അനിശ്ചിതകാല ലീസിന് അന്ത്യമോ? ഒന്റാരിയോയിലെ വാടകക്കാർക്ക് ആശങ്ക; ഫോർഡ് സർക്കാരിൻ്റെ പുതിയ ബിൽ വിവാദത്തിൽ

ഒന്റാരിയോ: ഒന്റാരിയോയിൽ പ്രീമിയർ ഡഗ് ഫോർഡ് സർക്കാർ അടുത്തിടെ അവതരിപ്പിച്ച പുതിയ ഭവന ബിൽ, പ്രവിശ്യയിലെ വാടക നിയന്ത്രണത്തെയും നിലവിലുള്ള അനിശ്ചിതകാല ലീസിങ് (Indefinite Leases) സമ്പ്രദായത്തെയും ഇല്ലാതാക്കിയേക്കുമെന്ന് ഹൗസിങ് അഭിഭാഷകർ മുന്നറിയിപ്പ് നൽകുന്നു. നിർമ്മാണ പ്രവർത്തനങ്ങൾ വേഗത്തിലാക്കാനും ഭവന അംഗീകാരങ്ങൾ കാര്യക്ഷമമാക്കാനുമാണ് ബിൽ ലക്ഷ്യമിടുന്നതെങ്കിലും, ലീസിങ് കാലാവധി സംബന്ധിച്ച നിയമങ്ങളിൽ ‘മാർക്കറ്റ് സാഹചര്യങ്ങൾ, വ്യക്തിഗത ആവശ്യങ്ങൾ അല്ലെങ്കിൽ ബിസിനസ് തന്ത്രങ്ങൾ’ എന്നിവയുടെ അടിസ്ഥാനത്തിൽ മാറ്റങ്ങൾ വരുത്താനുള്ള നിർദ്ദേശമാണ് ആശങ്കകൾക്ക് കാരണം.

ഇത് ദീർഘകാല വാടകക്കാരെയും, പ്രത്യേകിച്ച് മുതിർന്ന പൗരന്മാർ, വിദ്യാർത്ഥികൾ തുടങ്ങിയ ദുർബല വിഭാഗങ്ങളെയും ഗുരുതരമായി ബാധിക്കുമെന്ന് അക്കോൺ പോലുള്ള സന്നദ്ധ സംഘടനകൾ പറയുന്നു. നിലവിൽ, ഒന്റാരിയോയിലെ വാടകക്കാർക്ക് “സെക്യൂരിറ്റി ഓഫ് ടെൻയൂർ” (Security of Tenure) എന്ന നിയമപരമായ സംരക്ഷണം ലഭിക്കുന്നുണ്ട്. ഇത് പ്രകാരം, വാടക കരാർ പാലിക്കുന്നിടത്തോളം കാലം ഒരു വാടകക്കാരനെ മതിയായ നിയമപരമായ കാരണം കൂടാതെ വീട്ടിൽ നിന്ന് ഒഴിപ്പിക്കാൻ വീട്ടുടമയ്ക്ക് സാധിക്കില്ല.

നിശ്ചിത കാലാവധിയുള്ള കരാർ അവസാനിച്ചാലും മാസാടിസ്ഥാനത്തിൽ താമസം തുടരാനും ഈ നിയമം അനുവദിക്കുന്നു. എന്നാൽ, പുതിയ ബിൽ പാസ്സായാൽ, ‘പൊതുതാൽപ്പര്യം’ മുൻനിർത്തി ദീർഘകാല വാടകക്കാരെ ഒഴിപ്പിക്കാൻ വീട്ടുടമകൾക്ക് എളുപ്പത്തിൽ സാധിക്കുമെന്നും, ഇത് വാടക വർദ്ധനവിനും ലാഭത്തിനും വേണ്ടി ദീർഘകാലമായി താമസിക്കുന്നവരെ കുടിയൊഴിപ്പിക്കാൻ ഉടമകൾക്ക് ‘ഫ്രീ പാസ്’ നൽകുമെന്നും വിമർശകർ പറയുന്നു. ഈ നീക്കം ഒന്റാരിയോയിലെ താങ്ങാനാവുന്ന ഭവന പ്രതിസന്ധിക്ക് പരിഹാരമാവില്ലെന്നും, മറിച്ച് കൂടുതൽ ആളുകൾക്ക് കിടപ്പാടം നഷ്ടമാകാൻ കാരണമായേക്കുമെന്നും വാടകക്കാരുടെ അവകാശങ്ങൾക്കായി വാദിക്കുന്നവർ അഭിപ്രായപ്പെടുന്നു.

ടൊറന്റോയിലെ ജനസംഖ്യയുടെ 48 ശതമാനം വാടകയ്ക്ക് താമസിക്കുന്നവരാണ്. ഇത്തരമൊരു സാഹചര്യത്തിൽ, വാടക നിയന്ത്രിത ഭവനങ്ങൾ നഷ്ടപ്പെടുന്നവർക്ക് മറ്റ് താങ്ങാനാവുന്ന ഓപ്ഷനുകൾ ഇല്ലാത്തത് തെരുവുകളിലെ താമസക്കാരുടെ (Encampments) എണ്ണം വർദ്ധിപ്പിക്കാൻ സാധ്യതയുണ്ടെന്ന് അക്കോൺ പ്രവർത്തക സ്റ്റേസി സെംപിൾ മുന്നറിയിപ്പ് നൽകി. നിലവിലെ വാടക വർദ്ധനവ് 2.5% ആയി പരിമിതപ്പെടുത്തിക്കൊണ്ട് വാടകക്കാർക്ക് ശക്തമായ സംരക്ഷണം നൽകുന്നുണ്ടെന്ന് പ്രവിശ്യാ വക്താവ് ഇമെയിൽ പ്രസ്താവനയിലൂടെ അറിയിച്ചെങ്കിലും, വാടകക്കാരുടെ ആശങ്കകൾക്ക് ഇത് പരിഹാരമാകുന്നില്ല.

പുതിയ നിർദ്ദേശം ഒന്റാരിയോയിലെ ഓരോ വാടകക്കാരനെയും നേരിട്ട് ആക്രമിക്കുന്നതാണെന്ന് ദീർഘകാല വാടകക്കാരനായ ലെയ് ബീഡൺ അഭിപ്രായപ്പെട്ടു. ഏകദേശം 20 വർഷമായി താമസിക്കുന്ന അപ്പാർട്ട്‌മെന്റിൽ നിന്ന് കുടിയൊഴിപ്പിക്കപ്പെടാൻ സാധ്യതയുണ്ടെന്ന ചിന്ത പോലും “സങ്കൽപ്പിക്കാൻ കഴിയാത്തതാണ്” എന്ന് അദ്ദേഹം പറയുന്നു. ഫിക്സഡ് വരുമാനമുള്ളവർക്കും മുതിർന്ന പൗരന്മാർക്കും അവരുടെ വാടക നിയന്ത്രിത ഭവനം സുരക്ഷിതമായി തുടരുമെന്ന ‘സെക്യൂരിറ്റി ഓഫ് ടെൻയൂർ’ മാത്രമാണ് ഏക ആശ്രയം. ഈ സംരക്ഷണം എടുത്തുമാറ്റുന്നത് അവരെ നഗരത്തിൽ നിന്ന് ദൂരെയുള്ള, ചെലവേറിയ വാടക സ്ഥലങ്ങളിലേക്ക് മാറാൻ നിർബന്ധിതരാക്കുമെന്നും ബീഡൺ ചൂണ്ടിക്കാട്ടുന്നു.

ഈ പുതിയ നീക്കം വീട്ടുടമകൾക്ക് അനന്തമായ അധികാരം നൽകുമെന്ന് ടൊറന്റോ മേയർ ഒലിവിയ ചൗ പറഞ്ഞു. ഒന്റാരിയോ ലിബറൽ പാർട്ടിയുടെ ഹൗസിങ് വിമർശകൻ ആദിൽ ഷാംജി ഈ ബില്ലിനെ “വാടകക്കാർ അഭിമുഖീകരിക്കുന്ന അനീതികളെ അവഗണിക്കുന്ന ദുരുദ്ദേശ്യപരമായ ബിൽ” എന്ന് വിശേഷിപ്പിച്ചു. വീടുകളുടെ എണ്ണം വർദ്ധിപ്പിക്കുകയാണ് പരിഹാരമെന്നും, വാടകക്കാരുടെ അവകാശങ്ങൾ ചവിട്ടിയരയ്ക്കുന്നതല്ല എന്നും ഒന്റാറിയോ എൻഡിപി ഷാഡോ ഹൗസിങ് മന്ത്രി കാതറിൻ മക്കെനി അഭിപ്രായപ്പെട്ടു. ഈ ബിൽ പാസ്സായാൽ കൂട്ട കുടിയൊഴിപ്പിക്കലുകൾ ഉണ്ടാകാൻ സാധ്യതയുണ്ടെന്നും അവർ മുന്നറിയിപ്പ് നൽകി. ഈ നിയമത്തിനെതിരെ വാടകക്കാർ സംഘടിച്ച് പ്രതിഷേധിക്കേണ്ടത് അത്യാവശ്യമാണെന്നും ബീഡൺ ആവശ്യപ്പെട്ടു.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Is the end of indefinite leases? Ontario tenants concerned; Ford government’s new bill in controversy