ന്യൂഡൽഹി: ആധാർ കാർഡും പാൻ കാർഡും തമ്മിൽ ബന്ധിപ്പിക്കുന്നതിനുള്ള സമയപരിധി അവസാനിക്കാൻ ഇനി ആറു ദിവസം മാത്രം ബാക്കി. നിശ്ചിത സമയപരിധിയായ ഡിസംബർ 31-നകം നടപടികൾ പൂർത്തിയാക്കാത്തവരുടെ പാൻ കാർഡുകൾ 2026 ജനുവരി ഒന്നു മുതൽ പ്രവർത്തനരഹിതമാകുമെന്ന് ആദായനികുതി വകുപ്പ് അറിയിച്ചു. സമയപരിധി നീട്ടിനൽകാൻ സാധ്യതയില്ലെന്നും അധികൃതർ വ്യക്തമാക്കിയിട്ടുണ്ട്.
2024 ഒക്ടോബർ ഒന്നിന് മുൻപ് ആധാർ നമ്പർ ഉപയോഗിച്ച് പാൻ കാർഡ് സ്വന്തമാക്കിയവർക്കാണ് ഈ നിബന്ധന ബാധകമാകുന്നത്. ഈ വർഷം ഏപ്രിലിൽ ആദായനികുതി വകുപ്പ് പുറപ്പെടുവിച്ച അറിയിപ്പ് പ്രകാരം ഡിസംബർ 31-നുള്ളിൽ ലിങ്കിംഗ് നടപടികൾ പൂർത്തിയാക്കേണ്ടതുണ്ട്. നികുതി നിയമങ്ങൾ പ്രകാരം പാനും ആധാറും തമ്മിൽ ബന്ധിപ്പിക്കുന്നത് നിലവിൽ നിർബന്ധമാണ്.
പാൻ കാർഡ് പ്രവർത്തനരഹിതമായാൽ സാമ്പത്തിക ഇടപാടുകളിൽ വലിയ പ്രതിസന്ധി നേരിടേണ്ടി വരുമെന്ന് വിദഗ്ധർ ചൂണ്ടിക്കാട്ടുന്നു. ഇൻകം ടാക്സ് റിട്ടേൺ (ITR) ഫയൽ ചെയ്യുന്നതിനും, ആദായനികുതി റീഫണ്ടുകൾ ലഭിക്കുന്നതിനും തടസ്സമുണ്ടാകും. കൂടാതെ, ബാങ്ക് അക്കൗണ്ട് തുടങ്ങുന്നതിനും ഉയർന്ന തുകയുടെ മറ്റ് പണമിടപാടുകൾക്കും പ്രവർത്തനക്ഷമമായ പാൻ കാർഡ് അനിവാര്യമാണ്.
ആധാർ എൻറോൾമെന്റ് ഐഡി ഉപയോഗിച്ച് പാൻ കാർഡ് എടുത്തവരും ഈ സമയപരിധിക്കുള്ളിൽ തന്നെ നടപടിക്രമങ്ങൾ പൂർത്തിയാക്കണമെന്ന് സെൻട്രൽ ബോർഡ് ഓഫ് ഡയറക്ട് ടാക്സസ് (CBDT) നിർദ്ദേശം നൽകിയിട്ടുണ്ട്. അവസാന നിമിഷത്തെ തിരക്ക് ഒഴിവാക്കാൻ കാർഡ് ഉടമകൾ എത്രയും വേഗം പ്രക്രിയ പൂർത്തിയാക്കണമെന്നും സി.ബി.ഡി.ടി അറിയിച്ചു.
ആദായനികുതി വകുപ്പിന്റെ ഔദ്യോഗിക വെബ്സൈറ്റായ www.incometax.gov.in വഴി ഉടമകൾക്ക് സ്വയം ലിങ്കിംഗ് പൂർത്തിയാക്കാം. വെബ്സൈറ്റിലെ ‘ക്വിക്ക് ലിങ്ക്സ്’ വിഭാഗത്തിലെ ‘ലിങ്ക് ആധാർ’ എന്ന ഓപ്ഷൻ തെരഞ്ഞെടുത്ത് പാൻ, ആധാർ വിവരങ്ങൾ നൽകിയ ശേഷം മൊബൈലിൽ ലഭിക്കുന്ന ഒ.ടി.പി ഉപയോഗിച്ച് നടപടികൾ ലളിതമായി പൂർത്തിയാക്കാൻ സാധിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Attention PAN card holders; only 6 days left to complete Aadhaar linking
