ഒട്ടാവ: ജീവിതനിലവാരത്തിന്റെ അടിസ്ഥാനത്തിൽ 2026-ലെ ലോകത്തെ ഏറ്റവും മികച്ച നഗരങ്ങളുടെ പട്ടികയിൽ വടക്കേ അമേരിക്കയിൽ നിന്ന് കാനഡയുടെ തലസ്ഥാനമായ ഒട്ടാവ ഒന്നാം സ്ഥാനത്തെത്തി. അന്താരാഷ്ട്ര തലത്തിൽ നഗരങ്ങളുടെ ജീവിതസൗകര്യങ്ങൾ വിലയിരുത്തുന്ന പ്രമുഖ ഡാറ്റാബേസായ ‘നംബിയോ’ (Numbeo) പുറത്തുവിട്ട ക്വാളിറ്റി ഓഫ് ലൈഫ് ഇൻഡക്സിലാണ് (Quality of Life Index) ഒട്ടാവ ഈ നേട്ടം കൈവരിച്ചത്. ആഗോളതലത്തിൽ 28-ാം സ്ഥാനത്താണ് ഒട്ടാവ.
ജീവിതച്ചെലവ്, സുരക്ഷ, ആരോഗ്യസൗകര്യങ്ങൾ, യാത്രാസൗകര്യങ്ങൾ തുടങ്ങിയ വിവിധ ഘടകങ്ങൾ പരിഗണിച്ചാണ് നഗരങ്ങളെ റാങ്ക് ചെയ്തിരിക്കുന്നത്. ഇത്തവണ കാനഡയിലെ 17 നഗരങ്ങൾ പട്ടികയിൽ ഇടംപിടിച്ചു എന്നത് ശ്രദ്ധേയമാണ്. കഴിഞ്ഞ വർഷം ഇത് 14 നഗരങ്ങൾ മാത്രമായിരുന്നു. ബ്രാംപ്ടൺ, ഹാമിൽട്ടൺ, നാനൈമോ എന്നീ നഗരങ്ങളാണ് ഇത്തവണ പുതുതായി പട്ടികയിൽ ഉൾപ്പെട്ടത്.
കാനഡയ്ക്കുള്ളിലെ നഗരങ്ങളുടെ റാങ്കിംഗിൽ കഴിഞ്ഞ വർഷം ഒന്നാമതായിരുന്ന കാൽഗരി ഇത്തവണ അഞ്ചാം സ്ഥാനത്തേക്ക് പിന്തള്ളപ്പെട്ടു. ഒട്ടാവ കഴിഞ്ഞ വർഷത്തെ രണ്ടാം സ്ഥാനത്തുനിന്നാണ് ഒന്നാമതെത്തിയത്. വിക്ടോറിയ, നാനൈമോ, വാൻകൂവർ എന്നിവയാണ് ആദ്യ അഞ്ച് സ്ഥാനങ്ങളിലുള്ള മറ്റ് നഗരങ്ങൾ. അതേസമയം, മിസിസാഗ നഗരം അഞ്ചാം സ്ഥാനത്തുനിന്ന് പന്ത്രണ്ടാം സ്ഥാനത്തേക്ക് വീണത് വലിയ തിരിച്ചടിയായി.
ആഗോളതലത്തിൽ 95 രാജ്യങ്ങളിൽ നിന്നുള്ള 304 നഗരങ്ങളെയാണ് പഠനത്തിന് വിധേയമാക്കിയത്. നെതർലാൻഡ്സ്, ലക്സംബർഗ്, ജർമ്മനി, ഡെന്മാർക്ക് തുടങ്ങിയ യൂറോപ്യൻ രാജ്യങ്ങളിലെ നഗരങ്ങളാണ് പട്ടികയിൽ മുന്നിട്ടുനിൽക്കുന്നത്. വടക്കേ അമേരിക്കൻ മേഖലയിൽ കഴിഞ്ഞ വർഷം യുഎസ് നഗരമായ ബോയിസി (Boise) കൈപ്പിടിയിലാക്കിയ ഒന്നാം സ്ഥാനമാണ് ഇത്തവണ ഒട്ടാവയിലൂടെ കാനഡ തിരിച്ചുപിടിച്ചത്.
ഉപഭോക്താക്കൾ നൽകുന്ന വിവരങ്ങളും വിവിധ ഔദ്യോഗിക സ്രോതസ്സുകളിൽ നിന്നുള്ള ഡാറ്റയും വിശകലനം ചെയ്താണ് നംബിയോ ഈ പട്ടിക തയ്യാറാക്കുന്നത്. വായു മലിനീകരണം, വീട് വാങ്ങാനുള്ള ചെലവ്, ക്രമസമാധാനം തുടങ്ങിയ കാര്യങ്ങൾക്കും റാങ്കിംഗിൽ വലിയ മുൻഗണന നൽകിയിട്ടുണ്ട്. പൗരന്മാരുടെ വാങ്ങൽ ശേഷിയും കാലാവസ്ഥയും ഉൾപ്പെടെയുള്ള എട്ട് പ്രധാന സൂചകങ്ങളാണ് ഇതിനായി ഉപയോഗിച്ചത്.
ottawa-takes-top-spot-in-north-america-for-quality-of-life
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
