ഒന്റാരിയോ പ്രീമിയർ ഡഗ് ഫോർഡ് വീണ്ടും ഒരു നിയമനിർമ്മാണത്തിനുള്ള സാധ്യത ഉയർത്തുകയാണ്. ഉത്പാദനങ്ങൾ എവിടെ നിർമ്മിച്ചു എന്ന് വ്യക്തമാക്കുന്ന ഒരു ലേബൽ നിർബന്ധമാക്കുന്ന നിയമം കൊണ്ടുവരാനാണ് അദ്ദേഹം ആലോചിക്കുന്നത്. അമേരിക്കയുമായുള്ള വ്യാപാര യുദ്ധം നിലനിൽക്കുന്ന സാഹചര്യത്തിൽ, കനേഡിയൻ ഉത്പന്നങ്ങൾ തിരഞ്ഞെടുക്കാൻ ഉപഭോക്താക്കളെ സഹായിക്കുക എന്നതാണ് ഇതിലൂടെ ഫോർഡ് ലക്ഷ്യമിടുന്നത്. ചില സൂപ്പ് ലേബലുകളിലൂടെ കാംപ്ബെൽസ് ഉപഭോക്താക്കളെ തെറ്റിദ്ധരിപ്പിക്കുകയാണെന്ന് അടുത്തിടെ നടന്ന ഒരു വാർത്താ സമ്മേളനത്തിൽ ഫോർഡ് ആരോപിച്ചു.
കാനഡയിൽ മികച്ച ഉത്പാദകർ ഉണ്ടായിരിക്കെ, ചില വ്യാപാരികൾ ഉത്പാദനം രാജ്യത്തിന് പുറത്തേക്ക് മാറ്റുന്നത് തന്നെ വേദനിപ്പിക്കുന്നു എന്ന് ഫോർഡ് പറഞ്ഞു. ഉപഭോക്താക്കളെ കബളിപ്പിക്കുന്നത് തടയാൻ സാധ്യമായ എല്ലാ ഉത്പന്നങ്ങളിലും ഉത്ഭവ രാജ്യം രേഖപ്പെടുത്തുന്ന നിയമം കൊണ്ടുവരാൻ താൻ തയ്യാറാണെന്നും അദ്ദേഹം വ്യക്തമാക്കി. കനേഡിയൻ ഉത്പന്നങ്ങൾ വാങ്ങാൻ ഫോർഡ് ഒന്റാറിയോയിലെ ജനങ്ങളോട് ആവർത്തിച്ച് അഭ്യർത്ഥിച്ചിട്ടുണ്ട്. വ്യാപാരികൾ അവരുടെ ഉപഭോക്താക്കൾക്ക് തദ്ദേശീയ ഉത്പന്നങ്ങൾ തിരിച്ചറിയാൻ സഹായിക്കണമെന്നും അദ്ദേഹം ആവശ്യപ്പെട്ടിരുന്നു.
എന്നാൽ, ചില വ്യാജ കമ്പനികൾ രാജ്യത്തിന് പുറത്ത് നിർമ്മിച്ച ഉത്പന്നങ്ങളെ കനേഡിയൻ ഉത്പന്നങ്ങളായി തെറ്റിദ്ധരിപ്പിക്കാൻ ശ്രമിക്കുന്നു എന്ന് ഫോർഡ് ആരോപിച്ചു. കാംപ്ബെൽസ് അവരുടെ ചില സൂപ്പ് ലേബലുകളിൽ കാനഡയുമായുള്ള ബന്ധം അവകാശപ്പെടുന്നുണ്ട്, എന്നാൽ അവരുടെ പല ഉത്പന്നങ്ങളും നിർമ്മിക്കുന്നത് ന്യൂജേഴ്സിയിലെ പ്ലാന്റിലാണ് എന്നും ഫോർഡ് കുറ്റപ്പെടുത്തി. കനേഡിയൻ പതാക പതിച്ച കാംപ്ബെൽസിന്റെ സൂപ്പ് ടിൻ താൻ ഉടൻ തന്നെ എടുത്ത് ലേബൽ കീറിക്കളയുമെന്നും, ഒന്റാറിയോയിലും കാനഡയിലും നിർമ്മിക്കുന്ന സൂപ്പുകൾ വാങ്ങാൻ ജനങ്ങളെ പ്രോത്സാഹിപ്പിക്കുമെന്നും അദ്ദേഹം കൂട്ടിച്ചേർത്തു.
കാംപ്ബെൽസിന്റെ ഒരു വക്താവ് പ്രതികരിച്ചത്, അവരുടെ ചില സൂപ്പ് ലേബലുകളിൽ ‘കാനഡയിൽ രൂപകൽപ്പന ചെയ്തത്’ എന്ന് രേഖപ്പെടുത്തിയിട്ടുണ്ടെന്നും, എന്നാൽ 2024 ൽ ആ ബ്രാൻഡിംഗ് ഘട്ടം ഘട്ടമായി നിർത്തലാക്കിയെന്നും ഇപ്പോൾ അങ്ങനെയുള്ള ലേബലുകളുള്ള ടിന്നുകൾ ഉത്പാദിപ്പിക്കുന്നില്ല എന്നുമാണ്. 2018 ൽ ടൊറന്റോയിലെ പ്ലാന്റ് അടച്ചുപൂട്ടി മിസ്സിസ്സോഗയിൽ കനേഡിയൻ ബിസിനസ്സിന്റെ കോർപ്പറേറ്റ് ആസ്ഥാനം തുറന്നപ്പോഴാണ് ആ വാചകം ലേബലുകളിൽ ചേർത്തതെന്നും അവർ പറഞ്ഞു.
കനേഡിയൻ ഉപഭോക്താക്കളുടെ താൽപ്പര്യങ്ങൾക്കും പാചകക്കുറിപ്പുകൾക്കും അനുസൃതമായി കനേഡിയൻ ടീം ഈ ഉത്പന്നങ്ങൾ തുടർന്നും സൃഷ്ടിക്കുമെന്ന് ഉറപ്പാക്കുന്നതിനാണ് അങ്ങനെ ചെയ്തതെന്നും അവർ വിശദീകരിച്ചു. പല ഉത്പന്നങ്ങളിലും കനേഡിയൻ കർഷകരിൽ നിന്ന് സംഭരിച്ച ചേരുവകൾ ഉപയോഗിക്കുന്നുണ്ടെന്നും, യുഎസിൽ നിർമ്മിക്കുന്നുണ്ടെങ്കിലും കനേഡിയൻ വിപണിക്ക് മാത്രമായുള്ള പ്രത്യേക ഉത്പന്നങ്ങൾ അവർ വാഗ്ദാനം ചെയ്യുന്നുണ്ടെന്നും കാംപ്ബെൽസ് കൂട്ടിച്ചേർത്തു. കാനഡയിൽ വിൽക്കുന്ന എല്ലാ ബ്രോത്ത് ഉത്പന്നങ്ങളും ഒന്റാറിയോയിലെ ഒരു കരാർ നിർമ്മാതാവ് വഴിയാണ് നിർമ്മിക്കുന്നതെന്നും, അവയിൽ കാനഡയിൽ തയ്യാറാക്കിയത് എന്ന അടയാളത്തോടുകൂടിയ കനേഡിയൻ പതാക ഉണ്ടാകുമെന്നും അവർ അറിയിച്ചു.
കഴിഞ്ഞ രണ്ടാഴ്ചയ്ക്കിടെ ഇത് രണ്ടാം തവണയാണ് ഫോർഡ് കാംപ്ബെൽസിന്റെ ലേബലിംഗിനെ പരസ്യമായി വിമർശിക്കുന്നത്. ജൂലൈ 31 ന് Thunder Bay യിൽ നടന്ന ഒരു വാർത്താ സമ്മേളനത്തിലും ഫോർഡ് ഈ വിഷയം ഉന്നയിക്കുകയും കാംപ്ബെൽസിന്റെ സൂപ്പ് കനേഡിയൻ ആണെന്ന് വിശ്വസിപ്പിച്ച് അവരെ തെറ്റിദ്ധരിപ്പിക്കാൻ അനുവദിക്കരുതെന്നും ഒന്റാറിയോയിലെ ജനങ്ങളോട് പറഞ്ഞിരുന്നു. Etobicoke ൽ അടച്ചുപൂട്ടിയ ഫാക്ടറി പുനരാരംഭിക്കുകയും നൂറുകണക്കിന് ആളുകളെ തിരിച്ചെടുക്കുകയും ചെയ്യുകയാണ് കാംപ്ബെൽസ് ചെയ്യേണ്ടതെന്നും ഫോർഡ് അഭിപ്രായപ്പെട്ടു.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ താരിഫുകൾ കാരണം ഒന്റാറിയോയിലെ നിരവധി കമ്പനികൾ ബുദ്ധിമുട്ടിലാണെന്നും, സാധ്യമായ എല്ലാ ഉത്പന്നങ്ങളും രാജ്യത്തിനകത്ത് തന്നെ ഉത്പാദിപ്പിക്കാൻ തുടർന്നും ശ്രമിക്കുമെന്നും ഫോർഡ് കൂട്ടിച്ചേർത്തു. താരിഫ് ബാധിച്ച വ്യവസായങ്ങൾക്കായി ഒന്റാറിയോ ഒരു ബില്യൺ ഡോളറിന്റെ അടിയന്തര വായ്പാ പദ്ധതി പ്രഖ്യാപിച്ചതിന് തൊട്ടടുത്ത ദിവസമാണ് ഫോർഡിന്റെ ഈ വിമർശനം എന്നതും ശ്രദ്ധേയമാണ്.
