ഒന്റാരിയോ: കാനഡയിലെ ആരോഗ്യരംഗത്ത് വലിയൊരു ചുവടുവെപ്പുമായി ഒൻ്റാറിയോ ആസ്ഥാനമായുള്ള ഫ്ലോ ലാബ്സ് രംഗത്തെത്തി. പുരുഷന്മാർക്ക് തങ്ങളുടെ ശുക്ല പരിശോധന ലാബുകളിൽ നേരിട്ട് പോകാതെ തന്നെ വീട്ടിലിരുന്ന് ചെയ്യാൻ സഹായിക്കുന്ന ‘മെയിൽ-ഇൻ’ കിറ്റുകളാണ് കമ്പനി പുറത്തിറക്കിയത്. കാനഡയിൽ ഇത്തരമൊരു സേവനം ആദ്യമായാണ് അവതരിപ്പിക്കപ്പെടുന്നത്.
ദൂരസ്ഥലങ്ങളിലെ ലാബുകളിലേക്ക് യാത്ര ചെയ്യാനുള്ള ബുദ്ധിമുട്ടും സ്വകാര്യതയെക്കുറിച്ചുള്ള ആശങ്കകളും കാരണം പലരും വന്ധ്യതാ പരിശോധനകൾക്ക് മടിക്കാറുണ്ട്. ഈ പ്രശ്നത്തിന് പരിഹാരമായാണ് ഫ്ലോ ലാബ്സ് ഈ നൂതന കിറ്റ് വികസിപ്പിച്ചത്. മൗണ്ട് സിനായ് ഹോസ്പിറ്റലിലെ പ്രശസ്ത യൂറോളജിസ്റ്റ് ഡോ. കീത്ത് ജാർവിയുടെ നേതൃത്വത്തിലാണ് ഈ സംവിധാനം ഒരുക്കിയിരിക്കുന്നത്. ലാബുകളിൽ നേരിട്ട് നടത്തുന്ന പരിശോധനയുടെ അതേ കൃത്യതയോടെ തന്നെ വീട്ടിലെ സാംപിളുകളും വിശകലനം ചെയ്യാൻ സാധിക്കുമെന്ന് അദ്ദേഹം ഉറപ്പുനൽകുന്നു.
രോഗികൾക്ക് തങ്ങളുടെ സാംപിൾ ശേഖരിച്ച ശേഷം കൊറിയർ വഴി ലാബിലേക്ക് അയക്കാം. രണ്ട് ദിവസത്തിനുള്ളിൽ ഇവ ടൊറൻ്റോയിലെയോ ഒഷാവയിലെയോ ലാബുകളിൽ എത്തിച്ചേരുകയും വേഗത്തിൽ തന്നെ ഫലം ലഭ്യമാവുകയും ചെയ്യും. വന്ധ്യതാ ചികിത്സയിൽ സമയം വളരെ വിലപ്പെട്ടതാണെന്നും പരിശോധനകൾ വൈകുന്നത് ദമ്പതികളുടെ ഗർഭധാരണ സാധ്യതയെ ബാധിക്കുമെന്നും ഡോക്ടർമാർ ചൂണ്ടിക്കാട്ടുന്നു. ലാബുകളെ രോഗികളിലേക്ക് എത്തിക്കുന്ന ഈ പുതിയ രീതി കാനഡയിലെ ആരോഗ്യ മേഖലയിൽ വലിയ മാറ്റമുണ്ടാക്കുമെന്നാണ് പ്രതീക്ഷിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Ontario lab launches Canada’s first mail-in semen analysis kit
