ഹാലിഫാക്സ്: നോവ സ്കോഷ്യ പ്രവിശ്യയിലെ മുനിസിപ്പാലിറ്റികൾക്ക് അടിസ്ഥാന സൗകര്യ പദ്ധതികൾക്കായി കുറഞ്ഞ പലിശ നിരക്കിൽ വായ്പ നൽകുന്ന മുനിസിപ്പൽ ഫണ്ടിന്റെ വായ്പാ പരിധി 500 മില്യൺ ഡോളർ വർദ്ധിപ്പിച്ച് സർക്കാർ ഉത്തരവിറക്കി. ഇതോടെ ഫണ്ടിന്റെ മൊത്തം ശേഷി 995 മില്യൺ ഡോളറിൽ നിന്ന് 1.5 ബില്യൺ ഡോളറായി ഉയർന്നു. റോഡ് നവീകരണം, ജല-മലിനജല സംവിധാനങ്ങളുടെ അപ്ഗ്രേഡേഷൻ, ഫയർ ട്രക്കുകൾ, മഞ്ഞുവീഴ്ച മായ്ക്കുന്ന വാഹനങ്ങൾ തുടങ്ങിയ ഉപകരണങ്ങൾ വാങ്ങുന്നതിനും ഈ ഫണ്ട് ഉപയോഗിക്കാം. 2013-ന് ശേഷം ആദ്യമായാണ് മുനിസിപ്പൽ ഫണ്ടിന്റെ വായ്പാ പരിധി വർദ്ധിപ്പിക്കുന്നത്.
മുനിസിപ്പാലിറ്റികൾ നേരിടുന്ന നിലവിലെ ആവശ്യങ്ങളും, നിർമ്മാണ ചെലവുകളിലെ വർദ്ധനവും, വളരുന്ന പ്രവിശ്യയിലെ വർദ്ധിച്ചുവരുന്ന ഭവന വികസന ആവശ്യകതകളും പരിഗണിച്ചാണ് ഈ വർദ്ധനവെന്ന് നോവ സ്കോഷ്യയുടെ ധനകാര്യ, മുനിസിപ്പൽ കാര്യ മന്ത്രിയായ ജോൺ ലോഹർ അഭിപ്രായപ്പെട്ടു. ഫെഡറൽ സർക്കാർ കടമെടുക്കുന്ന അതേ നിരക്കിൽ പലിശയും ഒരു സർവീസ് ചാർജും ചേർത്താണ് മുനിസിപ്പാലിറ്റികൾക്ക് ഈ ഫണ്ടിൽ നിന്ന് ലോണുകൾ ലഭിക്കുക. സാധാരണയായി 10 മുതൽ 20 വർഷം വരെയാണ് ഇത്തരം മുനിസിപ്പൽ വായ്പകളുടെ തിരിച്ചടവ് കാലാവധി.
സംസ്ഥാനത്തെ അടിസ്ഥാന സൗകര്യങ്ങൾ അതിവേഗം പഴഞ്ചൻ ആയിക്കൊണ്ടിരിക്കുകയാണെന്ന് യാർമൗത്ത് മേയറും, നോവ സ്കോഷ്യ ഫെഡറേഷൻ ഓഫ് മുനിസിപ്പാലിറ്റീസ് പ്രസിഡന്റുമായ പാം മൂഡ് പറഞ്ഞു. ഭവന വികസനം പ്രോത്സാഹിപ്പിക്കുന്നതിന് ജല-മലിനജല സംവിധാനങ്ങൾ പോലുള്ള അടിസ്ഥാന സൗകര്യങ്ങൾക്കായി കൗൺസിലുകൾ വർദ്ധിച്ചുവരുന്ന ആവശ്യങ്ങൾ നേരിടുകയാണ്.
എല്ലാ മേഖലകളിലുമുണ്ടായ ചെലവ് വർദ്ധനവ് കണക്കിലെടുക്കുമ്പോൾ, ഈ വായ്പാ പരിധി വർദ്ധനവ് നിലവിലെ ആവശ്യങ്ങൾക്ക് അനുസൃതമായിട്ടുള്ളതാണെന്നും അവർ കൂട്ടിച്ചേർത്തു. ഭാവിയിൽ ഒരു പദ്ധതിക്ക് ധനസഹായം ആവശ്യമുള്ളപ്പോൾ കൂടുതൽ ശേഷി ഫണ്ടിലുണ്ടെന്ന് അറിയുന്നത് മുനിസിപ്പൽ അധികൃതർക്ക് ആശ്വാസകരമാണ്. ലോണുകൾക്ക് പുറമെ കഴിഞ്ഞ നാല് വർഷത്തിനുള്ളിൽ ഏകദേശം 250 മില്യൺ ഡോളർ ഗ്രാന്റായി നൽകിയിട്ടുണ്ടെന്നും മന്ത്രി ലോഹർ വ്യക്തമാക്കി.
