ഷാർലറ്റ്ടൗൺ: നഗരത്തിന്റെ വിവിധ ഭാഗങ്ങളിൽ വാഹനങ്ങളുടെ നമ്പർ പ്ലേറ്റുകൾ മോഷ്ടിക്കപ്പെടുന്നത് വർദ്ധിക്കുന്ന സാഹചര്യത്തിൽ പൊതുജനങ്ങൾക്ക് ജാഗ്രതാ നിർദ്ദേശവുമായി ഷാർലറ്റ്ടൗൺ പോലീസ്. കഴിഞ്ഞ ഒരാഴ്ചയ്ക്കിടെ മാത്രം നഗരത്തിന്റെ വിവിധ ഭാഗങ്ങളിൽ നിന്നായി പന്ത്രണ്ടിലധികം മോഷണക്കേസുകളാണ് റിപ്പോർട്ട് ചെയ്തിരിക്കുന്നത്. വീടുകൾ, വ്യാപാര സ്ഥാപനങ്ങൾ, ക്വീൻ എലിസബത്ത് ആശുപത്രി പരിസരം, ഷാർലറ്റ്ടൗൺ എയർപോർട്ട് എന്നിവിടങ്ങളിൽ പാർക്ക് ചെയ്തിരുന്ന വാഹനങ്ങളിൽ നിന്നാണ് പ്രധാനമായും നമ്പർ പ്ലേറ്റുകൾ നഷ്ടപ്പെട്ടത്.
മറ്റൊരു കുറ്റകൃത്യം ചെയ്യുന്നതിനായി വാഹനത്തിന്റെ ഐഡന്റിറ്റി മറച്ചുവെക്കാനാണ് ക്രിമിനലുകൾ സാധാരണയായി ഇത്തരത്തിൽ നമ്പർ പ്ലേറ്റുകൾ മോഷ്ടിക്കുന്നത്. മോഷ്ടിച്ച വാഹനങ്ങൾ തിരിച്ചറിയപ്പെടാതിരിക്കാനും, ടോൾ പ്ലാസകളിൽ നിന്നും ട്രാഫിക് ക്യാമറകളിൽ നിന്നും രക്ഷപ്പെടാനും ഇത്തരം പ്ലേറ്റുകൾ ദുരുപയോഗം ചെയ്യാറുണ്ടെന്നും പോലീസ് വാർത്താക്കുറിപ്പിൽ അറിയിച്ചു.
നമ്പർ പ്ലേറ്റുകൾ നഷ്ടപ്പെട്ടതായി ശ്രദ്ധയിൽപ്പെട്ടാൽ ഉടൻ തന്നെ പോലീസിൽ വിവരം അറിയിക്കണമെന്ന് അധികൃതർ നിർദ്ദേശിച്ചു. റിപ്പോർട്ട് ചെയ്യാൻ വൈകുന്നത് മോഷണം പോയ നമ്പർ പ്ലേറ്റ് ഉപയോഗിച്ച് നടത്തുന്ന നിയമവിരുദ്ധ പ്രവർത്തനങ്ങളുടെ ഉത്തരവാദിത്തം യഥാർത്ഥ ഉടമയിൽ എത്തുന്നതിന് കാരണമായേക്കാം. മോഷണം നടന്നാൽ ഉടൻ തന്നെ 902-629-4064 എന്ന നമ്പറിൽ പോലീസിനെ അറിയിക്കണം.
നമ്പർ പ്ലേറ്റ് നഷ്ടപ്പെട്ടാൽ വാഹന ഉടമകൾ പാലിക്കേണ്ട നടപടികളും പോലീസ് പുറത്തിറക്കി. പോലീസിൽ പരാതിപ്പെട്ട ശേഷം ആക്സസ് പി.ഇ.ഐ (Access P.E.I.) മുഖേന പുതിയ നമ്പർ പ്ലേറ്റിനായി അപേക്ഷിക്കണം. ഒപ്പം ഇൻഷുറൻസ് കമ്പനിയെ വിവരം അറിയിക്കുകയും വേണം. അനാവശ്യമായ ട്രാഫിക് പിഴകളോ മറ്റ് രേഖകളോ തപാലിൽ വരുന്നുണ്ടോ എന്ന് ഉടമകൾ പ്രത്യേകം ശ്രദ്ധിക്കണം.
സംഭവവുമായി ബന്ധപ്പെട്ട് സംശയാസ്പദമായ സാഹചര്യത്തിൽ ആരെെയെങ്കിലും കണ്ടാൽ ഉടൻ തന്നെ ഷാർലറ്റ്ടൗൺ പോലീസിനെയോ (902-629-4064) ക്രൈം സ്റ്റോപ്പേഴ്സിനെയോ (1-800-222-8477) ബന്ധപ്പെടണമെന്നും അധികൃതർ അഭ്യർത്ഥിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Number plate theft on the rise in Charlottetown; police issue public alert
