ടൊറന്റോ: ഒന്റാറിയോ പ്രവിശ്യയിലെ തൊഴിലാളികളുടെ കുറഞ്ഞ വേതനം വർധിപ്പിച്ചുകൊണ്ടുള്ള ഉത്തരവ് ഔദ്യോഗികമായി പ്രഖ്യാപിച്ചു. നിലവിൽ മണിക്കൂറിന് 17.60 ഡോളറായിരുന്ന വേതനം, 2026 ഒക്ടോബർ ഒന്നു മുതൽ 17.95 ഡോളറായാണ് ഉയരുന്നത്. പണപ്പെരുപ്പ നിരക്കിന്റെ (Consumer Price Index) അടിസ്ഥാനത്തിലാണ് 35 സെന്റിന്റെ (1.9 ശതമാനം) ഈ വർധനവ് സർക്കാർ നടപ്പിലാക്കുന്നത്. ഇതോടെ ഒന്റാറിയോയിലെ റീട്ടെയിൽ, റെസ്റ്റോറന്റ്, ഹോസ്പിറ്റാലിറ്റി മേഖലകളിൽ ജോലി ചെയ്യുന്ന ആയിരക്കണക്കിന് തൊഴിലാളികൾക്ക് ഇതിന്റെ ഗുണഫലം ലഭിക്കും.
വേതന വർധനവ് നടപ്പിലാകുന്നതോടെ ഒരു ഫുൾടൈം തൊഴിലാളിയുടെ ആഴ്ചയിലെ വരുമാനം 718 ഡോളറായും മാസവരുമാനം 2,872 ഡോളറായും വർധിക്കും. വാർഷിക വരുമാനത്തിൽ ഏകദേശം 728 ഡോളറിന്റെ അധിക വർധനവുണ്ടാകും. കൂടാതെ, 18 വയസ്സിൽ താഴെയുള്ള വിദ്യാർത്ഥികളുടെ കുറഞ്ഞ വേതനം 16.60 ഡോളറിൽ നിന്നും 16.90 ഡോളറായി ഉയർത്തിയിട്ടുണ്ട്. വീട്ടിലിരുന്ന് ജോലി ചെയ്യുന്നവർക്ക് (Homeworkers) ഇനി മുതൽ മണിക്കൂറിന് 19.70 ഡോളർ ലഭിക്കും. വനമേഖലയിൽ ജോലി ചെയ്യുന്ന ഗൈഡുകൾക്കും അവരുടെ ജോലി സമയത്തിനനുസരിച്ച് വേതനത്തിൽ മാറ്റം വരുത്തിയിട്ടുണ്ട്.
2018-ൽ 14 ഡോളറായിരുന്ന ഒന്റാറിയോയിലെ വേതനം, പുതിയ വർധനവോടെ 17.95 ഡോളറിലെത്തി നിൽക്കുകയാണ്. ഇത് ഏകദേശം 28.6 ശതമാനത്തിന്റെ വളർച്ചയാണ് കാണിക്കുന്നത്. എന്നിരുന്നാലും, ടൊറന്റോ പോലുള്ള നഗരങ്ങളിൽ ജീവിക്കാൻ ആവശ്യമായ തുകയേക്കാൾ (Living Wage) വളരെ കുറവാണ് പുതിയ വേതനമെന്ന ചർച്ചകളും ഉയരുന്നുണ്ട്. ടൊറന്റോയിൽ ജീവിക്കാൻ ഏകദേശം 27.20 ഡോളർ വേണമെന്നിരിക്കെ, പ്രഖ്യാപിച്ച വേതനം അതിനേക്കാൾ 9 ഡോളറോളം കുറവാണ്. ഒക്ടോബർ ഒന്നിലെ പേ-പീരിയഡ് മുതൽ പുതിയ ശമ്പളം ലഭിച്ചു തുടങ്ങുമെന്ന് അധികൃതർ അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Ontario's minimum wage announced; effective October 1
