ടൊറന്റോ: ലോകമെമ്പാടുമുള്ള മലയാളികൾ ഓണാഘോഷത്തിനായി ഒരുങ്ങുമ്പോൾ ടൊറന്റോയിലും ആവേശമുയർത്തി ‘ഓണച്ചന്ത’ എത്തുന്നു. എൻ്റെ കാനഡയും ആഹാ റേഡിയോയും സംയുക്തമായി സംഘടിപ്പിക്കുന്ന ഓണച്ചന്ത ഇന്ന് (2025 ഓഗസ്റ്റ് 30) ടൊറന്റോ വുഡ്ബ്രിഡ്ജ് ഫെയർ ഗ്രൗണ്ട്സിൽ വെച്ച് നടക്കും. പ്രവാസലോകത്തെ മലയാളി സമൂഹത്തിന് കേരളത്തനിമയോടെ ഓണം ആഘോഷിക്കാനുള്ള അവസരമൊരുക്കുകയാണ് ഈ പരിപാടിയിലൂടെ സംഘാടകർ ലക്ഷ്യമിടുന്നത്.
പരമ്പരാഗത ഓണവിഭവങ്ങൾ, കൈത്തറി ഉൽപ്പന്നങ്ങൾ, കരകൗശല വസ്തുക്കൾ എന്നിവ ഒരുക്കുന്ന സ്റ്റാളുകൾ മേളയുടെ പ്രധാന ആകർഷണമാകും. കുടുംബങ്ങൾക്കും കൂട്ടുകാർക്കും ഒത്തുചേർന്ന് ഓണസദ്യയുടെ രുചി ആസ്വദിക്കാനും ഓണക്കളികളിൽ പങ്കെടുക്കാനും ഇതിലൂടെ അവസരം ലഭിക്കും. വിവിധ കലാപരിപാടികളും ഓണച്ചന്തയുടെ ഭാഗമായി സംഘടിപ്പിച്ചിട്ടുണ്ട്. പ്രവാസി കലാകാരന്മാരുടെ സംഗീത, നൃത്ത പരിപാടികൾക്ക് പുറമേ, കുട്ടികൾക്കും മുതിർന്നവർക്കും പങ്കെടുക്കാൻ കഴിയുന്ന മത്സരങ്ങളും അരങ്ങേറും.
ഓണത്തിൻ്റെ പാരമ്പര്യവും, സംസ്കാരവും പുതിയ തലമുറയിലേക്ക് എത്തിക്കുക എന്നതും ഈ പരിപാടിയുടെ പ്രധാന ലക്ഷ്യമാണ്. പ്രവാസികളായ മലയാളികൾക്ക് തങ്ങളുടെ വേരുകളുമായി ബന്ധം നിലനിർത്താനും, പുതിയ സൗഹൃദങ്ങൾ സ്ഥാപിക്കാനും ഈ ഓണച്ചന്ത ഒരു വേദിയൊരുക്കും. ടൊറന്റോയിലെ മലയാളി സമൂഹത്തിന് ഇതൊരു അവിസ്മരണീയമായ ഓണാഘോഷമായിരിക്കുമെന്ന് സംഘാടകർ അറിയിച്ചു.
Onam rush in Toronto today; Onam with Kerala spirit on Canadian soil; 'Onachanda' begins today
