ടൊറന്റോ: അമേരിക്കയിലെ കുടിയേറ്റ നിയന്ത്രണ ഏജൻസിയായ ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റിന് (ICE) സൈനിക വാഹനങ്ങൾ വിൽക്കുന്ന ഒന്റാരിയോ കമ്പനിയുടെ നടപടി തള്ളി പ്രീമിയർ ഡഗ് ഫോർഡ്. ആഴ്ചകൾക്ക് മുമ്പ് ഇതേ കരാറിനെ അനുകൂലിച്ചിരുന്ന ഫോർഡ്, യു.എസ് ഏജൻസിയുടെ നടപടികൾ വിവാദമായ പശ്ചാത്തലത്തിലാണ് ഇപ്പോൾ നിലപാട് മാറ്റിയത്. ഇത്തരമൊരു ഇടപാടിനെക്കുറിച്ച് തനിക്ക് മുൻകൂട്ടി അറിവില്ലായിരുന്നുവെന്നും അദ്ദേഹം വ്യക്തമാക്കി.
ഒന്റാരിയോയിലെ ബ്രാംപ്ടൺ ആസ്ഥാനമായുള്ള ‘റോഷൽ’ (Roshel) എന്ന കമ്പനിയാണ് അമേരിക്കൻ ഏജൻസിക്ക് വാഹനങ്ങൾ കൈമാറുന്നത്. യുക്രെയ്ൻ യുദ്ധത്തിൽ ഉപയോഗിക്കുന്ന 20 ‘സെനറ്റർ’ ആർമർഡ് വാഹനങ്ങൾ 10 മില്യൺ ഡോളറിന് വാങ്ങാനാണ് അമേരിക്കൻ സർക്കാർ പദ്ധതിയിടുന്നത്. കഴിഞ്ഞ ഡിസംബറിൽ ഈ കരാറിനെ ‘അത്യുത്തമം’ എന്ന് വിശേഷിപ്പിച്ച ഫോർഡ്, താൻ ഒരു കമ്പനിക്കും വാഹനങ്ങൾ വിൽക്കാൻ നിർദേശം നൽകുന്നില്ലെന്ന് പറഞ്ഞു.
അമേരിക്കയിലെ മിനിയാപ്പോളിസിൽ ഐ.സി.ഇ (ICE) ഉദ്യോഗസ്ഥരുടെ ഭാഗത്തുനിന്നുണ്ടായ വെടിവെപ്പും മരണങ്ങളും വലിയ പ്രതിഷേധങ്ങൾക്ക് കാരണമായ സാഹചര്യത്തിലാണ് ഈ ചർച്ചകൾ സജീവമായത്. ഐ.സി.ഇ ഉദ്യോഗസ്ഥർ സാധാരണക്കാരെ ലക്ഷ്യം വെക്കുന്നു എന്ന ആരോപണം ശക്തമാണ്. കാനഡയിലെ പ്രതിപക്ഷമായ എൻ.ഡി.പി നേതാവ് മാരിറ്റ് സ്റ്റൈൽസ് ഈ കരാറിനെതിരെ കടുത്ത വിമർശനവുമായി രംഗത്തെത്തിയിരുന്നു. ഒന്റാരിയോയുടെ മൂല്യങ്ങൾക്ക് നിരക്കാത്ത പ്രവർത്തനങ്ങൾ നടത്തുന്ന ഏജൻസിക്ക് സൈനിക വാഹനങ്ങൾ നൽകരുതെന്ന് അവർ ആവശ്യപ്പെട്ടു.
നിലവിൽ അമേരിക്കയിൽ ഐ.സി.ഇ ഏജന്റുമാരുടെ നടപടികൾക്കെതിരെ പൊതുപണിമുടക്കും രാഷ്ട്രീയ പ്രതിഷേധങ്ങളും തുടരുകയാണ്. തന്റെ മുൻ പ്രസ്താവന സോഷ്യൽ മീഡിയയിലെ വിവരങ്ങൾ അടിസ്ഥാനമാക്കിയുള്ളതായിരുന്നുവെന്നാണ് ഡഗ് ഫോർഡിന്റെ പുതിയ വിശദീകരണം. അതേസമയം, ഒന്റാരിയോയിൽ നിർമ്മിക്കുന്ന വാഹനങ്ങൾ കനേഡിയൻ സൈന്യം ഉപയോഗിക്കണമെന്ന തന്റെ മുൻ നിലപാടിൽ മാറ്റമില്ലെന്നും അദ്ദേഹം ആവർത്തിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Ontario Premier Doug Ford changes stance on vehicle deal with US agency
