കയിലെ സ്ഥാപനങ്ങളെ ഇത് ബാധിക്കാൻ സാധ്യതയുണ്ട്. ട്രംപിന്റെ ഈ തീരുമാനം അന്താരാഷ്ട്ര തലത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്.
Palestine issue under discussion again; US cuts ties with UNESCO
