ഷാർലറ്റ്ടൗൺ: പ്രിൻസ് എഡ്വേർഡ് ഐലൻഡിൽ (പി.ഇ.ഐ.) വാഹനങ്ങൾക്ക് ഇഷ്ടാനുസൃത നമ്പർ പ്ലേറ്റുകൾ (Personalized licence plates) അനുവദിക്കുന്നതിൽ കർശന നിയന്ത്രണം തുടരുന്നു. എന്നാൽ, മുൻ വർഷങ്ങളെ അപേക്ഷിച്ച് 2025-ൽ അപേക്ഷകൾ നിരസിക്കപ്പെടുന്നതിൽ വലിയ കുറവ് രേഖപ്പെടുത്തി. ഈ വർഷം ഇതുവരെ 15 അപേക്ഷകൾ മാത്രമാണ് അധികൃതർ തള്ളിക്കളഞ്ഞത്. മോട്ടോർ വാഹന രജിസ്ട്രാർ ജോൺ ഫ്ലഡ് ആണ് ഇത് സംബന്ധിച്ച വിവരങ്ങൾ പുറത്തുവിട്ടത്.
ഓരോ അപേക്ഷയും വകുപ്പ് സൂക്ഷ്മമായി പരിശോധിക്കുന്നുണ്ടെന്നും നിയമപാലകർക്ക് വ്യക്തമായി വായിക്കാൻ കഴിയുന്നതും പൊതുമര്യാദകൾ ലംഘിക്കാത്തതുമായ പ്ലേറ്റുകൾ മാത്രമേ അനുവദിക്കൂ എന്നും അദ്ദേഹം വ്യക്തമാക്കി. അപേക്ഷകർക്ക് നിയമങ്ങളെയും നിബന്ധനകളെയും കുറിച്ച് കൂടുതൽ അവബോധം ലഭിക്കുന്നതാണ് നിരസിക്കപ്പെടുന്ന അപേക്ഷകളുടെ എണ്ണം കുറയാൻ കാരണമെന്നാണ് വിലയിരുത്തൽ.
അക്രമം, വിവേചനം, മതപരമായ സന്ദേശങ്ങൾ, അശ്ലീലം അല്ലെങ്കിൽ നിയമവിരുദ്ധ പ്രവർത്തനങ്ങളെ പ്രോത്സാഹിപ്പിക്കുന്ന വാക്കുകൾ എന്നിവ നമ്പർ പ്ലേറ്റുകളിൽ ഉപയോഗിക്കാൻ അനുവാദമില്ല. ഇത്തവണ നിരസിക്കപ്പെട്ടവയിൽ ‘L0LIFE’, ‘DCHEBAG’, ‘SAVAGE’, ‘2FNFAST’, ‘ZR0FKS’ തുടങ്ങിയ പദങ്ങൾ ഉൾപ്പെട്ട അപേക്ഷകളുണ്ട്. അക്ഷരങ്ങളും അക്കങ്ങളും തമ്മിലുള്ള വ്യക്തതയില്ലായ്മയും അപേക്ഷകൾ തള്ളാൻ കാരണമായിട്ടുണ്ട്.
കഴിഞ്ഞ വർഷങ്ങളിൽ വലിയ തോതിലുള്ള അപേക്ഷകളാണ് അധികൃതർ നിരസിച്ചിരുന്നത്. 2024-ൽ 40 അപേക്ഷകളും, 2023-ൽ 113 എണ്ണവും, 2022-ൽ 102 അപേക്ഷകളുമാണ് തള്ളിയത്. ഈ കണക്കുകളുമായി താരതമ്യം ചെയ്യുമ്പോൾ 2025-ൽ വലിയ മാറ്റമാണ് ദൃശ്യമാകുന്നത്. ഒരു അപേക്ഷയിൽ മൂന്ന് ഓപ്ഷനുകൾ വരെ സമർപ്പിക്കാൻ അപേക്ഷകർക്ക് അവസരമുണ്ട്.
മാനദണ്ഡങ്ങൾ പാലിക്കാത്ത അപേക്ഷകരെ ഉദ്യോഗസ്ഥർ നേരിട്ട് ബന്ധപ്പെട്ട് നിരസിക്കാനുള്ള കാരണം വ്യക്തമാക്കാറുണ്ട്. അവർക്ക് മറ്റൊരു പേര് നിർദ്ദേശിക്കാനുള്ള അവസരവും നൽകാറുണ്ട്. നിലവിൽ സാധാരണ വാഹന രജിസ്ട്രേഷനായി 100 ഡോളറാണ് വാർഷിക ഫീസ്. ഇതിനു പുറമെ ഇഷ്ടാനുസൃത നമ്പർ പ്ലേറ്റ് ലഭിക്കുന്നതിന് 30 ഡോളർ അധികമായി നൽകണം.
p-e-i-government-rejects-15-personalized-licence-plates-in-2025
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
