ഒട്ടാവ: ഒട്ടാവയിൽ 2024 മാർച്ച് 6-ന് നടന്ന കൂട്ടക്കുത്തിക്കൊലപാതകത്തിൽ ആറ് പേരെ കൊലപ്പെടുത്തിയ പ്രതി ഫെബ്രിനോ ഡി സോയ താൻ കുറ്റക്കാരനാണെന്ന് സമ്മതിച്ചതോടെ കോടതിയിൽ വൈകാരിക നിമിഷങ്ങൾ. നാല് പിഞ്ചുകുഞ്ഞുങ്ങൾ, അവരുടെ അമ്മ, അടുത്ത കുടുംബ സുഹൃത്ത് എന്നിവരുടെ കൊലപാതകത്തിലൂടെ തകർന്നുപോയ രണ്ട് കുടുംബങ്ങളുടെ ചിത്രം കോടതിയിൽ വ്യക്തമായി. കാനഡയിൽ മികച്ച ജീവിതം സ്വപ്നം കണ്ട് എത്തിയവരായിരുന്നു കൊല്ലപ്പെട്ട വിക്രമസിംഗെ, അമരക്കൂൺ കുടുംബാംഗങ്ങൾ. പ്രതി കുറ്റസമ്മതം നടത്തിയ വേളയിൽ, ഇരകളുടെ പേരുകൾ ഓർമ്മിക്കണമെന്നും, കുട്ടികളുടെ പിതാവിൻ്റെ ധീരതയും സുഹൃത്തിൻ്റെ കുടുംബത്തോടുള്ള സ്നേഹവും എടുത്ത് പറയണമെന്നും പ്രോസിക്യൂഷൻ (ക്രൗൺ) ആവശ്യപ്പെട്ടു.
കൊല്ലപ്പെട്ട ഗമനി അമരക്കൂണിൻ്റെ വിധവയായ ദിഷാനി ഫെർണാണ്ടോ ശ്രീലങ്കയിൽ നിന്ന് വീഡിയോ കോൺഫറൻസിങ് വഴി കോടതിയിൽ തൻ്റെ ഇംപാക്ട് സ്റ്റേറ്റ്മെൻ്റ് (Victim Impact Statement) വായിച്ചു. “എൻ്റെ ഭർത്താവാണ് ഞങ്ങളുടെ കുടുംബത്തെ താങ്ങിനിർത്തിയത്. ഞങ്ങൾക്ക് വേണ്ടി, കുട്ടികൾക്ക് വേണ്ടി, അമ്മയ്ക്ക് വേണ്ടി… അദ്ദേഹം അക്ഷീണം പ്രയത്നിച്ചു,” ഫെർണാണ്ടോ പറഞ്ഞു. തങ്ങൾക്ക് എല്ലാം നൽകിയിരുന്ന ഭർത്താവിൻ്റെ നഷ്ടം തങ്ങളെ തകർക്കുകയും നിസ്സഹായരാക്കുകയും ചെയ്തു. വിദേശത്ത് മെച്ചപ്പെട്ട ജീവിതം കെട്ടിപ്പടുക്കാൻ അദ്ദേഹം എടുത്ത എല്ലാ പരിശ്രമങ്ങളും ത്യാഗങ്ങളും നിമിഷങ്ങൾക്കുള്ളിൽ ഇല്ലാതായെന്ന് അമരക്കൂണിൻ്റെ കുടുംബം അറിയിച്ചു. അമരക്കൂണിൻ്റെ 13 വയസ്സുള്ള മകൾ അശേരി അമരക്കൂൺ, തൻ്റെ അച്ഛൻ തൻ്റെ ഹീറോയും ഏറ്റവും വലിയ പിന്തുണയുമായിരുന്നു എന്ന് എഴുതിയത് കോടതിയുടെ കണ്ണ് നനയിച്ചു.
ഭാര്യയെയും നാല് മക്കളെയും (രണ്ട് മാസം മാത്രം പ്രായമുള്ള കെല്ലി, 3 വയസ്സുള്ള രണയ, 4 വയസ്സുള്ള അശ്വിനി, 7 വയസ്സുള്ള ഇനുക), ഉറ്റ സുഹൃത്തിനെയും നഷ്ടപ്പെട്ട ധനുഷ്ക വിക്രമസിംഗെ തൻ്റെ വേദന കോടതിയിൽ പങ്കുവെച്ചു. മക്കൾക്ക് വേണ്ടി ഒരു നല്ല ജീവിതം കെട്ടിപ്പടുക്കാനായി 2021-ൽ ശ്രീലങ്ക വിട്ടതാണ് തൻ്റെ ജീവിതത്തിലെ ഏറ്റവും കഠിനമായ തീരുമാനമെന്ന് അദ്ദേഹം പറഞ്ഞു. “അവസരങ്ങളും ദയയും സൗന്ദര്യവും നിറഞ്ഞ രാജ്യം എന്ന് കേട്ടാണ് ഞാൻ കാനഡ തിരഞ്ഞെടുത്തത്. എൻ്റെ കുടുംബത്തിനായി ഞാൻ ഓരോ ദിവസവും കഠിനാധ്വാനം ചെയ്തു,” അദ്ദേഹം വ്യക്തമാക്കി. ഭാര്യയെയും മക്കളെയും നഷ്ടപ്പെട്ടതിന് പുറമെ, തനിക്കുണ്ടായ ആറ് കുത്തേൽക്കുകയും കൈകൾക്ക് സാരമായ പരിക്കേൽക്കുകയും ചെയ്തതിൻ്റെ ശാരീരിക ബുദ്ധിമുട്ടുകളെക്കുറിച്ചും അദ്ദേഹം വിവരിച്ചു.
തനിക്ക് സഹായം നൽകിയ എല്ലാവർക്കും നന്ദി പറഞ്ഞ ധനുഷ്ക, തൻ്റെ മകൻ ഇനുകയുടെ പേരിൽ അഭിസെസ് ഫൗണ്ടേഷൻ എന്ന പേരിൽ ശ്രീലങ്കയിലെ കുട്ടികളെ സഹായിക്കുന്ന ഒരു ഫൗണ്ടേഷൻ ആരംഭിച്ചതിനെക്കുറിച്ച് സംസാരിച്ചു. മക്കളുടെ പിറന്നാൾ ദിനങ്ങളിൽ ബുദ്ധിമുട്ടുന്ന കുട്ടികൾക്ക് പഠനോപകരണങ്ങൾ സംഭാവന ചെയ്യുന്നു. “മറ്റുള്ളവരെ സഹായിക്കുന്നത് എനിക്ക് കുറച്ചെങ്കിലും ആശ്വാസം നൽകുന്നു,” അദ്ദേഹം പറഞ്ഞു. ധനുഷ്കയുടെ ഈ മഹത്തായ മനസ്സിനെ സുപ്പീരിയർ കോടതി ജസ്റ്റിസ് കെവിൻ ഫിലിപ്സ് പ്രശംസിച്ചു. ഇത്രയും വലിയ മൂല്യങ്ങളുള്ള ഒരു കുടുംബത്തെ നഷ്ടപ്പെട്ടതിലൂടെ സമൂഹം ചെറുതായി എന്നും ജഡ്ജി അഭിപ്രായപ്പെട്ടു.
നീതി ലഭിച്ചതിന് പിന്നാലെ, കാനഡയിൽ തുടരാനുള്ള ധനുഷ്കയുടെ ആഗ്രഹമാണ് ഇപ്പോൾ ശ്രദ്ധാകേന്ദ്രം. അദ്ദേഹത്തിൻ്റെ സ്ഥിരതാമസത്തിനായുള്ള അപേക്ഷ (Permanent Residency) തത്വത്തിൽ അംഗീകരിച്ചിട്ടുണ്ട്. എന്നാൽ കൊലപാതകശേഷം അദ്ദേഹത്തെ പരിചരിക്കാനായി എത്തിയ സഹോദരൻ ചേലക വിക്രമസിംഗെയുടെ വർക്ക് പെർമിറ്റ് അപേക്ഷ ഏപ്രിൽ മുതൽ തീർപ്പായിട്ടില്ല. അപേക്ഷകൾ വേഗത്തിൽ പ്രോസസ്സ് ചെയ്യണമെന്നും, ചേലകയ്ക്ക് ജോലി ചെയ്ത് ഭാര്യയെയും മകളെയും ശ്രീലങ്കയിലേക്ക് പണം അയക്കാൻ കഴിയണമെന്നും, ഭാവിയിൽ അവർക്ക് കാനഡയിൽ ചേരാൻ സാധിക്കണമെന്നും അഭിഭാഷക റോണാലി കാരി ആവശ്യപ്പെട്ടു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
First step towards justice: Ottawa massacre suspect sent to prison; family of victims tearful in court
