ഒന്റാരിയോ: ഒന്റാരിയോയിൽ ജോലി നേടാൻ അടുത്ത വർഷം മുതൽ കൂടുതൽ എളുപ്പമാകും. കാരണം, 2026 ജനുവരി 1 മുതൽ കാനഡയിലെ മറ്റ് പ്രവിശ്യകളിൽ നിന്നുള്ള വിദഗ്ദ്ധ തൊഴിലാളികൾക്ക് ഒന്റാരിയോയിലെ തൊഴിൽ വിപണിയിൽ എളുപ്പത്തിൽ പ്രവേശനം ലഭിക്കും. ‘ആസ് ഓഫ് റൈറ്റ്’ (As of Right) എന്ന പുതിയ നിയമമാണ് ഇതിനായി ഒന്റാറിയോ സർക്കാർ നടപ്പാക്കുന്നത്. ആരോഗ്യ മേഖലയിൽ അല്ലാത്ത, അംഗീകൃത തൊഴിലുകളിൽ പ്രവർത്തിക്കുന്നവർക്ക് ഈ നിയമം വഴി അവരുടെ മുഴുവൻ സർട്ടിഫിക്കേഷൻ നടപടികളും പൂർത്തിയാക്കുന്നതിന് മുമ്പ് തന്നെ ഒന്റാരിയോയിൽ ജോലി ചെയ്യാൻ സാധിക്കും.
പുതിയ നിയമം അനുസരിച്ച്, മറ്റ് പ്രവിശ്യകളിൽ നിന്നുള്ള ഒരു തൊഴിലാളിക്ക് 10 ദിവസത്തിനുള്ളിൽ പ്രാഥമിക അനുമതി ലഭിക്കും. ഇതിലൂടെ അവർക്ക് ആറ് മാസത്തേക്ക് ഒന്റാരിയോയിൽ ജോലി ചെയ്യാം. ഈ കാലയളവിൽ സ്ഥിരമായ രജിസ്ട്രേഷനുള്ള അപേക്ഷ സമർപ്പിക്കാനും നടപടികൾ പൂർത്തിയാക്കാനും സാധിക്കും.
പുതിയ നിയമത്തിന്റെ പ്രസക്തി
കാനഡയിൽ നിലവിൽ 20 ശതമാനത്തോളം തൊഴിലുകൾക്ക് പ്രവിശ്യാ അടിസ്ഥാനത്തിലുള്ള അംഗീകാരങ്ങൾ ആവശ്യമാണ്. എൻജിനീയറിങ്, ആർക്കിടെക്ചർ, ഇലക്ട്രിക്കൽ ജോലികൾ തുടങ്ങിയ മേഖലകളിൽ ഒരു പ്രവിശ്യയിൽ അംഗീകാരമുള്ളവർക്ക് മറ്റൊരു പ്രവിശ്യയിൽ ജോലി ചെയ്യണമെങ്കിൽ മാസങ്ങളോളം കാത്തിരിക്കേണ്ടി വരാറുണ്ട്. ഇത് തൊഴിൽ ശക്തിയുടെ ഒഴുക്കിനെ തടസ്സപ്പെടുത്തുകയും സാമ്പത്തിക മേഖലയ്ക്ക് ദോഷകരമായി ബാധിക്കുകയും ചെയ്യുന്നു.
2023-ൽ മാത്രം 14 റെഗുലേറ്റഡ് പ്രൊഫഷനുകളിലായി ഏകദേശം 3,000 അപേക്ഷകൾ ഒന്റാരിയോയിൽ ലഭിച്ചിരുന്നു. ഇവയുടെ അംഗീകാരത്തിനായി മാസങ്ങൾ കാത്തിരിക്കേണ്ടിവന്നത് പലരുടെയും കരിയറിന് തടസ്സമുണ്ടാക്കി. ഈ പ്രശ്നം പരിഹരിക്കുന്നതിനാണ് ഒന്റാരിയോ സർക്കാർ പുതിയ നിയമം കൊണ്ടുവരുന്നത്.
പുതിയ നിയമം പ്രാബല്യത്തിൽ വരുന്നതോടെ മറ്റ് പ്രവിശ്യകളിൽ നിന്നുള്ള തൊഴിലാളികൾക്ക് ഒന്റാരിയോയിലെ തൊഴിൽ വിപണിയിൽ വേഗത്തിൽ പ്രവേശിക്കാൻ സാധിക്കും. ഇത് തൊഴിൽ ദൗർലഭ്യം പരിഹരിക്കുന്നതിനും, വലിയ പദ്ധതികൾ വേഗത്തിൽ പൂർത്തിയാക്കുന്നതിനും സഹായിക്കും.
അപേക്ഷകർ ചെയ്യേണ്ട കാര്യങ്ങൾ:
നിങ്ങളുടെ തൊഴിൽ നിയന്ത്രിക്കുന്ന ഒന്റാരിയോയിലെ റെഗുലേറ്ററി അതോറിറ്റിയെ കണ്ടെത്തുക.
നിങ്ങളുടെ നിലവിലെ പ്രവിശ്യയിലെ സർട്ടിഫിക്കേഷൻ രേഖകൾ, തിരിച്ചറിയൽ രേഖകൾ എന്നിവ സമർപ്പിക്കുക.
അപേക്ഷ സമർപ്പിച്ച് 10 പ്രവൃത്തി ദിവസങ്ങൾക്കുള്ളിൽ അനുമതി ലഭിക്കും.
ഈ താത്കാലിക അനുമതി ഉപയോഗിച്ച് ആറു മാസത്തേക്ക് ജോലി ചെയ്യാം.
ഈ ആറ് മാസത്തിനുള്ളിൽ സ്ഥിരമായ ലൈസൻസിനായുള്ള മുഴുവൻ അപേക്ഷയും സമർപ്പിക്കുക.
പ്രയോജനങ്ങൾ
തൊഴിലാളികൾക്ക് മറ്റ് പ്രവിശ്യകളിലേക്ക് മാറുന്നതിനുള്ള തടസ്സങ്ങൾ കുറയുന്നു. വരുമാനം നഷ്ടപ്പെടാതെ വേഗത്തിൽ ജോലിയിൽ പ്രവേശിക്കാം. തൊഴിലുടമകൾക്ക് ആവശ്യത്തിന് വിദഗ്ദ്ധ തൊഴിലാളികളെ വേഗത്തിൽ നിയമിക്കാൻ സാധിക്കുന്നു. ഇത് പദ്ധതികളുടെ പൂർത്തീകരണത്തിന് വേഗത കൂട്ടും.ദേശീയ തലത്തിൽ തൊഴിൽ ശക്തിയുടെ ഒഴുക്ക് സുഗമമാക്കാൻ ഇത് സഹായിക്കും. കാനഡയുടെ സാമ്പത്തിക വളർച്ചയ്ക്ക് ഇത് കൂടുതൽ കരുത്ത് നൽകും.ഈ നീക്കം തൊഴിൽ ശക്തിയുടെ കാര്യത്തിൽ കാനഡയെ കൂടുതൽ ഏകീകരിക്കപ്പെട്ടതും മത്സരശേഷിയുള്ളതുമായ ഒരു രാജ്യമാക്കി മാറ്റുമെന്ന് ഒന്റാരിയോ സർക്കാർ അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Ontario is now the job hub in Canada! Job in 10 days; New law that Malayali's should know
